Read kapsiki Ka Ɛbrə 13 Bible Online

Ka Ɛbrə 13 - kapsiki bible

Ka Ɛbrə 13

¹Leɓema yɛ va ɗe ghəa ŋayɛ kala ka kesaka ma mbe Kriste ma.

²Mba ghəa ŋayɛ keza yitea kemaneve ka mentiɓə. Kwa nza ŋkɛ laka mene kala nyagha nda se kweci mbeli kakemaneve ka ghwene ta Shala kaɗema hɛ keɗepete.

³Zəzə mə mbeli nyi kwa daŋgayɛ, kala wəsə nya nza yɛ kaka daŋgayɛ le hɛ. Zəzə mə mbeli nyi mbe yaka, newe mə ghəa ŋayɛ kala wəsə nya nza yɛ mbe yaka le hɛ.

⁴Ve mə zləvə te ŋzle makwa pɛtɛ, pa yɛ za makwa le male ta ŋkɛ kanza megela kwelɛ ghəa nci. Katemeha ghwə Shala te mbeli nyi kemene mefətekwə ba'a vale tahe.

⁵Mba yɛ kepele nda ghəa ŋayɛ ke ɗe ta cɛdɛ, zlama mə te wəsə nya va gheyɛ ya tsema tsemanyɛ wəsəa shɛ, tewəmbəreke ma ke Shala gezete: «Katesərə ŋa 'ya we, katewəfə ŋa 'ya tɛape we.»

⁶Vatse nza mə kageze le gezleŋema ghə: «Nde sleke ŋkwa nde kemane ɗa, wəsə shɛ kaghazlənə 'ya ve we. Wa wəsə nya nza wəndə ŋelɛ kamenete ɗa wa?»

⁷Zəzəte mə mbeli nyi kese te ghə vəashi, nyi kese kazlape ŋayɛ ghena ta Shala. Zəzəte mə tsema tsema kiɗimte nza ta nci hɛ shɛ yɛ tekeve yɛ ta nci.

⁸Kala ghəa ŋkɛ Yɛsə Kriste mbeɗa, ɓeshi ba'a kaghala ghala.

⁹Pele nda ma ghəa ŋayɛ yɛ ke mama ta kweci ghena nyi teke ŋayɛ mbeli ma. Nahe ŋkɛ kehi kanza yɛ bereteke mbe mbe laka zlaɓa ta Shala, kaɗema laka ghena nyi kegezete geva te ghəa wəshi kezeme. Ma mbeli nyi kezele ghena nyi kegezete geva shɛhɛ ne, kegha hɛ kakemave zhɛme mbe we.

¹⁰Ma ka dzeghe Shala nyi kemene slene mbe ŋkwa nya keveyi geva tekeleke ne, hweŋkwa va hɛ kazeme wəsə nya dzeghekɛ melɛ mbeli le te reghwetɛa ɓəmə we.

¹¹Ma wəndə kwelea ka dzeghe Shala ne, mimia wəshi keseɗa yakele ŋkɛ kalə kadzembe ŋkwa nya keveyi geva tsape kaŋa Shala kezha dzeghe melɛ keyaɓe jaɗafa, ama slia wəshi keseɗa shɛhɛ ne, pelɛke te wəmbəa ghedəkwə tere hɛ mbeli.

¹²Vatse mtenyɛ Yɛsə pelɛke te wəmbəa meleme, yitea yaɓemte mbeli le mimia ŋkɛ.

¹³Ma tsagha ne, shave ɓəmə kalə kabegeme le te wəmbəa ghedəkwə le səwə yiɗə kala gheŋkɛ.

¹⁴Kwa nza ŋkɛ meleme nya ketetemə shɛ va gheɓəmə kwake te hɛɗi we, zele ɓəmə meleme nya ketenza te kwete və.

¹⁵Ve nda ɓəmə tsahe ta ɓəmə ke Shala kala wəsə kedzeghe melɛ ketsa hana laka Yɛsə, geze ta ŋkɛ, wəsə nya kese va mɛa ɓəmə, nya keɗepe sləa ŋkɛ te tepe ta mbeli.

¹⁶Mba yɛ kezaghə mene ganyɛ ba'a kemane ghəa ŋayɛ, nyi ya kamelɛ nyi zeɗehwe nda ke Shala.

¹⁷Fa nda mə ghena ke mbeli nyi te ghəa ŋayɛ ba'a hawe mə va hɛ. Kwa nza ŋkɛ kanewe ghweme hɛ te gheyɛ kevə kevə, va nya nza ŋkɛ katezhɛne nda ghena hɛ ke Shala te ghəa ŋayɛ. Ma kefate nda ghena yɛ ke hɛ ne, le farefa ta wənə temene slene ta nci hɛ keɗema le ndəghwə ndəghwə. Ma keɗema ŋkɛ tsagha ne, kakemanakɛ ŋayɛ ŋkɛ we.

¹⁸Səkwə mə Shala kezha ghen'yɛ. Nahe ghen'yɛ keɗepe fate fate megela zəzə ta n'yɛ, kwa nza ŋkɛ kaɗe ghen'yɛ kazele hweŋkwa kemene wəsə ganyɛ.

¹⁹Ka'yɛwe 'ya va gheyɛ fate fate kezha səkwə Shala yɛ kezha zhɛne geva 'ya kalə kahe kahe sha gheyɛ.

²⁰Nahe Shala nya keve nda kwelɛŋe ke mbeli kekelakame Nde sleke ɓəmə Yɛsə same kwa kwele hwa mbelia kwahɛɗi, laka mimia jikə geva nya kaghala ghala, gheŋkɛ nya kande ya timɛti nya kwele.

²¹Pa Shala ndeke ŋayɛ berete kemene wəsə ganyɛ baŋe yɛ kamenete ɗe ta ŋkɛ, kezha mene wəsə nya zeɗehwe nda ŋkɛ mbe gheɓəmə laka Yɛsə Kriste perə. Tsahe Yɛsə Kriste mbeli kaghala ghala. Amɛn.

²²Ka kesaka ma, kasəkwə ŋayɛ 'ya kezha ve sleme yitea ghena nya keve nda berete ke mbeli le zereghe ghena. Bandanyɛ ne, kenza ghena nyi rafete ŋayɛ nyi 'ya kwele kwele we.

²³Kaɗe 'ya kaɗepete yɛ tsetsenya, nahe mbeli kepelakɛ wəza meyɛ ɓəmə Timotɛ. Ma kese ŋkɛ kahe kahe ne, ghen'yɛ le telə sha gheyɛ.

²⁴Njiŋwakɛ mə mbeli nyi te ghəa ŋayɛ ba'a ka Kriste pɛtɛ. Kanjiŋwe ŋayɛ ka kesaka ma nyi mbe Itali.

²⁵Pa zlaɓa ta Shala nza le gheyɛ pɛtɛ.