Read kapsiki Tite 3 Bible Online

Tite 3 - kapsiki bible

Tite 3

¹Zəzəte nda ke ka Kriste kezha fa nda ghena hɛ ke mbeli nyi te ghə ba'a ka meghea kɛfi, kezha hawe hɛ va hɛ ba'a kezha nza hɛ ɗeke ɗeke kamene yayata slene ganyɛ.

²Mba hɛ keŋele yayata wəndə, mba hɛ kenza kaka ghəpə. Nza hɛ kaka gwedəa kɛfi laka mbeli pɛtɛ shanda.

³Kwa nza ŋkɛ ma gheɓəmə vəashi perə ne, kaka gezhia kɛfi, kaka fama ghena, kaka mene fete, kaka mavashia mama ta sla ntsə yitea wəshi ba'a ɗe ta geva se gheɓəmə. Nahe gheɓəmə kese kaka 'yaghwa mehele ba'a kaka zlɛzlɛa kɛfi. Kese mbeli kaɗe ntsə ta ɓəmə we, kese gheɓəmə kaɗe ntsə ta ghəa ɓəmə we.

⁴Ama kwa ncɛte ɗe ta ŋkɛ ba'a ndeɗea mehele ta ŋkɛ Shala Nde mbele ɓəmə kezha mbeli ne,

⁵nahe ŋkɛ kembelete ɓəmə, kenza tewəmbəreke nya menete slene nyi tiɗiɗi gheɓəmə we, ama va nya zhɛ heli ŋkɛ yitea gheɓəmə. Nahe ŋkɛ kembelete ɓəmə ba'a kendeke ɓəmə ya kakwa bake zhigə laka yɛməa batɛme ba'a laka Sefəa Shala.

⁶Kwa nza ŋkɛ nahe Shala kevaghe Sefəa ŋkɛ kwele kwele kənəa gheɓəmə laka Yɛsə Kriste Nde mbele ɓəmə,

⁷yitea baŋe gheɓəmə kanza tiɗiɗi kwa kema ta Shala laka zlaɓa ta ŋkɛ ba'a yitea kemave mpi nya kaghala ghala nya ve ghə gheɓəmə te gheɓəmə.

⁸Nya ya kaghena nya kaganda. Kaɗe 'ya kaghereŋe na le berete te ghena shɛ, yitea ntsə geva mbeli nyi keyɛte ghena ta Shala kamene slene ganji. Nya ya kawəsə nya ganyɛ ba'a nya kekete mbeli.

⁹Ama ya ghəa ŋa va ghəpə nyi ɗema ghə te ba'a va zele sləa ka shihɛ, yɛ veraslə ba'a yɛ ghəpə te ghəa wəsə mahalegə. Wəshi nyi kala nyi ne, gəmə hɛ ba'a kaketekɛ ŋkwa hɛ we.

¹⁰Ma wəndə nya keve nehe hwa mbeli ne, meɗekɛ ŋkɛ kaghate, zhɛne, kakwa bake. Kwa sebe ta ŋkɛ ne, ŋkamte ŋkɛ.

¹¹Nahe na keɗepe nahe wəndə nya kala nya kesərəakɛ hweŋkwa nya tiɗiɗi. Laka mene jaɗafa ne, ghəa ŋkɛ yave nda fete ŋkɛ.

¹²Ma vəa ŋkwa nya teghweneghe ŋa Artɛmas keɗema Tishike 'ya ne, ntsə geva kase sha 'ya mbe Nikopolis, va nya tarete 'ya kakiɗimte vɛa nya mbe.

¹³Kemanakɛ Zɛnas, nde sla fete te ghwə ba'a Apolos mbe dzeghwa ta nci yitea wəsə kadewə nda ke hɛ.

¹⁴Nda mbelia ɓəmə katekeve mene slene ganji kezha mene slene nyi ketsakɛ hɛ, yitea ɗema hɛ kanza gəmə.

¹⁵Pɛtɛa mbeli nyi nza 'ya le hɛ teke kanjiŋwe ŋa. Njiŋwakɛ ka mcɛhɛ ɓəmə nyi keyɛte ghena ta Shala. Pa zlaɓa ta Shala nza le gheyɛ pɛtɛ.