Read kapsiki 1 Zhaŋe 2 Bible Online

1 Zhaŋe 2 - kapsiki bible

1 Zhaŋe 2

¹Ŋwalea ɗa, 'ya karafe ŋayɛ ghena nya yitea ɗema yɛ kamene jaɗafa. Ama kemenete jaɗafa wəndə ne, nde ya ɓəmə ya shɛ kwa kema ta Yita, gheŋkɛ Yɛsə Kriste, wəndə nya tiɗiɗi.

²Kwa nza ŋkɛ nahe Yɛsə Kriste kedzeghekɛ melɛ le ghəa ŋkɛ kezha jaɗafa ta ɓəmə, kenza deke kezha jaɗafa ta ɓəmə we, ama kezha jaɗafa ta mbeli nyi te hɛɗi lema.

³Ma kenza gheɓəmə kahawe va ghena nyi gezeke Shala ne, wərə gheɓəmə kaɗepe nahe gheɓəmə keɗepe Shala.

⁴Ma kegeze wəndə: «Nahe 'ya keɗepe Shala», a ke, ama kahawema ŋkɛ va ghena nyi gezete ŋkɛ ne, nde sla tseŋwə ŋkɛ, kaganda shɛ mbe wəndəa shɛ we.

⁵Ama wəndə nya kehawe va ghena ta Shala ne, kaganda nza ɗe ta Shala fate fate mbe. Tsetse nza gheɓəmə kaɗepe jikə gheɓəmə le Shala.

⁶Ma wəndə nya kegeze: «Jikə nza 'ya le Shala», ke ne, nda ŋkɛ kanza kala nya nzahwe nza Yɛsə.

⁷Ka mcɛhɛ ɗa ganji, ghena mɛnɛfɛ yarafe ŋayɛ 'ya we, ama meha ghena nya kemave yɛ se vəashi. Ma meha ghena shɛ ne, gheŋkɛ ghena nya fate nya yɛ.

⁸Ghena mɛnɛfɛ yarafe ŋayɛ 'ya, ghena nya kakaganda mbe Kriste ba'a mbe gheyɛ perə. Kwa nza ŋkɛ kiɗi yakiɗi viɗi, ɓele yaɓele waŋe nya kaganda tsetsenya.

⁹Ma wəndə nya kegeze: «Mbe waŋe 'ya», a ke, ama kaɗema ntsə ta menənyɛ ŋkɛ ne, mba ŋkɛ mbe ŋkwesle.

¹⁰Ma wəndə nya keɗe menənyɛ ne, mbe waŋe nza ŋkɛ, tsagha ne, wəsə nya mene ŋkɛ shɛ kanza kaghwetame ŋkɛ mbe beze ghena we.

¹¹Ama wəndə nya keɗema ntsə ta menənyɛ ne, mba ŋkɛ mbe ŋkwesle, mbe ŋkwesle dzeghwa ŋkɛ, kaɗema keɗepe ŋkwa nya dzete ŋkɛ, va nya zhɛrete ŋkɛ ŋkwesle kaghwələ.

¹²Ŋwalea ɗa, 'ya karafe ŋayɛ ghena nya, va nya kelemte geva yɛ jaɗafa ta ŋayɛ te wənə te zlaɓa ta sləa Kriste.

¹³Ka yitehɛ, karafe ŋayɛ ghena 'ya, va nya ɗepe wəndə nya kenza shɛ se vəashinyɛ yɛ. Ka mempɛhwetɛti, karafe ŋayɛ ghena 'ya, va nya hərəte Nde ndiremia mehele yɛ.

¹⁴Ŋwalea ɗa, karafe ŋayɛ ghena 'ya, va nya ɗepe Yita yɛ. Ka yitehɛ, karafe ŋayɛ ghena 'ya, va nya ɗepe wəndə nya kenza shɛ se vəashinyɛ yɛ. Ka mempɛhwetɛti, karafe ŋayɛ ghena 'ya, va nya nza yɛ bereteke: Kanza ghena ta Shala mbe gheyɛ ba'a nahe yɛ kehərəte Nde ndiremia mehele.

