Read kapsiki 2 Timotɛ 3 Bible Online

2 Timotɛ 3 - kapsiki bible

2 Timotɛ 3

¹Veyite ghena nya yitea ghə megela: ma te ka keɗaŋe ta hɛ ne, katenza və nyi dzawe dzawe shɛ.

²Kwa nza ŋkɛ katenza mbeli kaka ɗe ghəa nci, kaka ɗe cɛdɛ, kaka fegea kɛfi, kaka kele ghəa kɛfi, kaka ŋele Shala, kaka hawema va mbeli nyi keyake hɛ, kaka tsama ŋ'wese, kaka hawema va wəsə nya keveyi geva tekeleke,

³kaka ntɛaŋentɛa ghə, kaka zhɛma heli, kaka geze ghena kwa ndiremi te mbeli, kaka tsefema ghə, ka zlɛzlɛa kɛfi, kaka jaga ta wəsə ganyɛ,

⁴kaka pamte ŋkwa, kaka mene berete, kaka mpə va kele ghə, kaka ɗe zeɗe za ma ke Shala.

⁵Katenza hɛ kambeli nyi kehawe va Shala kwa ntsə, ama kateɗema berete ta Shala hɛ. Slə ŋa hwa mbeli nyi kala nyighɛ.

⁶Kweci hwa mbelia shɛhɛ ne, kadzedzeki ghɛa mbeli hɛ ba'a kaghwete mi nyi kaka dewə berete, nyi kemenete jaɗafa, nyi ghwetehwe pɛtɛa mama mawe wəshi hɛ kadzembe keleŋa ta nci.

⁷Kantsə geva mia shɛhɛ yitea teke wəshi keveci keveci, ama kakekave ɗepe kaganda hɛ tɛape we.

⁸Tsagha se yɛ Zhanɛs le Zhambrɛs kazhɛne nda ghə ke Moyize, tsagha shɛ zhɛne nda ghə mbelia shɛhɛ ke kaganda perə. Nahe hɛ kenza kambeli nyi nza mehele ta nci kebeze beze ba'a nyi nza yɛ ta nci gəmə.

⁹Ama katelə hɛ cakeɗake we, kwa nza ŋkɛ ne, pɛtɛ mbeli kateɗepe gezhia nci, kala nya ncɛte geva ŋa yɛ Zhanɛs le Zhambrɛs.

¹⁰Ama gha ne, nahe na kezelete ɗa mbe pɛtɛa wəshi: nahe na kefate wəsə nya tekete nda 'ya ke mbeli, ketekeve dzeghwa ta ɗa, keɗepete yɛ zəzə ta ɗa, yɛ ta ɗa, zereghe ghena ta ɗa, ɗe ta ɗa, ntsə geva ta ɗa,

¹¹mɛ nyi ghweze mbeli hwa 'ya ba'a yaka nyi sahwe 'ya mbe Antiyoshe, mbe Ikoniyəm, mbe Listre. Kaganda ne, kwele kwele sahwe yaka 'ya. Ama nahe Nde sleke ŋkwa kembelete ɗa va hɛ pɛtɛ.

¹²Ma yayata wəndə nya keɗe nza jikə le Shala mbe Yɛsə Kriste ne, kateghweze mɛ mbeli hwe.

¹³Ama ka 'yaghwa mehele ba'a ka mbəɗəkwə ne, mbe kema mbe kema temene wəsə kwa ndiremia nci. Kateghwete kweci mbeli hɛ, kateghwete geva hɛ ŋa nci perə.

¹⁴Ma gha gɛ, nza dɛŋe dɛŋe te nya tekeve na ba'a nya yɛhwe na fate fate. Nahe na keɗepe wəndə nya ketekave ŋa wəsəa shɛ.

¹⁵Kawəzege ŋa na nda ɗepemte Ghena ta Shala nya tiɗiɗi na, wərə ŋkɛ kandeke ŋa ntsehwele nya kenza kakeleghe ŋa kalə sha hweŋkwa ta mbele laka yɛ mbe Yɛsə Kriste.

¹⁶Nahe pɛtɛa Ghena ta Shala kerafete geva le kemane ta Shala. Kakete ŋkwa ŋkɛ kezha teke nda kaganda ke mbeli, kezha kese mehele ta mbeli, kezha 'yɛ mbeli ba'a kezha teke nda nza tiɗiɗi ke mbeli,

¹⁷yitea nza wəndəa Shala kehi hi ba'a ɗeke ɗeke fate fate kezha mene yayata slene ganyɛ.