Read kapsiki Ka Ɛbrə 7 Bible Online

Ka Ɛbrə 7 - kapsiki bible

Ka Ɛbrə 7

¹Nahe Mɛlkisɛdɛk kenza kameghe nya mbe Salɛm ba'a kande dzeghe nda melɛ ke Shala tehwə ghweme. Ma kwa sheke Abraham kwamte mpa nya hərəte kweci ka meghea kɛfi kwele kwele ŋkɛ ne, nahe Mɛlkisɛdɛk kelə kabegeme le kwa hweŋkwa ba'a kewəpikɛ Abraham.

²Pa Abraham ndeke nda kwa meŋe ta bela ta wəshi nyi fəke ŋkɛ mbe mpa ke Mɛlkisɛdɛk. Ma slə nya kwa sləa Mɛlkisɛdɛk ne, meghea nza tiɗiɗi. Zhɛne ne, kameghe nya mbe Salɛm, geze ta ŋkɛ, meghea kwelɛŋe, se ŋkɛ.

³Ma Mɛlkisɛdɛk ne, keɗepe yitenyɛ, meghekɛ keɗema ka shihɛnyɛ mbeli we. Kegezete ya ta ŋkɛ ba'a mte ta ŋkɛ mbeli te kwete ŋkwa we. Kala Wəzege ta Shala nza ta ŋkɛ, kande dzeghe Shala nya kaghala ghala nza ŋkɛ.

⁴Neweve mə tsema tsema nza ŋkɛ kawəndə nya nza zləvə te. Pa Abraham, shia mbeli ndeke nda kwa meŋe ta bela ta wəshi nyi fəke ŋkɛ hwa mpa.

⁵Va hwelefefia Lɛvi nyi kaka dzeghe Shala kala nya kegezete wəsə mahalegə nza hweŋkwa kekele kwa meŋe ta wəsə mbe wəshi va ka Israyɛl, geze ta ŋkɛ, ka menəhɛ nci, nyi kahwelefefia Abraham perə.

⁶Kenza Mɛlkisɛdɛk kahwelefe ta Lɛvi we, ama nahe ŋkɛ kekelete kwa meŋe ta bela ta wəshi nyi kemave Abraham. Ɓiyitsa ne, nahe ŋkɛ kewəpikɛ wəndə nya kekemave yɛ meɗe mɛa Shala.

⁷Kaɗema ghəpə yite ne, wəndə nya kwele ma nde wəpi wəndə nya ɓɛhwɛ ma.

⁸Ma hwelefefia Lɛvi nyi kekele kwa meŋe ta bela ta wəshi ne, mbeli nyi kempə hɛ. Ama Mɛlkisɛdɛk le ŋa ŋkɛ ne, wəndə nya kenza teghweme kaghala ghala ŋkɛ kala nya gezete Ghena ta Shala.

⁹Kakwa keɗaŋe ne, wa nya ghena nya nza mbeli kageze nya: ma kwa kelemte kwa meŋe ta bela ta wəshi Abraham ne, nahe Lɛvi nya nza ka hwelefefia ŋkɛ kaka kele kwa meŋe ta bela ta wəshi, kelemte ŋa ŋkɛ perə.

¹⁰Kwa nza ŋkɛ kenaka Lɛvi kayake geva kaba we, mba ŋkɛ mbe geva ta shia ŋkɛ Abraham, nda se Mɛlkisɛdɛk kabegeme le Abraham.

¹¹Ma melɛ nya dzeghe ka Lɛvi ne, kala nya ndeke nda hweŋkwa wəsə mahalegəa Israyɛl ke hɛ mene hɛ. Ma ya slene ganyɛ yamenete ka dzeghe Shala nyi kaka Lɛvi ne, nza katsakɛ ŋkwa se ta kwete nde dzeghe Shala, kala nya se Mɛlkisɛdɛk, ya kala nya se Aron we.

¹²Ma kwa nza nde nahe slene ta nde dzeghe Shala kezhɛrete geva ne, nahe ŋkɛ kehite geva kezha zhɛre geva wəsə mahalegə perə.

¹³Ma Nde sleke ɓəmə nya gezete geva ghena shɛhɛ te ghəa ŋkɛ ne, tekeleke ŋa ŋkɛ hwelefe. Wəndə shɛ kegha kase kande mene slene te reghwetɛ mbe hwelefea shɛ we.

