Read kapsiki Ka Meha ghwə 15 Bible Online

Ka Meha ghwə 15 - kapsiki bible

Ka Meha ghwə 15

¹Ma kwa temə mbeli kwa sebe ta ŋkɛ, vəa ŋkwa nya tsa ha mbeli ne, pa Samson lə kanewe male ta ŋkɛ. Pa keleghe nda zhɛfa. Pa ŋkɛ 'yɛwete kezha dzembe cɛa male ta ŋkɛ. Ama kendeke nda hweŋkwa mekwea ŋkɛ kadzembe we.

²«Ma zəzə 'ya ne, mba na kaɗe ɓiyitsa we a 'ya, pa 'ya ndeke nda ke dagwa slerepe ta ŋa. Ashɛ ganyɛ ma səakəa nta ke ghenta wəka, na tsema newe na wa? Kelete te ŋkwa nta.»

³Ma ke Samson: «Ma tsetsenya gɛ, wəndə shɛ kaŋele ɗa yitea wəsə kwa ndiremi nya temene nda 'ya ke ka Filisti we.»

⁴Pa ŋkɛ lə kakeseve mbeyiga gwəmsə mahekene. Pa ŋkɛ jikəte hɛ bake bake ba'a hwepete sheghe ta nci, hwepeyi wəvəzə kwete kwete te sheghe shɛhɛ.

⁵Pa ŋkɛ ndəyi ghwə te wəvəzə nyi te sheghe shɛhɛ, waɗe ŋkɛ sha hɛ mbe wəvea ha ta ka Filisti, pa ndəyite ghwə yitea ghwɛpɛa ha, tsagha yitea yɛ rɛzɛŋe ba'a yɛ bekele.

⁶Ntake ka Filisti ka'yɛwe wəndə nya kemenete wəsəa shɛ, ma mbeli zhɛnete nda ke hɛ: «Samson, gheŋkɛ nde menete wəsəa shɛ va nya kelehwe male ta ŋkɛ mekwea ŋkɛ nya kande Timna ba'a nya ndeke nda ŋkɛ ke dagwa slerepe ta Samson.» Tagha gɛ, pa ka Filisti lə kateremte malea shɛ ba'a yite nda.

⁷Ma ke Samson sha hɛ: «Ma nda tsetse menete yɛ ne, katenza 'ya divə, keɗema 'ya ketewate dewa ta ɗa te gheyɛ we.»

⁸Pa ŋkɛ have nda mpa ke hɛ ba'a vate ɗa nya wəba te hɛ. Kwa sebe ta ŋkɛ, pa ŋkɛ lə kezha nza mbe zlera ta gela ta Ɛtam.

⁹Pa ka Filisti se kezha ve ghedəkwəa nci te hɛɗia Zhəwda, pa hɛ beteyi ka sewajɛa nci hwa'a te ŋkwa nya heka mbeli kaLɛhi.

¹⁰Pa ka Zhəwda 'yɛwe va hɛ: «Wa raberə nda se yɛ kampa le ghen'yɛ wa?» Pa hɛ zhɛnete nda ke hɛ: «Kezha kese Samson, shɛ ghen'yɛ menete nda kala nya menete n'yɛ ŋkɛ.»

¹¹3.000 ka Zhəwda slə kadzemɛa zlera mbe keleɓa Ɛtam. Ma ke hɛ sha Samson: «Nahe na keɗepe mbe dzeve ta ka Filisti mə. Kenakɛ fete nya keleke ɓəmə na na tseyi!» Ma ke Samson: «'Ya menete nda ke hɛ kala nya menete ɗa hɛ.»

¹²Ma ke hɛ shɛ: «Ghen'yɛ se kakese ŋa kezha ve nda ŋa ke ka Filisti.» Ma ke Samson: «Zemete ɗa mə fela keɗema yɛ katepesle ɗa le ghəa ŋayɛ.»

¹³Ma ke hɛ shɛ: «Kezəzəte pesle ŋa ghen'yɛ we. Ma nya ɗe ghen'yɛ nahe ne, hwepe ŋa ba'a ve nda ŋa ke hɛ.» Pa hɛ hwepete ŋkɛ le zewe kwatenegha bake ba'a kelakave ŋkɛ mbe zlera.

¹⁴Ma kwa ntsehe hɛ mbe Lɛhi ne, pɛkwe ka Filisti le kaka kala wəsə nyi kehərəte ŋkwa kabegeme le hɛ. Pa Sefəa Mahwətə dzembe Samson: ma zewe nyi hwepete mbeli le kwa dzeve ne, pa hɛ nenɛɗinji kala pawa nya teremte ghwə.

¹⁵Pa Samson ntsate ghweleme ta kwara nya kwatemte, pa kelete kalə kampəmte zhili slibə le.

¹⁶Ma ke Samson: «Le ghweleme ta kwara ne, nahe 'ya kempəmte zhili slibə, le ghweleme ta kwara mpəyi mbeli 'ya selekə lekə.»

¹⁷Ma kwa sebe ta ŋkɛ ne, pa neghamte 'yɛ'yɛa ghweleme ta kwara cakeɗake le. Vatse heka ŋkwa shɛ mbeli kaRamat-Lɛhi, geze ta ŋkɛ “wəmbəa 'yɛ'yɛa ghweleme”.

¹⁸Shewə Samson va ndere kwele kwele, pa səkwəte Mahwətə ma ke: «A Shala, gha nde ndeke ɗa hərə ŋkwa nya wəba nya. Ma tsetsenya tse gɛ ne, 'ya kamte va ndere kateɗe mbe dzeve ta ka slama mɓɛta na?»

¹⁹Pa Shala perawemte keleɓa nya mbe Lɛhi, mpəɗə yɛmə shave mbe. Pa Samson sakɛ, pa kemave berete ta ŋkɛ zhɛkwa. Pa mbeli hekate nda slə ke ghwa shɛ “kaɗaslea Korɛ”, mba hələa shɛ pa ɓeshi kwa Lɛhi.

²⁰Samson ya kande meha ghwə mbe ka Israyɛl te vəa ka Filisti kava bakemsə.