Read kapsiki Ka Ɛbrə 6 Bible Online

Ka Ɛbrə 6 - kapsiki bible

Ka Ɛbrə 6

¹Ma kala nya ŋkɛ ne, mba gheɓəmə kedambeghə ɓəmə yitea wəshi nyi ɓɛhwɛ ɓɛhwɛ te ghəa Kriste, ama ntsə ɓəmə geva yitea teke wəshi jama jama. Mba gheɓəmə kezhɛne geva kadzete shihəa ghena shɛ, geze ta ŋkɛ, sərə slene nyi kekele ŋkwa kalə sha ba'a ve ghə te Shala,

²ghena ta batɛme, ve dzeve kənəa mbeli, ghena ta same kwa kwele le mpi ba'a ghena ta meha ghwə nya kaghala ghala.

³Jive ɓəmə mbe kema! Gheŋkɛ ya kawəsə nya temene gheɓəmə kendeke ɓəmə hweŋkwa Shala.

⁴Ma kaŋa mbeli nyi kegha kase mbe waŋe, nyi kendɛamakɛ wəsə nya kesawa pelɛ ghweme, nyi kekemave Sefəa Shala,

⁵nyi kendɛamakɛ ghena ta Shala nya ganyɛ ba'a berete nyi mbe və nya ketese,

⁶nda betenji hɛ mbe nza ta nci nya vəashi ne, dzawe ŋkɛ nda nza mbeli kazhɛne kazhɛrete nza ta nci fate fate. Kwa nza ŋkɛ ma kaŋa ghəa nci ne, baŋe yazhɛne kabaŋe Wəzege ta Shala te sheghwə kwa zleŋkwa ba'a ŋele yaŋele ŋkɛ hɛ kwa kema ta mbeli pɛtɛ.

⁷Ma vəa ŋkwa sa va nya keme geva kevə kevə hɛɗi ba'a nya mene nda wəshi ŋkɛ ke mbeli nyi kewəza ŋkɛ ne, wəpi ta Shala yakemave ŋkɛ.

⁸Ma nda yɛ tigə kwara ba'a yɛ ndəŋwə yapeseke wəvea shɛ ne, wəve ganyɛ ŋkɛ we, kebezla bezla tenza wəvea shɛ sha Shala, ghwə nde tetere ŋkɛ.

⁹Ya ghen'yɛ nza kageze ghena kala nya gɛ ka kesaka ma, nahe n'yɛ keɗepe fate fate kwa hweŋkwa nya ganyɛ yɛ, kwa hweŋkwa nya kebeghe ŋkwa kalə sha mbele.

¹⁰Kwa nza ŋkɛ keɗema Shala kenza tiɗiɗi we, katezaghə slene ta ŋayɛ, ya ɗe nya ncɛte yɛ kwa kema ta ŋkɛ laka slene nyi menete yɛ ba'a nyi mba yɛ kamene nda ke kweci ka Kriste ŋkɛ we.

¹¹Ma wəsə nya ɗe ghen'yɛ kamene yɛ ne, kezha nza yayata wəndəa ŋayɛ le hwepe ghə nya kwetɛŋe hwa'a te keɗaŋe ta və, yitea mene geva wəsə nya vate ghə yɛ te fate fate.

¹²Nzama yɛ kaka meɗəa kɛfi ma, ama nza kala mbeli nyi nza yɛ va hɛ ba'a nyi kezereghe ghena, nyi keŋ'we wəsə nya meɗeyi nda Shala.

¹³Ma kwa menete nda meɗe mɛ Shala ke Abraham ne, pa ŋkɛ zemete fela le ghəa ŋkɛ yite, kwa nza ŋkɛ kaɗema kwete wəndə shɛ kwele ma ke gheŋkɛ kezha zeme fela ŋkɛ le.

¹⁴Ma ke: «Kaganda ne, katewəpi ŋa 'ya, kwele kwele teve ŋa hwelefefi 'ya.»

¹⁵Ntake Abraham kaneghe wəsə nya meɗeyi nda Shala le zereghe geva, pa kemave wəsə nya meɗeyi nda Shala.

¹⁶Ma kenza mbeli kazeme fela ne, le wəndə nya wəba ma ke hɛ zeme hɛ, fela ya kawəsə nya keve ghena kakaganda, tsagha gɛ, kwete ghena shɛ mba mbeli kagezete we.

¹⁷Tsagha ne, nahe Shala keɗete kazhɛne kancɛ nda dazhɛ dazhɛ ke mbeli nyi kehi kakemave wəshi nyi meɗeyi ŋkɛ kaɗema wəsə nya tarete ŋkɛ kazhɛremte geva. Vatse zemete fela ŋkɛ yitea meɗe mɛ.

¹⁸Wəshi ya shɛ bake kaɗema kazhɛremte geva, nyi ɗema Shala kasla tseŋwə hwe. Ma tsagha gɛ, nahe gheɓəmə nyi kesləyi ŋkwa kewəfərə mbe kekemave berete kekese ve ghə nya kemeɗeyi ɓəmə geva.

¹⁹Kaŋa mpia ɓəmə ne, nahe ve ghəa shɛ kenza kala lɛ keghereŋe kwambelə. Nahe lɛa shɛ kenza fate fate ba'a bereteke. Kajive nde mbe mayafe nya mbe ghɛa Shala pelɛ ghweme.

²⁰Mbagha dzemenyɛ Yɛsə mpelɛa ma ke gheɓəmə kezha gheɓəmə, kwa nza ŋkɛ nahe ŋkɛ kezhɛrenyɛ kawəndə kwelea ka dzeghe Shala kaghala ghala kala nya se Mɛlkisɛdɛk.