Read kapsiki Ka Ɛbrə 2 Bible Online

Ka Ɛbrə 2 - kapsiki bible

Ka Ɛbrə 2

¹Vatse hi gheɓəmə kanza dɛŋe dɛŋe fate fate te ghena nya fate gheɓəmə, yagha gheɓəmə katezamte hweŋkwa.

²Ma ghena nya gezete Shala laka ka ghwene ta ŋkɛ ne, nahe kencɛ zləvəa ŋkɛ. Ma yayata wəndə nya keɗema yɛ nda fete keɗema kahawema ve ne, nahe ŋkɛ kekemave ɗa nya kehi ve.

³Ma nda tsetse ŋkɛ ne, tsema nza mə kambele va yaka shɛ kepeleyite se gheɓəmə yitea mbele nya wəba nya wa? Nde sleke ŋkwa le ghəa ŋkɛ nde ghate kageze ghena ta mbelea shɛ, zhɛne, pa mbeli nyi kefate ghena shɛ gezete kakaganda ghena shɛ kezha gheɓəmə.

⁴Nahe Shala le ghəa ŋkɛ kenegha fete yitea ghena ta nci laka wəshi kencɛ wəshi, wəshi nyi jama jama ba'a pɛtɛa mama ta wəshi meŋele, tsagha laka wəshi nyi kese va Sefəa Shala nyi keneheve geva kala ɗe ta ŋkɛ.

⁵Kwa nza ŋkɛ ne, kenza ke ka ghwene ta ŋkɛ ndeke nda berete kesleke hɛɗi nya ketese Shala kala nya geze nya mə we.

⁶Ama ma ke kwete wəndə gezete te kwete ŋkwa mbe Ghena ta Shala: «Wa ŋkɛ wəndə ŋelɛ nda zəzə ŋkɛ na wa Shala? Wa ŋkɛ wəndə ŋelɛ nda newe ghweme na te wa?

⁷Nahe na keveyi ŋkɛ ɓɛhwɛ ma ke ka ghwene ta ŋa, nahe na kendeke nda zləvə ba'a kwele kala derə meghe.

⁸Nahe na keveyi pɛtɛa wəshi yitea seɗa ta ŋkɛ.» Ma kenza nde nahe Shala kendeke nda berete te ghəa wəshi pɛtɛ ke wəndə ŋelɛ ne, geze ta ŋkɛ, wəsə shɛ kesərəakɛ ŋkɛ kaɗema mbe dzeve ta ŋkɛ we. Ndagwara kanewe gheɓəmə megela ɓeshi kaɗema berete va wəndə ŋelɛ te ghəa pɛtɛa wəshi.

⁹Ama wa nya wəsə nya newe gheɓəmə nya: nahe Yɛsə keveyi geva ɓɛhwɛ ma ke ka ghwene ta Shala kavə ɓɛhwɛ. Ama tsetsenya ne, nahe ŋkɛ kenza bətə mbe zləvə ba'a mbe kwele. Va wa wa? Va nya sahwe yaka ba'a nya mtenyɛ ŋkɛ. Ma te zlaɓa ta Shala ne, nahe Yɛsə kemte kezha mbeli pɛtɛ.

¹⁰Kwa nza ŋkɛ Shala nde pate wəshi pɛtɛ, nahe pɛtɛa wəshi kenza kezha Shala, vatse nda ndeke zləvə Shala ke Yɛsə laka yaka nya sahwe ŋkɛ, kezha fə ŋwale kwele kwele kadzembe zləvəa ŋkɛ. Kwa nza ŋkɛ ne, Yɛsə nde mbele hɛ.

¹¹Ma yɛ Yɛsə nya keyaɓe pɛtɛa yɛ jaɗafa ta mbeli le mbeli nyi yaɓemte geva wale walea nci ne, Yita nya kwetɛŋe ya va hɛ. Vatse nda ɗema hawe kazhɛ nda ke Yɛsə keheka hɛ kaka kesaka ma.

¹²Ma ke Yɛsə gezete nda ke Shala: «Kategeze nda sləa ŋa 'ya ke ka kesaka meyɛ ɗa, kategha cimə 'ya katsahe ŋa hwa tsene ta mbeli.»

¹³Ma ke zhɛkwa: «Kateve nda ghəa ɗa 'ya ke Shala.» Zhɛkwa ne, ma ke: «Wa nya 'ya nya le ŋwale nyi ndeke ɗa na Shala.»

¹⁴Kwa nza ŋkɛ nahe ŋwalea shɛhɛ kenza kambeli nyi nza slia geva ba'a mimi va hɛ, nahe Yɛsə le ghəa ŋkɛ kezhɛrenyɛ kala hɛ kezha kelehwe berete ta gətəli, nya nza berete kempə ŋkwa ve.

¹⁵Nahe ŋkɛ kembeleke mbeli nyi kese kala ka mavashi mbe nza ta nci va ghazlənə ta mte.

¹⁶Kwa nza ŋkɛ ne, kenza kezha kemane ka ghwene ta Shala se ŋkɛ we, ama kezha kemane hwelefefia Abraham.

¹⁷Vatse hi ŋkɛ kazhɛrete ghəa ŋkɛ yipə yipə le ka kesaka meghekɛ, yitea nza ŋkɛ kawəndə kwelea ka dzeghe Shala nya kezhɛ heli yitea mbeli. Nza ta ŋkɛ dɛŋe dɛŋe te slene nde veyi ŋkɛ kwa kema ta Shala kawəndə nya kekelemte jaɗafa ta mbeli te wənə.

¹⁸Ama tsetsenya gɛ, wərə ŋkɛ kakemanakɛ mbeli nyi kedzeghakɛ geva, va nya dzeghakɛ geva ŋkɛ ba'a nya sahwe yaka ŋkɛ le ghəa ŋkɛ.