¹⁴Nahe mbeli keɗepe fate fate mbe hwelefe ta Zhəwda yake geva Nde sleke ɓəmə, hwelefe nya ɗema Moyize kegezete ghena te vəa ŋkwa nya gezete ghena ŋkɛ te ka dzeghe Shala.

¹⁵Wa nya kwete ghena nya kencɛte nza ta ŋkɛ dazhɛ dazhɛ ɓiyitsa nya: Nahe kwete nde dzeghe Shala kencake geva kenza yipə yipə le Mɛlkisɛdɛk.

¹⁶Kezhɛrenyɛ ŋkɛ kande dzeghe Shala laka wəshi nyi kegezete geva te hwelefe ta wəndə ŋelɛ we, ama laka berete ta mpi nya keɗema kakiɗi.

¹⁷Kwa nza ŋkɛ ma ke Ghena ta Shala gezete: «Katenza na kande dzeghe Shala kaghala ghala kala nya se Mɛlkisɛdɛk.»

¹⁸Nahe ghena nya kegezete geva vəashi kezamte geva, va nya dewə berete ve ba'a nya ɗema ŋkɛ kaketekɛ ŋkwa.

¹⁹Shaŋe wəsə mahalegəa Moyize kamene wəsə ganyɛ. Ama nahe gwəfə ghə nya ganyɛ kendeke ɓəmə geva. Ma laka gheŋkɛ ne, kahende nda geva gheɓəmə ke Shala.

²⁰Zhɛne ne, nahe Shala kegezete ghena gheci gheci. Nahe kweci mbeli kezhɛrenji kaka dzeghe Shala kaɗema laka ghena shɛ.

²¹Ama kaŋa Yɛsə ne, nahe Shala kegezete ghena gheci gheci, kwa nza ŋkɛ ma ke gezete: «Ma ke Nde sleke ŋkwa gezete gheci gheci, katembeɗe mɛ ŋkɛ we: ‹Nahe na kenza kande dzeghe Shala nya kaghala ghala.›»

²²Kwa sebe ne, nahe Yɛsə kenza kande ve ɓəmə mene jikə geva ganyɛ perə.

²³Wəsə nya kenehemte hɛ zhɛkwa ya shɛ: Nahe kweci ka dzeghe Shala kese kwele kwele, va nya fɛa hɛ mte ke nza kaka dzeghe Shala kaghala ghala.

²⁴Ama Yɛsə le ŋa ŋkɛ ne, kaghala ghala nza ŋkɛ teghweme, kaghala ghala nza ŋkɛ kande dzeghe Shala.

²⁵Vatse nza ŋkɛ wərə kambelete mbeli nyi kehende nda geva ke Shala laka gheŋkɛ fəyitekeghə, kwa nza ŋkɛ teghweme ŋkɛ kaghala ghala kezha səkwə Shala kezha hɛ.

²⁶Yɛsə ya kawəndə kwelea ka dzeghe Shala nya kehi kezha gheɓəmə. Nahe ŋkɛ kenza kawəndə nya keveyi geva tekeleke, nya ɗema beze te, nya ɗema jaɗafa ve. Nahe ŋkɛ kenehemte geva le ka jaɗafa ba'a kekeleghe geva zlake ke ŋkwa nya pelɛ ghweme.

²⁷Kenza Yɛsə kala kweci mbelia jama ta ka dzeghe Shala we, kadzeghe melɛ ŋkɛ keveci keveci kezha jaɗafa ta ŋkɛ kaba, kwa sebe ta ŋkɛ, kezha ŋa mbeli we. Kwetɛŋe zhigə dzeghekɛ melɛ ŋkɛ kezha mbeli pɛtɛ, kwa nza ŋkɛ le ghəa ŋkɛ dzeghekɛ melɛa shɛ ŋkɛ.

²⁸Mbeli nyi kaka dewə berete yakele wəsə mahalegə kezha ve hɛ kambelia jama ta ka dzeghe Shala. Ama fela nya zemete Shala kwetere wəmbəa wəsə mahalegə ne, Wəzege ta Shala nya kezhɛrete geva megela kaghala ghala yave ŋkɛ kawəndə kwelea ka dzeghe Shala.