Read kapsiki 1 Piyɛre 2 Bible Online

1 Piyɛre 2 - kapsiki bible

1 Piyɛre 2

¹Neghamte mə mama ta 'yaghwa mehele, yayata tseŋwə tsagha mbəɗəkwə, zlɛ ba'a ŋwashɛ ŋwashɛ.

²Kala velɛnjɛ nyi kezləmə zləmə yitea ŋ'wa ne, ɗe mə ŋ'wa nya mbe ghena ta Shala, ŋ'wa nya kegweɗətema geva yitea sa yɛ kezha kele le ba'a yitea ntsehe yɛ mbe mbele.

³Kwa nza ŋkɛ ma ke Ghena ta Shala: «Nahe yɛ kendɛamakɛ tsema tsema zeɗe nya mbe Nde sleke ŋkwa.»

⁴Hende nda mə geva ke Nde sleke ŋkwa, pelɛ nya nza mpi hwe, nya neghakɛ mbeli, ama nahe Shala kentave kaveyi kapelɛa nya nza zləvə te shɛ.

⁵Hende nda mə geva kezha nza yɛ kala pelɛ nyi nza mpi hwe mbe ŋa ta ghɛa Sefəa Shala. Kezha nza yɛ kawəvəsəa ka dzeghe Shala nyi kaŋa Shala, kezha dzeghe nda melɛ kala nya ɗe Sefəa Shala, nyi ketenza zeɗehwe nda laka Yɛsə Kriste.

⁶Kwa nza ŋkɛ ma ke Ghena ta Shala gezete: «Nahe 'ya kentave pelɛ nya nza zləvə te, nya teve 'ya kapelɛa megwekwe mbe Siyon. Katenza hawe te wəndə nya kedɛŋe geva te we.»

⁷Zləvə ya te pelɛa shɛ kwele kwele kezha gheyɛ ka zele Shala. Ama sha mbeli nyi keɗema kaka zele Shala ne, nahe pelɛ nya neghakɛ ka ŋa ŋkwa kezhɛrenyɛ kapelɛa megwekwe.

⁸Ma ke gezete geva te kwete ŋkwa: «Pelɛ nya ketsa ŋkwa katehene ŋkɛ, gela nya kewele ŋkwa ŋkɛ.» Nahe tehene ketsakɛ mbelia shɛhɛ va nya ɗema hɛ kese kahawe va ghena ta Shala. Kezha wəsə nya kala nya tereheyi geva hɛ.

⁹Ama gheyɛ ne, nahe yɛ kenza kahwelefe nya kentave geva, kaka dzeghe Shala ta meghe, kahwelefe nya kaŋa Shala. Kezha ncɛ slene ta ŋkɛ nya ganyɛ ntave ŋayɛ Shala nya kehekakɛ ŋayɛ shave mbe ŋkwesle kadzembe waŋea ŋkɛ nya ganyɛ.

¹⁰Ma vəashi ne, kese yɛ kambelia Shala we, ama tsetsenya ne, mbelia ŋkɛ yɛ. Ma vəashi ne, kese Shala kazhɛ heli yitea gheyɛ we, ama tsetsenya ne, kazhɛ heli ŋkɛ yitea gheyɛ.

¹¹Ka mcɛhɛ ɗa ganji, kantsə ŋayɛ berete 'ya, gheyɛ nyi kaka mentiɓə ba'a kaka dzeghwa kwake te hɛɗi nya: ya mə ghəa ŋayɛ va yɛ ɗe ta geva nyi kempa le nza ta ŋayɛ.

¹²Nza mə megela hwa ka ɗepema Shala. Ma tsagha, ya ghenci nza kave ŋayɛ kaka beze ghena ne, katenewe slene ganjia ŋayɛ ba'a katetsahe Shala hɛ te veci nya tese ŋkɛ.

¹³Hawe mə va mbelia jama tewəmbəreke Nde sleke ŋkwa: va meghe va nya nza ŋkɛ kawəndə nya te ghəa mbeli pɛtɛ,

¹⁴va ka ŋgwamna nyi ghweneke ŋkɛ kezha ve ɗa te mbeli nyi kemene wəsə kwa ndiremi ba'a kezha fale mbeli nyi kemene wəsə ganyɛ.

¹⁵Kwa nza ŋkɛ ma wəsə nya ɗe Shala ne, kezha mene ganyɛ yɛ yitea ŋzle nda mɛ ke ka gezhia kɛfi ba'a ka dewə ntsehwele.

¹⁶Nza mə kala ka mamzashi. Vema nza ta ŋayɛ kaka mamzashi yɛ kala kawəsə kedəpə slene nyi ndiremi ndiremi ma, ama nza mə kaka mene nda slene ke Shala.

¹⁷Hawe mə va mbeli pɛtɛ, ɗe mə ka kesaka meyɛ ŋayɛ mbe Kriste, ve mə zləvə te Shala, hawe mə va meghe.

¹⁸Ka mene slene, hawe mə va mbeli nyi kesleke ŋayɛ, kenza deke va nyi kambeli ganji ba'a nyi nza mehele va hɛ we, ama va nyi dzawe dzawe perə.

¹⁹Kwa nza ŋkɛ megela ŋkɛ kazereghe yaka nyi sa nda mbeli gəmə ke wəndə laka hawe va Shala wəndə.

²⁰Kwa nza ŋkɛ ma kesahwe yaka yɛ tewəmbəreke fete ta ŋayɛ ne, wa zləvə nya te gheyɛ wa? Ama kenza nde te slene ganyɛ zereghe yaka yɛ ne, megela ŋkɛ sha Shala.

²¹Kezha gheŋkɛ hekakɛ ŋayɛ Shala, kwa nza ŋkɛ nahe Kriste kesahwe yaka kezha gheyɛ perə. Nahe ŋkɛ kencɛte ŋayɛ hweŋkwa kezha dzeghwa yɛ kwa seɗa ta ŋkɛ.

²²Kemenete jaɗafa ŋkɛ we, kegha tseŋwə kasame kwa mɛa ŋkɛ we.

²³Ma kwa ŋelekɛ ŋkɛ mbeli ne, kese ŋkɛ kazhɛne le ŋele we. Ma kwa nza mbeli kasa nda yaka ne, kese ŋkɛ kantsə ghyana we, ama nahe ŋkɛ kesərəakɛ nda ghəa ŋkɛ ke Shala nya kemeha ghwə tiɗiɗi.

²⁴Nahe Kriste le ghəa ŋkɛ kekelehwe jaɗafa ta ɓəmə mbe geva ta ŋkɛ laka mte te sheghwə kwa slekwa, yitea nza gheɓəmə kempə mpə laka jaɗafa ba'a teghweme kezha nza tiɗiɗi. Laka yɛ zhia ŋkɛ kemave nza kembe mbe yɛ.

²⁵Kwa nza ŋkɛ nahe yɛ kese kala timɛti nyi keza za, ama tsetsenya ne, nahe yɛ kezhɛneke geva kase sha nde ya ŋayɛ ba'a nde newe ghweme te gheyɛ.