Read kapsiki Tite 1 Bible Online

Tite 1 - kapsiki bible

Tite 1

¹Se va Pol, nde mene slene ta Shala ba'a wəndə nya ghwenakɛ Yɛsə Kriste laka yɛ ta mbeli nyi ntave Shala ba'a laka ɗepe kaganda, kezha nza hɛ kala nya ɗe Shala,

²kezha ve ghə hɛ te mpi nya kaghala ghala. Shala nya keɗema kasla tseŋwə nde meɗeyi ɓəmə mpia shɛ se vəashinyɛ.

³Ma kwa dzeghete geva və ne, nahe ŋkɛ kencɛte ghena ta ŋkɛ laka ghena nya dapave ɗa ŋkɛ ba'a nya kegezete ɗa Shala Nde mbele ɓəmə kezha zlape nda ke mbeli.

⁴Karafe ŋa palepa nya 'ya, Tite, nya kawəzege ta ɗa nya ganyɛ mbe yɛ nya kejikə ɓə. Pa Shala Yita ba'a Yɛsə Kriste Nde mbele ɓəmə ndeke ŋa zlaɓa ba'a kwelɛŋe.

⁵Nahe 'ya keveyi ŋa mbe Krɛte kezha hi wəsə nya kenakama kahite geva ba'a kezha ve mbelia jama hwa Jikə ta ka Kriste mbe yayata meleme, kala nya gezete ŋa 'ya.

⁶Nahe wəndə kwele kehi kanza kawəndə nya ɗema ŋele te ba'a kaza male kwetɛŋe. Nahe ŋkɛ kehi kanza ŋwalea ŋkɛ kaka Kriste, kaɗema mbeli kaŋele hɛ va dzeghwa kwa ndiremi keɗema va fama ghena.

⁷Kwa nza ŋkɛ ma wəndə nya te ghəa Jikə ta ka Kriste ne, slene ta Shala yamene ŋkɛ, nda ŋkɛ kanza kaɗema ŋele te. Mba ŋkɛ kenza kande kele ghə, ya kande hwepe wənə, ya kande ghwəyi keɗema kande mpa. Mba ŋkɛ kenza kande zele yɛ zhɛme mbəɗəkwə.

⁸Nahe ŋkɛ kehi kanza kande kemane ka mentiɓə ba'a kande ɗe wəsə ganyɛ, kande ganyɛa mehele, kawəndə nya tiɗiɗi, kawəndə nya keveyi geva tekeleke ba'a kande tsefe ghəa ŋkɛ.

⁹Nahe ŋkɛ kehi kanza dɛŋe dɛŋe te ghena nya kaganda, nya yipə yipə le ghena nya tekeve mbeli. Tagha gɛ, wərə ŋkɛ kantsəte nda berete ke kweci mbeli laka ghena nya tiɗiɗi ba'a kancɛte nda fete ta nci ke mbeli nyi kezhɛne nda ghə.

¹⁰Kwa nza ŋkɛ kwele kwele mbeli nyi keghwete ŋkwa, halama hwa ka Zhəwif nyi kezhɛrete geva kambelia Yɛsə Kriste, nyi kaka fama ghema ba'a nyi keghwete ŋkwa laka geze ghena ghweleme.

¹¹Nahe ŋkɛ kehi kaŋzle nda mɛ na ke hɛ, kwa nza ŋkɛ mehele yabeze nda hɛ ke mbeli nyi dzeyi ki yɛ ghɛ pɛtɛ. Wəsə nya keɗema kehi yateke nda hɛ ke mbeli, kezha kemave yɛ zhɛme mbəɗəkwə.

¹²Ma ke kwete wəndəa nci nya kande Krɛte, nya kande mɛ ŋkwa ta nci: «Kaka tseŋwəa kɛfi ka Krɛte se vəashi, kawəshi keseɗa nyi 'yaghwa 'yaghwa, kaka meɗəa kɛfi nyi kaka ɓerawe.»

¹³Nahe ghena nya gezete shɛ ŋkɛ kenza kakaganda. Vatse gɛ, ŋele hɛ tsape tsape kezha kemave yɛ nya ganyɛ hɛ.

¹⁴Mba hɛ kendeke nda ghəa nci ke ghena heca ta ka Zhəwif ba'a ke ghena ta mbeli nyi kesərəakɛ kaganda.

¹⁵Nahe pɛtɛa wəshi kenza wɛŋe wɛŋe sha mbeli nyi nza wənəa nci wɛŋe wɛŋe, ama wəsə shɛ wɛŋe sha mbeli nyi ɗema wənəa nci wɛŋe wɛŋe, nyi keɗema kayɛ ghena ta Yɛsə we. Kwa nza ŋkɛ nahe ntsehwelea nci ba'a mehele ta nci kenza wale wale.

¹⁶Nahe hɛ keɗepe Shala ke hɛ le mɛ, ama kaɗepema ŋkɛ hɛ laka slene ta nci. Nahe hɛ kenza kambeli nyi ndiremi ndiremi kashasha, kaka fama ghena ba'a kambeli nyi keɗema kapesle yitea yayata slene ganyɛ.