Read kapsiki Ka Meha ghwə 11 Bible Online

Ka Meha ghwə 11 - kapsiki bible

Ka Meha ghwə 11

¹Zhɛftɛ nde Gala'ad, kameyidala kempa nya ghyana ŋkɛ, wəzege ta male kwa tahe ŋkɛ, wəndə nya heka mbeli kaGala'ad nde yake ŋkɛ.

²Male ta Gala'ad perə ne, na keyake nda ŋwale tezhili. Ma kwa kele hɛ jama jama ne, pa ŋwalea malea shɛ ŋkamte Zhɛftɛ, ma ke hɛ: «Wəzege ta kwete na male. Tsetse nde ne, ŋa ŋa hwa wəshi kezeme ghɛa yiteyɛ ɓəmə we.»

³Pa Zhɛftɛ hwɛnyɛ cakeɗake le ka kesaka yitenyɛ kantishɛnyɛ te hɛɗia Tob. Pa ka mefətekwə tsenete geva yite ba'a zelete ŋkɛ kadzemte yɛ mpa.

⁴Temə vireɗi kwa sebe ta ŋkɛ ne, pa ka Amon kamene mpa le ka Israyɛl.

⁵Ma kwa ghate mpa hɛ ne, pa mbelia jama nyi mbe Gala'ad lə kazele Zhɛftɛ te hɛɗia Tob.

⁶Ma ke hɛ shɛ: «Nde nda nza na kameghea n'yɛ kampa mə le ka Amon.»

⁷Ama pa Zhɛftɛ zhɛnete nda ke hɛ: «Dewə ghəa ŋayɛ te 'ya, pa yɛ ŋkamte ɗa shave ki ghɛa yiteyɛ ɗa ne, wa raberə nda se yɛ kazele ɗa tsetsenya va nya nza yɛ te yaka wa?»

⁸Ma ke mbelia jama zhɛnete nda: «Yawa, ma se ta n'yɛ sha gha tsetsenya ne, kezha se na kampa mə le ka Amon. Kaɗe ghen'yɛ kanza na kameghea n'yɛ ba'a kaŋa mbeli nyi te hɛɗia Gala'ad pɛtɛ.»

⁹Pa Zhɛftɛ zhɛnete nda ke hɛ: «Ma kekelete ɗa yɛ kalə mə kampa le ka Amon ne, ma kendeke ɗa hərə ŋkwa Mahwətə ne, kameghea ŋayɛ tenza 'ya.»

¹⁰Ma ke mbelia jama nyi mbe Gala'ad sha Zhɛftɛ: «Mahwətə nde negha fete ta n'yɛ: ghen'yɛ kameɗe ŋa kamene ŋa wəsə nya gezete na.»

¹¹Cape Zhɛftɛ le mbelia jama nyi te hɛɗia Gala'ad. Pa mbeli kelete ŋkɛ kawəndə nya te ghə ba'a veyi ŋkɛ kawəndə nya te ghəa ka sewajɛ. Ma pelɛ Mispa, te kema ta Mahwətə, pa Zhɛftɛ zhɛneyite ghwelə yitea pɛtɛa ghena nyi tsahwe ŋkɛ le mbelia jama.

¹²Pa Zhɛftɛ ghwenakɛ mɛ kageze nda ke meghea ka Amon: «Wa wəsə nya kwelɛ gheɓə le gha nda se na le mpa kadzete hɛɗia n'yɛ wa?»

¹³Ma ke meghea ka Amon zhɛnete nda: «Ma kwa shave ka Israyɛl mbe Ɛzhipte ne, nahe hɛ kekelehwe hɛɗia ɗa, slə kwa zlərəa Arnon hwa'a li hələa Yabok ba'a hwa'a li hələa Zhəwrdɛŋe. Zhɛnave ɗa hɛɗia shɛ tsetsenya nda menete nza kwelɛŋe mə.»

