Read kapsiki Tite 2 Bible Online

Tite 2 - kapsiki bible

Tite 2

¹Ama gha ne, teke nda wəsə nya kehi laka ghena nya tiɗiɗi ke mbeli.

²Geze nda ke meha zhili kezha nza hɛ kambeli keɗema kaghwəyi, kambeli nyi hawe mbeli va hɛ, kambeli nyi kenza bereteke mbe yɛ, ɗe ba'a zereghe ghena.

³Tsagha shɛ ne, geze nda ke meha mi kezha nza hɛ kala nya ɗe Shala: kaɗema kaŋwashɛ ŋwashɛ, ya kaka ve nda ghə ke wəshi kesa. Ncɛ nda ntsehwele ganji hɛ ke mbeli.

⁴Teke nda hɛ ke jɛmbezlɛshi kaɗe zhilia nci ba'a ŋwalea nci,

⁵kanza kambeli nyi kezəzə ghena ba'a wɛŋe wɛŋe, kanewe ghweme te ghɛa nci, kanza megela laka zhilia nci ba'a kahawe va hɛ. Tagha gɛ, wəndə shɛ kateŋele ghena ta Shala we.

⁶Tsagha shɛ ne, geze nda hɛ ke ka mempɛhwetɛti kanza kaka ganjia mehele

⁷mbe pɛtɛa wəshi. Gha le ghəa ŋa ne, nza kawəndə keyipə pa le dzeghwa ganyɛ: ghereŋe te kaganda ba'a nza le mehele vəa ŋkwa nya teke nda wəshi na ke mbeli.

⁸Nza ghena ta ɗa tiɗiɗi kezha ɗema mbeli kageze ghena te, yitea nza ka ghema ta ŋa zhigə le hawe ta nci kwa nakɛma ghena kwa ndiremi hɛ kageze te gheɓəmə.

⁹Nahe ŋkɛ kehite geva kafa nda ghena ka mavashi ke mbeli nyi kesleke hɛ mbe wəshi pɛtɛ, nahe ŋkɛ kehi kanza hɛ zeɗehwe nda ke hɛ laka ya ghə va ghəpə le hɛ

¹⁰ba'a va ghərə wəshi yitea hɛ. Nza hɛ dɛŋe dɛŋe fəyitekeghə te ghena ta mbeli nyi kesleke hɛ. Tsagha gɛ, kateve zləvə hɛ te ghena ta Shala, Nde mbele ɓəmə nya teke nda mbeli ke hɛ mbe wəshi pɛtɛ.

¹¹Kwa nza ŋkɛ kezha mbele mbeli pɛtɛ ncake zlaɓa ta ŋkɛ Shala.

¹²Zlaɓa shɛ nde ncɛ ɓəmə kasərə dzeghwa kwa ndiremi ba'a mawe wəshi nyi teke te hɛɗi, kezha nza gheɓəmə le mehele, tiɗiɗi ba'a dɛŋe dɛŋe te Shala mbe nza nya ɓeshi nya.

¹³Tsetse hi gheɓəmə kaneghe zeɗe nza nya vate ghə gheɓəmə te ba'a veci nya tenca geva zləvəa Shala ta ɓəmə nya wəba ba'a Nde mbele ɓəmə Yɛsə Kriste.

¹⁴Nahe ŋkɛ kezamte mpia ŋkɛ kezha gheɓəmə, kezha mbele ɓəmə va yayata wəsə kwa ndiremi ba'a kezha zhɛre ɓəmə kambeli nyi keyaɓemte geva wɛŋe wɛŋe, mbeli nyi kaŋa ŋkɛ, nyi ɗeke ɗeke kamene wəsə ganyɛ.

¹⁵Tsetse hi na kageze ghena le berete, kantsə nda berete ke mbeli ba'a kaŋele mbeli. Pelema wəndə na kaɓelama ŋa ma.