Read kapsiki 1 Zhaŋe 5 Bible Online

1 Zhaŋe 5 - kapsiki bible

1 Zhaŋe 5

¹Yayata wəndə nya keyɛte Yɛsə ya kaKriste ne, wəzege ta Shala ŋkɛ. Yayata wəndə nya keɗe Shala Yita ne, kaɗe ŋwalea ŋkɛ ŋkɛ perə.

²Wa nya kala nya nza gheɓəmə kaɗepe kaɗe ŋwalea Shala gheɓəmə: laka ɗe Shala ba'a laka mene slene le ghena nyi gezete ŋkɛ.

³Kwa nza ŋkɛ ma ɗe Shala ne, gheŋkɛ hawe va ghena nyi gezete ŋkɛ. Kenza ghena nyi gezete kawəsə nya ɗaŋeɗa we,

⁴kwa nza ŋkɛ nahe yayata wəzege ta Shala kenza kande hərəte hɛɗi lema. Ma wəsə nya nza gheɓəmə kahərəte mbeli nyi te hɛɗi le ne, gheŋkɛ yɛ ta ɓəmə.

⁵Wa ya kande hərəte hɛɗi lema wa? Deke wəndə nya keyɛte Yɛsə ya kaWəzege ta Shala.

⁶Yɛsə Kriste ya kawəndə nya kese laka yɛmə ba'a mimi. Kenza se ta ŋkɛ deke le yɛmə we, ama le yɛmə ba'a mimi. Sefəa Shala nde negha fete yitea kaganda ta ŋkɛ, kwa nza ŋkɛ Sefəa Shala ya kakaganda le ghəa ŋkɛ.

⁷Ka negha fete ya shɛ mahekene tsagha gɛ:

⁸Sefəa Shala, yɛmə ba'a mimi. Nahe ghena ta wəshi nyi mahekene nyi kenza kanya kwetɛŋe.

⁹Kayɛ negha fete ta mbeli gheɓəmə, ama negha fete ta Shala ya kwele ma. Kwa nza ŋkɛ wa nya negha fete ta Shala nya: nahe ŋkɛ keneghate fete yitea Wəzege ta ŋkɛ.

¹⁰Ma wəndə nya keyɛ Wəzege ta Shala ne, negha fetea shɛ ya kwa wənəa ŋkɛ. Ma wəndə nya keyɛma Shala ne, Shala yave ŋkɛ kande tseŋwə, va nya yɛma fete nya neghate Shala yitea Wəzege ta ŋkɛ ŋkɛ.

¹¹Wa nya negha fetea shɛ nya: nahe Shala kendeke ɓəmə mpi nya kaghala ghala, nahe mpia shɛ kenza mbe Wəzege ta ŋkɛ.

¹²Ma wəndə nya keyɛ Wəzege ne, mpia shɛ ya ve. Ma wəndə nya keyɛma Wəzege ta Shala ne, mpi shɛ ve we.

¹³Kezha ɗepe yɛ mpi nya kaghala ghala ya va gheyɛ rafete ŋayɛ ghena nya 'ya, gheyɛ mbeli nyi keyɛ Wəzege ta Shala.

¹⁴Vatse ɗema gheɓəmə kagezleŋe ghə kwa kema ta Shala, kwa nza ŋkɛ kafa səkwə ta ɓəmə ŋkɛ vəa ŋkwa nya 'yɛwe wəsə gheɓəmə ve kala ɗe ta ŋkɛ.

¹⁵Nahe mə keɗepe kafa səkwə ta ɓəmə ŋkɛ, nahe gheɓəmə keɗepe nahe gheɓəmə kekemave wəsə nya 'yɛwe gheɓəmə ve.

¹⁶Ma kenakɛ menənyɛ wəndə kamene jaɗafa nya keɗema kakele ŋkwa kalə sha mte ne, səkwə ghə ŋkɛ, kateve nda mpi Shala ke wəndəa shɛ keɗema jaɗafa nya menete ŋkɛ kakele ŋkwa kalə sha mte. Ama jaɗafa nya kekele ŋkwa kalə sha mte ya shɛ, kenza kezha jaɗafa nyagha kala nya geze 'ya kasəkwə ghə mbeli we.

¹⁷Nahe yayata wəsə kwa ndiremi kenza kajaɗafa, ama kakele ŋkwa yayata jaɗafa kalə sha mte we.

¹⁸Nahe gheɓəmə keɗepe kaɗema yayata wəzege ta Shala kazhɛne kamene jaɗafa, kwa nza ŋkɛ kaya ŋkɛ Wəzege ta Shala, kapesle Nde ndiremia mehele yite we.

¹⁹Nahe gheɓəmə keɗepe mbelia Shala gheɓəmə. Ama nahe pɛtɛa mbeli nyi te hɛɗi lema kenza mbe berete ta Nde ndiremia mehele.

²⁰Nahe mə keɗepe nahe Wəzege ta Shala kese. Nahe ŋkɛ kendeke ɓəmə mehele kezha ɗepe Shala nya kaganda. Nahe gheɓəmə kenza jikə Shala nya kaganda laka Wəzege ta ŋkɛ Yɛsə Kriste. Gheŋkɛ ya kaShala kaganda, gheŋkɛ ya kampi nya kaghala ghala.

²¹Ŋwalea ɗa, ya mə ghəa ŋayɛ va wəshi nyi zhɛrete mbeli kashala.