Read kapsiki 1 Zhaŋe 4 Bible Online

1 Zhaŋe 4 - kapsiki bible

1 Zhaŋe 4

¹Ka mcɛhɛ ɗa ganji, mba yɛ keyɛ ghena ta pɛtɛa mbeli nyi kegeze Sefəa Shala ya mbe hɛ, ama dzeghakɛ mə hɛ kezha ɗepe kenza va Shala se sefə nya mbe hɛ. Kwa nza ŋkɛ kwele kwele ka mɛ ŋkwa tseŋwə nyi kepesleyi geva te hɛɗi lema.

²Wa nya tsetse nza yɛ kaɗepe kenza ŋkɛ Sefəa Shala ŋkɛ: ma yayata wəndə nya keɗepe nahe Yɛsə Kriste kezhɛrenyɛ kawəndə ŋelɛ kaganda ne, Sefəa Shala ya mbe.

³Ama yayata wəndə nya keɗepema Yɛsə Kriste kala nyagha ne, Sefəa Shala mbe we, ama ŋa Nde jaga ta Kriste. Nahe yɛ kefate katese Nde jaga ta Kriste. Tsetsenya ne, teke ŋkɛ te hɛɗi lema.

⁴Ama gheyɛ gɛ ŋwalea ɗa, ŋa Shala yɛ, nahe yɛ kehərəte ka mɛ ŋkwa tseŋwə. Kwa nza ŋkɛ berete ma Sefəa Shala nya mbe gheyɛ ke sefə nya kesleke kaŋa hɛɗi lema.

⁵Nahe mbelia shɛhɛ kenza kaŋa hɛɗi lema. Vatse geze ghena hɛ kala mbeli nyi kaŋa hɛɗi lema. Tagha gɛ, kafa ghena ta nci mbeli nyi te hɛɗi lema.

⁶Ama gheɓəmə ne, mbeli nyi kaŋa Shala gheɓəmə. Ma wəndə nya keɗepe Shala ne, kafa ghena ta ɓəmə ŋkɛ. Ma wəndə nya keɗema kaŋa Shala ne, kafa ghena ta ɓəmə ŋkɛ we. Tsetse nza mə kaɗepe Sefəa kaganda ba'a sefəa tseŋwə.

⁷Ka mcɛhɛ ɗa ganji, ɗe ɓəmə ghəa ɓəmə, kwa nza ŋkɛ va Shala se ɗe. Ma yayata wəndə nya nza ɗe ve ne, wəzege ta Shala ŋkɛ, nahe ŋkɛ keɗepe Shala.

⁸Ma wəndə nya keɗema ŋkwa ne, keɗepe Shala ŋkɛ we, kwa nza ŋkɛ Shala ya kaɗe.

⁹Wa nya tsetse ncɛte ɓəmə ɗe ta ŋkɛ Shala: nahe ŋkɛ keghweneke Wəzege kwetɛa ŋkɛ kasawa kadzete hɛɗi, yitea kemave mpi gheɓəmə laka gheŋkɛ.

¹⁰Wa nya wəsə nya kaɗe nya: gheɓəmə ka ɗehwe Shala we, ama gheŋkɛ nde ɗehwe ɓəmə ba'a nde ghweneke Wəzege ta ŋkɛ kezha yaɓe yɛ jaɗafa ta ɓəmə.

¹¹Ka mcɛhɛ ɗa ganji, ma nda ɗehwe ɓəmə Shala kala nya ne, nahe gheɓəmə kehi kaɗe ghəa ɓəmə perə.

¹²Wəndə shɛ kegha kanakɛ Shala we. Ama kenza gheɓəmə kaɗe ghəa ɓəmə ne, kanza Shala mbe gheɓəmə ba'a kancɛ geva ɗe ta ŋkɛ fate fate mbe gheɓəmə.

¹³Wa nya tsetse nza gheɓəmə kaɗepe jikə gheɓəmə le Shala ba'a mbe gheɓəmə ŋkɛ: nahe ŋkɛ kendeke ɓəmə Sefəa ŋkɛ.

¹⁴Nahe ghen'yɛ kenakɛ ba'a keneghate fete yite tsema tsema ghweneke Wəzege ta ŋkɛ Yita kezha nza kaNde mbele hɛɗi lema.

¹⁵Ma wəndə nya keɗepe Yɛsə kaWəzege ta Shala ne, kanza Shala mbe wəndəa shɛ, kanza ŋkɛ jikə le Shala.

¹⁶Nahe gheɓəmə keɗepe ba'a keyɛte kaɗe ɓəmə Shala. Shala ya kaɗe. Ma wəndə nya kenza mbe ɗe ne, kanza ŋkɛ jikə le Shala, kanza Shala mbe wəndəa shɛ perə.

¹⁷Ma kenza ŋkɛ tiɗiɗi ɗe nya mbe gheɓəmə ne, katenza gheɓəmə le gezleŋema ghə te vecia meha ghwə, va nya nza nza ta ɓəmə teke te hɛɗi nya yipə yipə le ŋa Yɛsə Kriste.

¹⁸Ghazlənə shɛ mbe ɗe we. Kaŋka ghazlənə ɗe ganyɛ. Kwa nza ŋkɛ ma kenza ghazlənə kazhɛ nda ke wəndə ne, ɗa ya neghe ŋkɛ. Kaɗe ŋkwa nde ghazlənə fate fate we.

¹⁹Ma gheɓəmə ne, kaɗe ŋkwa gheɓəmə va nya ɗehwe ɓəmə Shala kande ghate.

²⁰Ma kegeze wəndə: «Kaɗe Shala 'ya», a ke, kazlɛ ŋkɛ va menənyɛ ne, nde sla tseŋwə ŋkɛ. Kwa nza ŋkɛ ma wəndə nya keɗema menənyɛ nya newe ŋkɛ ne, kaɗete Shala nya nakɛma ŋkɛ ŋkɛ we.

²¹Wa nya ghena nya gezete ɓəmə Kriste nya: ma wəndə nya keɗe Shala ne, nda ŋkɛ kaɗe menənyɛ perə.