Read kapsiki Ka Meha ghwə 14 Bible Online

Ka Meha ghwə 14 - kapsiki bible

Ka Meha ghwə 14

¹Pa Samson dzawa Timna, pa nakɛ kwete wəzha makwa nya ɗe ŋkɛ hwa ŋwalea kwɛa ka Filisti.

²Ma kwa se ŋkɛ ne, pa gezete nda ke mbeli nyi keyake: «Nahe 'ya kenakɛ kwete wəzha makwa kwa Timna, kaɗe 'ya kadzawa yɛ ka'yɛwe ɗa.»

³Ma ke mbeli nyi keyake shɛ: «Gha ndɛare va wəzha makwa kwa yita ta ŋa ba'a mbe hwelefe ta ŋa, nda lə na kanta hwa ka Filisti nyi kaka slamtema mɓɛta na?» Ma ke Samson sha yitenyɛ: «Ghenta yaɗe 'ya, kwiɗi ka'yɛwe kawəme ɗa.»

⁴Yɛ yitenyɛ le meghekɛ ne, keɗepe hɛ Mahwətə le ghəa ŋkɛ nde veyi zəzəa shɛ mbe Samson we, kwa nza ŋkɛ kazele hweŋkwa keghəpə le ka Filisti. Kwa nza ŋkɛ vəa kwa shɛ, ka Filisti ka sleke ka Israyɛl.

⁵Pa yɛ Samson le mbeli nyi keyake ŋkɛ slə kadzembe Timna. Ma hwa'a hɛ mbe wəvea rɛzɛŋe takwa takwa yitea ŋkwa shɛ, pɛkwe nivɛrə nya kawəzege se le ghwəghwə kabegeme le.

⁶Pa Sefəa Mahwətə dzembenyɛ mbe Samson, le dzeve pala pala, pa slekwemte nivɛrə kala wəsə nya nza ŋkɛ kazhɛfa gəmə. Kese kancɛ nda wəsə nya menete ŋkɛ ke mbeli nyi keyake we.

⁷Ntəŋə yitea dzeghwa ta ŋkɛ kadzawa kagezete nda ke wəzha ta ka Filistia shɛ, kwele kwele zlama nde te.

⁸Ma kwa sebe ta hɛ ɓɛhwɛ, cape kadzawa Timna kezha wəme male. Kwa hweŋkwa ŋkɛ, pa dzawanyɛ hwa gamba kezha newe mahwama ta nivɛrə. Pa nakɛ mze le yɛmə mbe, mbe mahwama ta nivɛrəa shɛ.

⁹Pa ŋkɛ taweve yɛməa mze te hwə dzeve ta ŋkɛ ba'a zehwe ŋkɛ vəa ŋkwa nya dzeghwa ŋkɛ kase sha ghɛ. Pa kekave mbeli nyi keyake pa ŋkɛ ndeke nda ke hɛ kazeme, ama kese kageze nda ke mbeli nyi keyake mbe mahwama ta nivɛrə mtseke 'ya ke we.

¹⁰Pa yitenyɛa Samson lə sha wəzha ta ka Filisti. Pa Samson menete veghe kwele kwele, kala nya seneve ka mempɛhwetɛti kamene hwa makwa.

¹¹Ma kwa nakɛ ka Filisti ne, pa hɛ tsehave ka mempɛhwetɛti mahekenemsə kezha nza hɛ le.

¹²Ma ke Samson sha hɛ: «'Ya kategeze ŋayɛ kwete ghena nya mbe ghena. Ma keɗepete yɛ ne, kave ŋayɛ karalame 'ya mahekenemsə, ɓiyitsa, mahekenemsə tɛagware. Ma nda nza yɛ kakemave ne, pa yɛ ɗepete ghena nya mbe ghena mpelɛa ma ke kwa mberefaŋe ta hɛa veghe ta makwa.

¹³Ma keshaŋe yɛ va zhɛnete ɗa, gheyɛ katefə ɗa karalame mahekenemsə ba'a tɛagware mahekenemsə.» Ma ke ka Filisti sha Samson: «Gezete ghena ta ŋa nya mbe ghena shɛ, kafa ghen'yɛ.»

¹⁴Ma ke sha hɛ: «Ma wəsə kezeme ne, mbe wəndə nya kezeme shave ŋkɛ. Ma wəsə nya zeɗe ne, mbe wəndə nya berete shave ŋkɛ. Wa slə ŋkɛ wa?» Kwetere wəmbəa hɛ mahekene ne, kekemave zhɛne ta ŋkɛ Ka Filisti we.

¹⁵Ma te kwa mberefaŋe ta hɛ ne, ma ke hɛ sha male ta Samson: «Geze nda ghena zeɗe ke za ŋa baŋe ŋkɛ kancɛte n'yɛ ghena nya mbe ghena ta ŋkɛ, keɗema ŋkɛ kala nyagha ne, pɛtɛ teteremte ŋayɛ n'yɛ le mbelia ŋa. Kezha fəmte pɛtɛa wəshi yitea ghen'yɛ nda hekakɛ n'yɛ yɛ na?»

¹⁶Ntake male ta Samson kanehwene ghəa nta, ma ke: «Kaɗe ɗa na we, ghena ta ɗa yanewe na! Pa na gezete nda ghena nya mbe ghena ke ka kesaka meyɛ ɗa, kese na kancɛ ɗa we.» Ma ke Samson shɛ: «Kese 'ya kancɛ nda ke yayata wəndə we: ya ke yiteyɛ ɗa, ya ke meyɛ ɗa we. Pa 'ya ncɛte ŋa ke gha gɛ na?»

¹⁷Nehwene yanehwene ghəa nta male ta Samson mbe hɛa makwa nyi mberefaŋe nyi. Te kwa mberefaŋe ta hɛ, pa Samson ncɛte nda ghena nya mbe ghena shɛ, kwa nza nde kaghwəyi nda ghə le nehwene ta nta. Pa ncɛte nda ke ka kesaka meghekɛ taghanyɛ.

¹⁸Te kwa mberefaŋe ta hɛ takwa veci kapəkwə, pa hɛ se kagezete nda ke Samson: «Wa zeɗe ma ke mze wa? Wa ya berete ma ke nivɛrə wa?» Ma ke sha hɛ: «Ma keɗema yɛ kewəzate wəza le mbəkwəa ɗa ne, nza kakemave zhɛne ta ŋkɛ yɛ we.»

¹⁹Pa Sefəa Mahwətə dzembenyɛ mbe Samson, pa dzawanyɛ kwa Askalon. Pa ŋkɛ mpəmte zhili mahekenemsə kwagha ba'a fəte yɛ lekwesa ta nci. Pa ŋkɛ fəave nda hɛ kalekwesa gəsəkə ke mbeli nyi kekemave zhɛne ta ghena nya mbe ghena shɛ. Kwele kwele hwepenyɛ wənəa ŋkɛ, pa zhɛneke geva kase sha yitenyɛ.

²⁰Pa mbeli ndeke nda male ta Samson ke dagwa slerepe nya kamcɛnyɛ.