Read kapsiki 1 Zhaŋe 1 Bible Online

1 Zhaŋe 1 - kapsiki bible

1 Zhaŋe 1

¹Ma ghena nya rafete ŋayɛ nya ghen'yɛ ne, te ghena nya nza mpi mbe ŋkɛ, te ŋwela ghena shɛ nda teghate geva wəshi pɛtɛ. Nahe ghen'yɛ kefate ŋkɛ, nahe ghen'yɛ kenakɛ ŋkɛ le ntsə ta n'yɛ, nahe ghen'yɛ kemareve ŋkɛ, nahe dzeve ta n'yɛ kekwaɗakɛ ŋkɛ.

²Kwa nza ŋkɛ nahe mpia shɛ kencɛte geva, nahe ghen'yɛ kenakɛ ŋkɛ, vatse negha fete ghen'yɛ yitea ghena shɛ ba'a zlape ŋayɛ mpi nya kaghala ghala nya kese vare Yita ba'a nya kencɛte n'yɛ geva ghen'yɛ.

³Wəsə nya nakɛ ba'a nya fate ghen'yɛ yazlape ŋayɛ ghen'yɛ perə. Ma tsagha ne, katenza yɛ jikə le ghen'yɛ. Kanya kwetɛŋe ne, katenza gheɓəmə jikə le Yita ba'a le Wəzege ta ŋkɛ Yɛsə Kriste.

⁴Ghen'yɛ karafe ŋayɛ ghena shɛ kezha viɗikɛ geva zlama ta n'yɛ.

⁵Wa nya ghena nya fate ghen'yɛ va Yɛsə Kriste ba'a nya zlape ŋayɛ ghen'yɛ nya: Shala ya kawaŋe, ŋkwesle shɛ ya ci'a mbe we.

⁶Ma kegeze gheɓəmə jikə gheɓəmə le, mba gheɓəmə kadzeghwa hwa ŋkwesle ne, tseŋwə yasla gheɓəmə ba'a kamene slene gheɓəmə le kaganda we.

⁷Ama kenza gheɓəmə kadzeghwa mbe waŋe kala nya nza Shala le ghəa ŋkɛ mbe waŋe ne, nahe gheɓəmə kenza jikə kwelɛ ghəa ɓəmə, kayaɓe ɓəmə pɛtɛa jaɗafa ta ɓəmə mimia Yɛsə, Wəzege ta ŋkɛ.

⁸Ma kegeze gheɓəmə kaɗema gheɓəmə kemenete jaɗafa ne, ghəa ɓəmə yaghwete gheɓəmə, kaganda shɛ mbe gheɓəmə we.

⁹Ama kencɛte jaɗafa ta ɓəmə gheɓəmə ne, wərə gheɓəmə kavate ghə te Shala, kwa nza ŋkɛ nahe ŋkɛ kenza tiɗiɗi: katekele jaɗafa ta ɓəmə ŋkɛ seyi te wənə ba'a kateyaɓe ɓəmə ŋkɛ va yayata wəsə kwa ndiremi.

¹⁰Ma kegeze gheɓəmə kaɗema gheɓəmə kemenete jaɗafa ne, kande tseŋwə veyi Shala gheɓəmə, kenza ghena ta ŋkɛ mbe gheɓəmə we.