¹⁴Pa Zhɛftɛ ghwenakɛ nda mɛ zhɛkwa ke meghea ka Amon

¹⁵kezha geze nda ghena nya kese ve: «Ewə, kekelehwe hɛɗia ka Mowab le ŋa ka Amon ka Israyɛl we.

¹⁶Kwa nza ŋkɛ, ma kwa slə hɛ mbe Ɛzhipte ne, dzeghwa hɛ dzeghwa hɛ te ɓerama hwa'a mɛ ndərə kwa Ghɛmɛ nda ntsehe hɛ kwa Kadɛs.

¹⁷Slə tagha ghwenakɛ nda mɛ hɛ ke meghea ka Ɛdom. Pa 'yɛwakɛ hweŋkwa kezha jivenji hɛ te hɛɗia ŋkɛ. Ama pa meghea ka Ɛdom ɗema. Pa ka Israyɛl 'yɛwete tsagha shɛ va meghea ka Mowab, pa ɗema perə. Pa hɛ ntishɛnji kwa Kadɛs.

¹⁸Cape hɛ kadzeghwa te ɓerama shanda. Pa hɛ dzeyinji yitea hɛɗia ka Ɛdom le ŋa ka Mowab, hwa'a hɛ laka ŋkwa kesame ta veci sha Mowab. Pa hɛ baŋeyi cɛ lekwesa ta nci pelɛ kema ta hələa Arnon, kese hɛ kadzembe hɛɗia Mowab we, kwa nza ŋkɛ Arnon ya kaghala ta hɛɗia shɛ.

¹⁹Tagha, pa ka Israyɛl ghwenakɛ nda mɛ ke Sihon, meghea ka Amor nya kemene meghe te Hɛshebon. Ma ke hɛ shɛ: Pelakɛ n'yɛ jive n'yɛ ghen'yɛ te hɛɗia ŋa kadzete hɛɗi nya ketenza kaŋa n'yɛ.

²⁰Ama kendeke nda hweŋkwa Sihon ke hɛ we. Pa ŋkɛ tsenete ka sewajɛa ŋkɛ, menete ghedəkwəa ŋkɛ mbe Yahas ba'a have nda mpa ke hɛ.

²¹Pa Shala Mahwətə ta ka Israyɛl ndeke nda Sihon le yɛ ka sewajɛa ŋkɛ pɛtɛ ke ka Israyɛl, pa hɛ hərəte hɛ. Nda se ka Israyɛl kazehwe hɛɗia ka Amor pɛtɛ,

²²same kwa hələa Arnon hwa'a kwa hələa Yabok, se te ɓerama hwa'a kwa Zhəwrdɛŋe.

²³Shala Mahwətə ta ka Israyɛl nde ŋkamte ka Amor te kema ta n'yɛ, ghen'yɛ mbelia ŋkɛ. Tsetsenya ne, gha ɗe kaŋka n'yɛ na?

²⁴Te hɛɗi nya ndeke ŋa shala ta ŋa Kemosh na. Va wa shɛma ghen'yɛ sleke nya ndeke n'yɛ Shala Mahwətə ta n'yɛ wa?

²⁵Ma zəzə na ne, berete ma na ke Balak, wəzege ta Sipor, meghea ka Mowab na? Ma gheŋkɛ ne, keghwezakɛ mɛ ŋkɛ hwa ka Israyɛl we, kendeke nda mpa ŋkɛ ke hɛ we.

²⁶Va gwəmsə mahekene ka Israyɛl le nza te hɛɗia Hɛshebon, kwa Arowɛr le yɛ ŋkwa nyi dzeyi yite. Mbe meleme nyi dzeyi mɛa hələa Arnon hɛ perə. Va wa ɗema yɛ kekelehwe hɛɗia shɛ mbe nyighɛ vəa shɛ wa?

²⁷Ma 'ya ne, kamene ŋa wəsə kwa ndiremi 'ya ya kwetɛŋe we, ma nda gha nde mene ɗa kwa ndiremi kandeke ɗa mpa ne, Mahwətə nde ɗepe ghena ta wəndə ŋelɛ, pa mehate ghwə ta ŋkɛ kwelɛ yɛ ka Israyɛl le ka Amon.»

