Read kapsiki Ka Ɛbrə 12 Bible Online

Ka Ɛbrə 12 - kapsiki bible

Ka Ɛbrə 12

¹Ma gheɓəmə le ŋa ɓəmə ne, nahe gheɓəmə kenza dzasle kwa ka negha fete kwele kwele. Neghamte ɓəmə wəshi nyi ke'yɛ ɓəmə mbe dzeghwa ta ɓəmə ba'a jaɗafa nyi kendeɓe geva te gheɓəmə dekwede, hwɛ ɓəmə hwɛ ta ɓəmə hwa'a te ŋkwa nya tereke hwɛ nya keveyi geva kwa kema ta ɓəmə.

²Ve ɓəmə ntsə te Yɛsə shanda. Laka gheŋkɛ se yɛ ta ɓəmə se te gha ta ŋkɛ hwa'a te keɗaŋe ta ŋkɛ. Nahe ŋkɛ keyɛte mte te sheghwə kwa slekwa, kese ŋkɛ kaɓela hawe nya te mte nya kala nyagha we, kwa nza ŋkɛ kanewe newe zlama nya veyi nda geva ŋkɛ. Ama tsetsenya ne, nahe ŋkɛ kentishɛnyɛ laka bela kwa zeme ta pasla ta Shala.

³Zəzə mə te ghəa wəndə nya kezereghehwe ghena yitea ka jaɗafa, yagha yɛ kamteyi geva ba'a kakelemte zəzə.

⁴Kwa nza ŋkɛ mbe mpa nya mpa yɛ le jaɗafa ne, mba mpa ta ŋayɛ shɛ, kenaka yɛ kampate mpa hwa'a te mte kaba we.

⁵Nahe ghəa ŋayɛ keza yitea ghena kemtsehe berete nya gezete ŋayɛ Shala kwa gezete ŋayɛ ŋkɛ kala ŋwalea ŋkɛ na? Ma ke: «Wəzege ta ɗa, ghazlənəma na va 'yɛ nya 'yɛ ŋa Nde sleke ŋkwa ma, mba wənəa ŋa kebeze kenza ŋkɛ kaŋele ŋa.

⁶Kwa nza ŋkɛ ne, ka'yɛ wəndə nya ɗe Nde sleke ŋkwa ŋkɛ, kaɗa wəndə nya ɗepe ŋkɛ kawəzege ta ŋkɛ ŋkɛ.»

⁷Zereghe mə yaka nya sa ŋayɛ Shala. Kwa nza ŋkɛ kala ŋwalea ŋkɛ 'yɛ ŋayɛ Shala. Le wəzege shɛ nya ɗema yitenyɛ ka'yɛ ŋkɛ na?

⁸Ma keɗema yɛ ke'yɛ kala ŋwalea ŋkɛ pɛtɛ ne, ŋwale ganji yɛ tsagha we, ama ŋwale nyi ɗema yita te hɛ yɛ.

⁹Zəzəte ɓəmə nza ta ɓəmə le ka yitehɛ ɓəmə nyi kwake te hɛɗi, ma ka'yɛ ɓəmə hɛ ne, mbe fa nda ghena mə ke hɛ, kahawe mə va hɛ perə. Nahe ŋkɛ kehite geva kezha hawe mə va Yiteyɛ ɓəmə nya pelɛ ghweme za ma ke nyagha kezha kemave mpi.

¹⁰Ma ka yitehɛ ɓəmə nyi kwake te hɛɗi ne, kezha hɛ ɓɛhwɛ 'yɛ ɓəmə hɛ, kala wəsə nya nakɛ hɛ tiɗiɗi sha hɛ. Ama nda 'yɛ ɓəmə Shala ne, yitea nza mə ganyɛke, kezha kemave ŋa ɓəmə zhɛme mə, yitea kemave ŋa ɓəmə bela mbe nza ta ŋkɛ tekeleke.

¹¹Ma vəa ŋkwa ke'yɛ ŋkwa ne, kaheɗe kema mə ve kaɗema kazlama. Ama te kwete və, ma mbeli nyi 'yɛte ŋkɛ ne, katekemave meŋgwa ta nci hɛ se te yaka nya sahwe hɛ, kwelɛŋe nya jikə le mpi nya tiɗiɗi ya va hɛ.

¹²Sletete mə dzeve ta ŋayɛ nyi keleɓenji, mtsehe nda mə berete ke ghəa shenea ŋayɛ nyi kegwegwereɓe.

¹³Dzeghwa mə kwa yɛ hweŋkwa nyi tiɗiɗia tiɗiɗia, yitea ɗema seɗa ta nde gwadare kagwereɓe geva, ama kezha mbe seɗa shɛ.