¹⁵Mba yɛ keɗe ghena nya te hɛɗi lema nya, ya wəsə nya kaŋa hɛɗi lema. Ma kenza wəndə kaɗe hɛɗi lema ne, kanza ɗe ta Yita mbe we.

¹⁶Kwa nza ŋkɛ wa nyi wəshi nyi kaŋa hɛɗi lema nyi: ɗe mene wəshi mawe geva keɗema sla ntsə yitea wəshi, kele ghə nya kese mbe galɛpi. Kenza pɛtɛa wəshia shɛhɛ kawəshi nyi kese va Yita we, ama va hɛɗi lema.

¹⁷Kiɗi yakiɗi hɛɗi lema, tsagha sla ntsə yitea wəshi nyi te, ama kanza wəndə nya kemene ɗe ta Shala teghweme kaghala ghala.

¹⁸Ŋwalea ɗa, takwa takwa kwa keɗaŋe ta və. Nahe yɛ kefa katese nde jaga ta Kriste. Tsetsenya ne, nahe ka jaga ta Kriste kwele kwele kenza teke. Vatse ɗepe gheɓəmə takwa takwa kwa keɗaŋe ta və.

¹⁹Shave hwa gheɓəmə slənji hɛ, ama kenza hɛ kambelia ɓəmə bandanyɛ we. Ma ya mbelia ɓəmə hɛ ne, nza hwa gheɓəmə tenza hɛ. Ama nahe hɛ keshavenji hwa gheɓəmə kezha ɗepe mbeli kaɗema hɛ kambelia ɓəmə.

²⁰Ama gheyɛ ne, nahe yɛ kekemave Sefəa Shala laka Kriste, yitea ɗepe kaganda yɛ pɛtɛ.

²¹Ma nda rafete ŋayɛ ghena nya 'ya ne, kenza va nya ɗepema kaganda yɛ we, ama va nya ɗepe ŋkɛ yɛ. Nahe yɛ keɗepe kaɗema tseŋwə kashave mbe kaganda perə.

²²Wa ya kande tseŋwə keɗema wəndə nya keɗepema Yɛsə ya kaKriste wa? Wa nya nde nde jaga ta Kriste nya: wəndə nya keɗepema Yita ba'a Wəzege.

²³Kwa nza ŋkɛ ma wəndə nya keɗepema Wəzege ne, nahe ŋkɛ keɗepema Yita perə. Ma wəndə nya keɗepe Wəzege, nahe ŋkɛ keɗepe Yita perə.

²⁴Vatse gɛ, ya mə ghena ta Shala nya fate yɛ se vəashinyɛ kwa wənəa ŋayɛ. Ma keyate ghena ta Shala nya fate yɛ se vəashinyɛ yɛ kwa wənəa ŋayɛ ne, katenza yɛ jikə le Wəzege ba'a Yita.

²⁵Wa nya wəsə nya meɗeyi ɓəmə Kriste nya: mpi nya kaghala ghala.

²⁶Nya ya kawəsə nya zəzə 'ya karafe ŋayɛ te ghəa mbeli nyi keɗe kaghwete ŋayɛ.

²⁷Ama gheyɛ ne, nahe Kriste kendeke ŋayɛ le Sefəa Shala. Nahe Sefəa shɛ kenza mbe gheyɛ. Tagha gɛ, mba yɛ kaɗe nde teke ŋayɛ wəshi we. Kwa nza ŋkɛ Sefəa Shala nde teke ŋayɛ pɛtɛa wəshi: kaganda yateke nda ŋkɛ ke mbeli, kaɗema katseŋwə. Vatse gɛ, mene mə wəsə nya tekete ŋayɛ ŋkɛ ba'a nza mə jikə le Kriste.

²⁸Ma tsetsenya gɛ ŋwalea ɗa, nza mə jikə le Kriste, yitea nza gheɓəmə le gezleŋema ghə te veci nya tenca ŋkɛ. Ma te vecia shɛ ne, katenza gheɓəmə shewə va hawe kwa kema ta ŋkɛ.

²⁹Ma kwa nza ŋkɛ nahe yɛ keɗepe kawəndə nya tiɗiɗi Kriste ne, ɗepete mə nahe yayata wəndə nya kemene wəsə nya tiɗiɗi kenza kawəzege ta Shala.