²⁸Ama kese meghea ka Amon kafa ghena nyi se Zhɛftɛ kageze nda we.

²⁹Pa Sefəa Mahwətə keseve Zhɛftɛ. Cape kadzeyi mbe hɛɗia Gala'ad le ŋa ka Manasɛ. Se tagha kadzawa Mispa te hɛɗia Gala'ad, tagha slə ŋkɛ kadzete hɛɗia ka Amon.

³⁰Wa nya kala nya meɗe mɛ nya meɗeyi nda ŋkɛ ke Mahwətə nya: «Ma kenza nde nahe na kendeke ɗa ka Amon kaganda ne,

³¹ma wəndə kwa ghate nya keshave ki ghɛa ɗa kabegeme le 'ya ne, ŋa ŋa nza ŋkɛ. Kese ɗa 'ya kwamte mpa le ka Amon kwa hərəte hɛ 'ya, kateve ŋa wəndəa shɛ 'ya kawəsə kedzeghe melɛ kwa tere tere.»

³²Pa Zhɛftɛ zlakemte ghala ta ka Amon kalə kampa le hɛ, pa Mahwətə ndeke nda ka Amon mbeyitere berete ta ŋkɛ.

³³Pa Zhɛftɛ fəhwe meleme bakemsə nyi kwelɛ yɛ Arowɛr le ŋkwa nyi dzeyi yitea Minit, pa ɗate ka Amon hwa'a mbe Abɛl-Keramim. Dewə berete nya wəba ŋkɛ te hɛ. Ma kwa sebe ta ŋkɛ ne, mbeyitere berete ta ka Israyɛl hɛ.

³⁴Ma kwa se Zhɛftɛ sha ghɛa ŋkɛ pelɛ Mispa, wəzha ta ŋkɛ nde se kabegeme le, kawetse nde yitea vɛ ta tereme. Deke wəzha shɛ ya ve nahe kwete wəzege ve we.

³⁵Ma kwa nakɛ Zhɛftɛ ne, pa ŋkwahemte lekwesa ta ŋkɛ, kwa nza ŋkɛ mba mehele ve we. Ma ke: «Aya! Wəzha ta ɗa, tewəmbəreke gha ɗema mehele va 'ya! Gha ya kawəsə nya keve ɗa yaka nya na! Nahe 'ya kemeɗeyi nda meɗe mɛ kwa gezhi gezhi ke Mahwətə, kashɛ 'ya dzeyi te sebe we.»

³⁶Ma ke wəzha ta ŋkɛ zhɛnete nda: «Ya gha menete nda meɗe mɛ na ke Mahwətə ne, menete wəsə nya meɗeyi nda na le 'ya, kwa nza ŋkɛ nahe Mahwətə kepelave hweŋkwa kezha wa dewa te ka ghema ta ŋa nyi kaka Amon.»

³⁷Ma ke sha yitenyɛ ɓiyitsa: «Slave ɗa və katere bake. Katedzeme yɛ ghweme 'ya le ka mcɛhɛ ɗa kezha nehwene va nya nza 'ya katemte kaɗema kewəmeve za.»

³⁸Pa Zhɛftɛ ndeke nda hweŋkwa kalə katere bake. Cape nde le ka mcɛhɛ nda kadzeme ghəa wəmbə, kanehwene nde va nya nza nde katemte kaɗema kewəmeve za.

³⁹Ma te kwa keɗaŋe ta tere kwa bake ne, pa ŋkɛ se kadzeki ghɛa yitenyɛ. Pa ŋkɛ menete nda wəsə nya meɗeyi ŋkɛ le. Kegha kase le za we. Se mɛa vəa shɛ, na kwete wəsə keshi kese kadzembe ka Israyɛl:

⁴⁰keva keva, lə mia ka Israyɛl kanehwene wəzha ta Zhɛftɛ kahɛ wəfaɗe, laka hɛɗia Gala'ad.