Read kapsiki Zhake 3 Bible Online

Zhake 3 - kapsiki bible

Zhake 3

¹Ka kesaka ma, mba yɛ kenza kwele kwele kaka teke nda wəshi ke mbeli. Nahe yɛ keɗepe ma gheɓəmə nyi kaka teke nda wəshi ke mbeli ne, za ma te njiɗi ŋa ɓəmə mbeli ghena te ghwə ke ŋa kweci mbeli.

²Kwa nza ŋkɛ pɛtɛa ɓəmə kamene fete. Ma keɗema wəndə kegha kagezete ghena nya wale wale mbe ghena nya geze ŋkɛ ne, wəndə ganyɛ ŋkɛ tsape, berete yave kayate geva ta ŋkɛ pɛtɛ.

³Lɛ yave mə mbe mɛa gədəwə kezha baŋe ŋkɛ kafa ɓəmə ŋa ɓəmə, kala nya ɗe mə mene mə le geva ta nci pɛtɛ.

⁴Zəzəte mə nza ta kwambelə perə. Ya tsema nza ŋkɛ kewəbanyɛ ba'a tsəkwə sefə nya berete ne, le kwete wəsə keɓɛhwɛnyɛ zhɛre mbeli, dzeyi te ŋkwa nya ɗe wəndə nya kezhɛre dzeyi ŋkɛ.

⁵Tsagha shɛ ghɛni perə, kwete bela ta geva keɓɛhwɛnyɛ ŋkɛ, ama wərə ŋkɛ kafege le mene wəshi kwele kwele. Zəzəte mə nza ta gamba kewəbanyɛ gi, ama wərə ghwə ci'a kandəmte pɛtɛ.

⁶Kala ghwə ghɛni, mbe nza wəsə kwa ndiremi, kwete ŋkɛ bela ta ɓəmə nya kebeze ŋkɛ pɛtɛ, katsa ghwə ghɛni yitea nza ta ɓəmə, se mɛa ya hwa'a te mte. Se te ŋkwa yaka se ghwəa shɛ le ghəa ŋkɛ.

⁷Ma wəshi nyi kwamte pɛtɛ, nyi kezlə, nyi kentsehe geva le hwə dzate te hɛɗi, kelepe nyi kwa ndərə ne, wərə mbeli ka'yɛte hɛ.

⁸Ama ghɛni ne, wəndə shɛ ka'yɛte we, kwete ŋkɛ wəsə kwa ndiremi nya keɗema kanza gweɗakwe, kala dala nya kepesle ŋkwa ŋkɛ.

⁹Le ghɛnia shɛ tsahe Mahwətə Yiteyɛ ɓəmə mə, le shɛnyɛ bezla mbeli nyi pate Shala kala ghəa ŋkɛ mə.

¹⁰Same kwa mɛ nya kwetɛŋe same wəpi ŋkwa ba'a bezla ŋkwa. Ma gheyɛ ne, ka kesaka ma ne, mba wəshi nyi kala nyi kemene ŋayɛ geva.

¹¹Ghwa shɛ nya hwɛ yɛməa nya zeɗe ba'a nya zlɛmezlɛ kanya kwetɛŋe same kwa we.

¹²Ka kesaka ma, kapesle dasekwa yitea ya bekele na? Kapesle rɛzɛŋe yitea ya dasekwa na? Tsagha shɛ ne, kapesle ɗasle kwa zlɛmezlɛ yitea hwɛ yɛmə nya zeɗe we.

¹³Wa wəndə nya kentsehwele ntsehwele ba'a nya keɗepe wəsə hwa gheyɛ wa? Ncɛte ghəa ŋkɛ ŋkɛ laka dzeghwa ganyɛa ŋkɛ, laka wəshi nyi mene ŋkɛ le shifə ghə ba'a ntsehwele.

¹⁴Ama kenza ghəa ŋayɛ mpɛafe va zlɛ nya 'yaghwa ba'a va kele ghə ne, mba yɛ kedambeghə ŋayɛ yitea fege gəmə kasla tseŋwə kezha beze kaganda ma.

¹⁵Ma nya kala nya ntsehwele ne, sawa pelɛ ghweme ŋkɛ we, ŋa hɛɗi nya 'yaghwa nya ŋkɛ, se va zəzə ta mbeli, va ghena nyi ɗema ghə te, ŋa gətəli ŋkɛ.

¹⁶Ma te ŋkwa nya nza zlɛ le mpa ne, te ŋkwa shɛ nza kwa wale wale ta ghena le slene nyi ndiremi ndiremi.

¹⁷Ama kave nda wənə nya wɛŋe ntsehwele nya kesawa pelɛ ghweme ke mbeli kaba, zhɛne ne, kakele kwelɛŋe ba'a gwedəa mehele ŋkɛ kase, kajikə ŋkwa ŋkɛ, kwele kwele mene ganyɛ ŋkɛ ba'a kamene slene ganji ŋkɛ. Kanta ghala ŋkɛ kwelɛ mbeli we, kamene mbəɗəkwə ŋkɛ we.

¹⁸Ma mbeli nyi keve kwelɛŋe hwa mbeli ne, kwelɛŋe yaŋkisə hɛ dzeyi yitea ghəa nci kala felehwe ta wəshi, ma wəshi nyi mene hɛ se te wəve ne, ghenci slene nyi tiɗiɗi.