Read kapsiki Ka Ɛbrə 8 Bible Online

Ka Ɛbrə 8 - kapsiki bible

Ka Ɛbrə 8

¹Wa nya ghena nya wəba nya mbe ghena nya geze n'yɛ nya: wəndə kwelea ka dzeghe Shala nya kala nya ya va gheɓəmə. Nahe ŋkɛ kentishɛnyɛ laka bela kwa zeme ta pasla ta Shala nya berete fate fate pelɛ ghweme.

²Slene ta ŋkɛ yamene ŋkɛ mbe ŋkwa nya keveyi geva tekeleke, geze ta ŋkwa, mbe cɛ lekwesa nya kaganda nya kemɓete geva laka Mahwətə, kaɗema laka wəndə ŋelɛ.

³Nahe yayata wəndə kwelea ka dzeghe Shala keveyi geva kezha fə nda wəshi ke Shala ba'a kezha dzeghe nda melɛ. Nahe ŋkɛ kehi kave nda wəsə ŋa ɓəmə ke Shala perə.

⁴Ma ya kawəndə nya kwake te hɛɗi Kriste ne, nza katenza ŋkɛ kande dzeghe Shala we. Kwa nza ŋkɛ ne, kweci mbeli nyi kedzeghe Shala ba'a nyi kefə nda wəshi kala nya gezete wəsə mahalegəa ka Zhəwif ya shɛ.

⁵Ma slene nyi mene ka dzeghe Shala shɛhɛ teke ne, deke pa ba'a shenaŋkwe ta wəshi nyi pelɛ ghweme hɛ. Ma kwa ɗe Moyize kamɓe cɛ lekwesa nya keveyi geva tekeleke ne, ma ke Shala shɛ: «Katenewe ghweme na te slenea shɛ kezha menete geva ŋkɛ kala nya ncɛte ŋa 'ya teke pelɛ ghweme nya.»

⁶Ama tsetsenya ne, nahe slene nya nza zləvə za ma te kendeke nda geva ke Yɛsə, kwa nza ŋkɛ nahe ŋkɛ kenza kawəze makwa ta jikə geva nya ganyɛ, nya keveyi geva te meɗe mɛ ganji.

⁷Ma ya nahe jikə geva kwa ghate kese kaɗema beze te ne, nza katemene geva jikə geva kwa bake we.

⁸Ama ma ke Shala ŋelete mbelia ŋkɛ, kala nya gezete ŋkɛ te ŋkwa nya: «Ma 'ya, 'ya Mahwətə: Katese veci nyi temene jikə geva mɛnɛfɛ 'ya le ka Israyɛl ba'a ka Zhəwda.

⁹Katenza ŋkɛ kala jikə geva nya menete 'ya le ka shihɛ nci vəa ŋkwa nya keseve hɛ 'ya te dzeve kezha fə hɛ shave mbe Ɛzhipte we. Ma kwa sema hɛ dɛŋe dɛŋe te jikə geva shɛ ne, nahe 'ya kewəfəyite hɛ, 'ya Nde sleke ŋkwa nde gezete.

¹⁰Ma 'ya, 'ya Nde sleke ŋkwa mtsehete: Wa nya jikə geva nya temene 'ya le ka Israyɛl kwa sebe ta hɛa shɛhɛ nyi: Kateve nda ɗepe wəsə 'ya ke hɛ kezha ɗepe wəshi mahalegəa ɗa, katerafe geva hɛ kwa wənəa nci. Katenza 'ya kaShala ta nci ba'a ketenza hɛ kambelia ɗa.

¹¹Wəndə shɛ hwa hɛ kateteke nda wəsə ke wəndə nya te hɛɗia ŋkɛ, ya ke menənyɛ kezha ɗepe ɗa we. Kwa nza ŋkɛ pɛtɛ teɗepe ɗa mbeli se te mbeli nyi ɓɛhwɛ ɓɛhwɛ ma hwa'a te nyi jama jama ma.

¹²Kwa nza ŋkɛ katekelemte fete ta nci 'ya te wənə, katezhɛne 'ya kazəzə jaɗafa ta nci we.»

¹³Ma kwa geze ghena Shala te jikə geva mɛnɛfɛ ne, nahe Shala kezhɛrete kwa ghate kameha. Nahe wəsə nya kameha ba'a nya kehale hale kenza takwa takwa yitea za.