¹⁴Zele mə kanza kwelɛŋe le pɛtɛa mbeli ba'a kanza kala nya ɗe Shala, kwa nza ŋkɛ ma keɗema ŋkɛ tsagha ne, wəndə shɛ katenakɛ Nde sleke ŋkwa we.

¹⁵Ya mə ghəa ŋayɛ yitea ɗema kwete wəndə kazhɛre nda wəmbə ke zlaɓa ta Shala. Yagha kwete wəndə tezhɛre kala zlarave, nya kepese ba'a nya kebeze mbeli kwele kwele le 'yaghwa ta ŋkɛ.

¹⁶Ya mə ghəa ŋayɛ va vale tahe keɗema va ka hawema va Shala kala nya pamte kwelea ŋkɛ Ɛzawə te wəsə kezeme kwetɛŋe zhigə.

¹⁷Nahe yɛ keɗepe, ma kwa ɗe ŋkɛ, kakemave wəpi va yitenyɛ ne, shaŋe ŋkɛ va kemave. Kekemave hweŋkwa keɓe ghena shɛ ŋkɛ, ya kwela se ŋkɛ kazele le nehwene kwa ntsə we.

¹⁸Ma gheyɛ ne, kese yɛ kahende nda geva ke wəsə nya nza mbeli kakwaɗakɛ we: ya ke ghweme ta Sinay nya nza ghwə ta ŋkɛ ghyanake we, ya ke zhikwətə, ya ke ŋkwesle we, ya ke sefə nya wəba we.

¹⁹Kefate vɛ ta veke ba'a gaka ta ghena yɛ we. Nahe ka Israyɛl nyi kefate yɛ gaka shɛhɛ keɗema yɛ fa kwete ghena zhɛkwa.

²⁰Kwa nza ŋkɛ shaŋe hɛ kasəwə ghena nya: «Yayata wəsə nya le mpi nya kekwaɗakɛ ghwemea shɛ, ya wəsə keseɗa ŋkɛ ne, katepesle ŋkɛ mbeli le pelɛ.»

²¹Kwele kwele ve nda ghazlənə wəsə nya kemenete geva shɛ ke mbeli, pa le Moyize kegezete: «Kabare bare 'ya va ghazlənə nya kezhɛ ɗa.»

²²Ama gheyɛ ne, nahe yɛ kehendave nda geva ke ghweme ta Siyon ba'a ke meleme ta Shala nya teghweme, Zhɛrəzalɛm nya pelɛ ghweme nya nza ka ghwene ta Shala tipə tipə mbe gəsəkə.

²³Ma gheyɛ ne, nahe yɛ kese kahende nda geva ke ka ghate ta mbeli nyi yake Shala, nyi rafete geva sləa nci pelɛ ghweme. Nahe yɛ kese sha Shala, nde meha ghwə te mbeli pɛtɛ. Nahe yɛ kehendave nda geva ke mbeli nyi tiɗiɗi nyi kezhɛrenji kambeli ganji.

²⁴Nahe yɛ kehendave nda geva ke Yɛsə, nya kawəze makwa ta jikə geva mɛnɛfɛ nya kwelɛ mbeli le Shala ba'a ke mimia ŋkɛ nya keshekeyi geva, nya kegeze ghena za ma ke ŋa Abɛl.

²⁵Ntsehwele mə, mba yɛ kaɗema fa nda ghena ke wəndə nya kegeze ŋayɛ ghena. Ma mbeli nyi keɗema kese kafa nda ghena ke mbeli nyi kegeze nda ghena ke hɛ kwake te hɛɗi ne, kembelenji hɛ va ɗa we. Tsagha shɛnyɛ teɗema mə kambele kezhɛrave nda wəmbə mə ke wəndə nya kegeze ɓəmə ghena sawa pelɛ ghweme.

²⁶Ma vəashi ne, nahe ŋwələ Shala kegaŋkəɗəte hɛɗi, ama tsetsenya ne, nahe ŋkɛ kemeɗeyi ɓəmə ghena nya: «Deke hɛɗi yategaŋkəɗə 'ya kwetɛŋe zhigə we, ama pa le ghweme perə.»

²⁷Ma «kwetɛŋe zhigə» ne, ncɛ yancɛ ŋkɛ tsema tsema tenza pɛtɛa wəshi nyi kepate geva kehwaɗe hwaɗe ba'a tsema tsema teza sebe te hɛ, yitea nza deke wəsə nya keɗema kanza kehwaɗe hwaɗe.

²⁸Ma kwa nza ŋkɛ hɛɗi meghe nya keɗema kagaŋkəɗə geva yaŋ'we gheɓəmə ne, keseve ɓəmə zlaɓa shɛ megela laka mene nda slene ke Shala kala nya kenza zeɗehwe nda laka hawe ba'a ve nda ghə.

²⁹Kwa nza ŋkɛ nahe Shala ta ɓəmə kenza kaghwə nya ketere ŋkwa.