Read kapsiki Ka Ɛbrə 3 Bible Online

Ka Ɛbrə 3 - kapsiki bible

Ka Ɛbrə 3

¹Ma kwa nza nde kala nya gɛ ka kesaka ma nyi keveyi geva kaŋa Shala, ve mə ntsə te Yɛsə nya ghweneke Shala kezha nza kawəndə kwelea ka dzeghe Shala laka yɛ nya zlape gheɓəmə.

²Kwa nza ŋkɛ ne, dɛŋe dɛŋe ŋkɛ te slene ta Shala nya kentave kezha slenea shɛ, kala nya se Moyize mbe pɛtɛa ghɛa Shala.

³Wəndə nya keŋate ghɛ yanza zləvə za ma te ke ghɛ le ghəa ŋkɛ. Tsagha nza zləvəa Yɛsə za ma ke ŋa Moyize.

⁴Wəndə nde ŋate yayata ghɛ, ama Shala nde ŋa wəshi pɛtɛ.

⁵Ma Moyize le ŋa ŋkɛ ne, nahe ŋkɛ kese dɛŋe dɛŋe te slene ta ŋkɛ mbe pɛtɛa ghɛa Shala, kala nde mene slene nya kenegha fete yitea wəsə nya tegeze Shala.

⁶Ama nahe Kriste kenza dɛŋe dɛŋe te slene ta ŋkɛ kala Wəzege nya keveyi geva te ghəa ghɛa Shala. Gheɓəmə ya kaghɛa ŋkɛ kenza nde nahe gheɓəmə kendeke nda ghə ba'a kenza fare fare yitea wəsə nya neghe gheɓəmə.

⁷Vatse gɛ, ma ke Sefəa Shala: «Ma kefate ŋwələa Shala yɛ ɓeshi ne,

⁸mba yɛ kezhɛre ghəa ŋayɛ ntɛaŋe ntɛaŋe kala nya se yɛ kafa nda ma ghena vəashi, te veci nya se yɛ kadzeghe ŋkɛ te ɓerama,

⁹nya se ka shihɛ ŋayɛ kaghweze mɛ hwa 'ya kezha newe wəsə nya temene 'ya, ndagwara nahe hɛ kenakɛ wəshi nyi menete 'ya kava wəfaɗemsə.

¹⁰Vatse hwepete wənə 'ya va mbelia shɛhɛ, ma 'ya gezete: Kevə kevə nza mehele ta nci keyirə yirə, kefave wəsə nya neghe 'ya va hɛ hɛ we.

¹¹Ma 'ya zemete fela mbe hwepe ta wənəa ɗa: Katedzete hɛɗi nya hite nda ŋkwa kezhɛne mpi 'ya te ke hɛ hɛ tɛape we.»

¹²Ka kesaka ma, ya mə ghəa ŋayɛ yagha kwete wəndəa ŋayɛ kenza le zəzə kwa ndiremi nya keɗema kayɛ ghena, nya kezhɛre nda wəmbə ke Shala teghweme.

¹³Ɓeshi nya ne, heka yaheka ŋayɛ Shala. Tagha gɛ, mtsehe nda mə berete ke ghəa ŋayɛ keveci keveci, vəa ŋkwa nya fa heka shɛ yɛ. Ma tsagha ne, kateghwete ŋayɛ jaɗafa we, wəndə shɛ kateɗema kahawe hwa gheyɛ we.

¹⁴Kwa nza ŋkɛ ne, nahe gheɓəmə kenza kambeli nyi kenza le Kriste, kenza ŋkɛ nahe gheɓəmə kenza dɛŋe dɛŋe hwa'a te kwa keɗaŋe ta və te yɛ ta ɓəmə nya kaghate.

¹⁵Ma ke Ghena ta Shala: «Ma kefate ŋwələa Shala yɛ ɓeshi ne, zhɛrema ghəa ŋayɛ yɛ ntɛaŋe ntɛaŋe, kala nya fate nda ma ghena yɛ vəashi ma.»

¹⁶Ka wa ka fate ŋwələa Shala ba'a ka ɗema fa nda ghena wa? Ashɛ pɛtɛa mbeli nyi fəakave Moyize shave mbe Ɛzhipte wəka?

¹⁷Va kayɛ wa hwepete wənə Shala kava wəfaɗemsə wa? Ashɛ va mbeli nyi kemene nda jaɗafa nda mpənji hɛ kwamte te ɓerama wəka?

¹⁸Ma ke Shala zemete fela: «Katedzete hɛɗi nya hite nda ŋkwa kezhɛne mpi 'ya te ke hɛ hɛ tɛape we.» Ke kayɛ wa zemete nda nya fela ŋkɛ wa? Ashɛ ke mbeli nyi keɗema kese kahawe ve wəka?

¹⁹Nahe gheɓəmə kenakɛ kaɗema kedzete hɛɗia shɛ va nya dewə yɛ va hɛ.