Read kapsiki Ka Meha ghwə 12 Bible Online

Ka Meha ghwə 12 - kapsiki bible

Ka Meha ghwə 12

¹Pa mbelia Ɛfrayim tsenete geva, jivenji te hələa Zhəwrdɛŋe ba'a dzembenji mbe Safon. Ma ke hɛ sha Zhɛftɛ: «Pa na lə ŋa kampa le ka Amon kaɗema heka n'yɛ. Wa raberə wa? Ghen'yɛ kandə ghɛa ŋa le gha.»

²Ma ke Zhɛftɛ sha hɛ: «Mbelia ɗa le 'ya perə ne, ghena nya dzawe yakemave ghen'yɛ va ka Amon. Nahe 'ya kese kaheka ŋayɛ, ama kese yɛ kambele ɗa va hɛ we.

³Ma kwa nakɛ 'ya keɗema yɛ kese kambele ɗa ne, mbasa mpia ɗa keza. Ntəŋə 'ya kampa le ka Amon, pa Mahwətə veyi hɛ mbeyitere berete ta ɗa. Tsetsenya, gheyɛ se kampa le 'ya. Tewəmbəreke wa?»

⁴Pa Zhɛftɛ tsenete mbeli nyi mbe Gala'ad. Pa ŋkɛ ndeke nda mpa ke ka Ɛfrayim, pa hərəte hɛ. Ma ke mbelia Ɛfrayim: «Gheyɛ mbeli nyi mbe Gala'ad ne, ka Ɛfrayim nyi kehwɛnji yɛ. Nahe yɛ keɗema hwelefe ta Ɛfrayim le ŋa Manasɛ.»

⁵Ma kwa sebe ta ŋkɛ ne, pa mbeli nyi te hɛɗia Gala'ad fɛake hweŋkwa kedzawa Zhəwrdɛŋe, kezha fɛa nda hweŋkwa ke ka Ɛfrayim. Te yayata və se wəndə nya kehwɛ kezha jive ne, ma ke mbeli sha 'yɛwe ve: «Nde Ɛfrayim na na?» Ma «Ewə» kezhɛnete ŋkɛ ne,

⁶pa mbeli geze nda kezha geze «Shibolɛt» ŋkɛ. «Sibolɛt!», a wəndəa shɛ gezete va nya ɗema ŋkɛ kahekate wəsəa shɛ megela. Tagha gɛ, pa mbeli keseve ŋkɛ ba'a peslekɛ ŋkɛ mɛa hweŋkwa ta Zhəwrdɛŋe. Ma te vəa shɛ ne, zhili 42.000 ka Ɛfrayim nyi mpəmte hɛ.

⁷Zhɛftɛ nde Gala'ad kenza kande meha ghwə te ghəa mbelia ka Israyɛl kava ŋkwaŋe. Pa mtenyɛ, pa mbeli lamte ŋkɛ mbe kwete hwa meleme nyi mbe Gala'ad.

⁸Kwa sebe ta Zhɛftɛ, Ibsan nde Bɛtelɛhɛm nde meha ghwə ta ka Israyɛl.

⁹Mahekenemsə ŋwale tezhili mahekenemsə ŋwalea kwɛ ve. Mbe ve nda ŋwalea kwɛa ŋkɛ ŋkɛ ke mbeli nyi keɗema kahwelefe ta ŋkɛ. Nyi kazhili ɓiyitsa ne, kakele mi hɛ se hwa kweci hwelefefi tekeleke. Kande meha ghwə ta ka Israyɛl ŋkɛ kava mberefaŋe.

¹⁰Pa mtenyɛ, pa mbeli lamte ŋkɛ kwa Bɛtelɛhɛm.

¹¹Kwa sebe ta Ibsan, Ɛlon hwelefe ta Zabəlon, ya kande meha ghwə te ghəa ka Israyɛl kava meŋe.

¹²Pa Ɛlon mtenyɛ, pa mbeli lamte ŋkɛ mbe Ayalon te hɛɗia Zabəlon.

¹³Kwa sebe ta Ɛlon, Abdon, wəzege ta Hilɛl mbe meleme ta Piraton ya kande meha ghwə te ghəa ka Israyɛl.

¹⁴Ŋwale wəfaɗemsə ve, mahekenemsə ka shihɛnyɛ nyi kedzeghwa te kwara lɛmə mberefaŋemsə. Abdon ya kande meha ghwə te ghəa ka Israyɛl kava deghese.

¹⁵Ca, mtiwə ŋkɛ, pa mbeli lamte ŋkɛ mbe Piraton te hɛɗia Ɛfrayim, pelɛ ghweme ta Amalɛk.