Read kapsiki Ka Meha ghwə 16 Bible Online

Ka Meha ghwə 16 - kapsiki bible

Ka Meha ghwə 16

¹Pa Samson dzawa Gaza. Pa hɛ begeme le kwete male kwa tahe, pa ɓelahehwe ɓelahe le.

²Pa mbeli nyi mbe melemea shɛ fate tagha Samson ke mbeli. Pa hɛ ŋsleyi nda ghweɓe pelɛke mɛa meleme kahɛ, divə hɛ kaneghe kahɛ kezha pesle masheke.

³Ama ɓelahe Samson ɓelahenyɛ pa te tepe ta viɗi. Ma te tepe ta viɗi ne, pa sate te ŋkwa ba'a nteɗemte yɛ sheghwəa gelembe nya mɛa meleme, tsagha sheghwə nyi dzeme vare gelembe ba'a wəsə keŋzle nya le sheghwə. Pa ŋkɛ beteyi hɛ kwelɛ welɛ ba'a fəghe hɛ kadzeme ghəa ghweme nya kwa kema ta Hɛbron.

⁴Ma kwa sebe ta wəsəa shɛ ne, pa Samson ɗehwe kwete male nya nza sləa nta kaDalila kwa zlərəa Sorɛk.

⁵Pa mbeli nyi te ghəa ka Filisti mcɛfe se sha Dalila, ma ke hɛ shɛ: «Deneve 'yɛwe ŋkwa nya se berete ta ŋkɛ te va Samson ba'a tsema tsema nza ghen'yɛ kakeseve ŋkɛ ba'a kahwepete ŋkɛ kezha mene wəsə nya ɗe n'yɛ le. Yayata wəndəa n'yɛ kave ŋa dəɓərəa mze kwa tɛawetɛa 1.100.»

⁶Tagha gɛ, ma ke Dalila 'yɛwete va Samson: «Tehwə tehwə ŋa 'ya gezete, tema se berete ta ŋa nya wəba nya wa? Le wa nza mbeli kahwepete ŋa nda ɗema na shɛ mbele kamene nya ɗe wəndə le gha wa?»

⁷Ma ke Samson shɛ: «Ma kehwepete ɗa mbeli le tsenea rəgi kwatenta mberefaŋe, kala yayata wəndə pɛtɛ tenza 'ya kaɗema berete mbe.»

⁸Pa ka meghea ka Filisti fəke nda tsenea rəgi kwatenta mberefaŋe, nyi kenakama kaghwele, pa Dalila hwepete Samson le.

⁹Nahe nde kewəfərəakɛ mbeli ki ghɛ ki ghɛ. Kɛake sha lewela taghanyɛ: «Samson, nyi ka Filisti nyi kənəa gha kaɗa ŋa!» Pa Samson ŋslemte tsene kala nya naɗe pawa va ghwə. Tsetse ne, keɗepe zeweve ta berete ta ŋkɛa shɛ mbeli we.

¹⁰Ma ke Dalila sha Samson: «'Ya yaghwetete na ba'a yaslate ɗa tseŋwə na. Ncɛte ɗa tsetsenya tsema tsema nza mbeli kahwepete ŋa.»

¹¹Ma ke Samson shɛ: «Ma kehwepete ɗa mbeli le zewe nya sema mbeli kamene slene le ne, dewə nza berete ta ɗa kala mbeli pɛtɛ.»

¹²Pa Dalila kelete zewe kwatenegha kahwepete Samson le, ma ke shɛ: «Samson, nyi ka Filisti nyi kese kaɗa ŋa!» Kwa nza ŋkɛ ne, ka Filisti ya tewəfərə tagha mbe cɛ. Pa Samson ŋslemte zewe kala pawa kwa leme leme.

¹³Ma ke Dalila sha Samson: «Pa tsetsenya, mba na kaghwete ɗa zhɛkwa kasla ɗa tseŋwə.» Ma ke shɛ: «Ma kehwehwepeyi yɛ ndere ta shintia ghəa ɗa nyi mberefaŋe na te tsayɛwa ketsa zlave ba'a kentsəte hɛ na le wəsə keslaɗe pawa ta nde tsa lekwesa ne, katenza dewə berete ma ke yayata wəndə.»

¹⁴Pa Dalila ghweteyi Samson yitea hɛ, nderete shintia ghəa ŋkɛ mberefaŋe, hwepeyi hɛ te wəsə ketsa zlave ba'a ntsəte hɛ le tetərəa nta. Kwa sebe ta ŋkɛ, ma ke Dalila shɛ: «Samson, nyi ka Filisti nyi kese kaɗa ŋa!» Feɗeghe Samson kanteɗemte tsayɛwa le yɛ pawa kwa berete.

¹⁵Ma ke Dalila shɛ: «Tsema geze na kaɗe ɗa, kaɗema na keveyi ghə le 'ya wa? Kwa mahekene ta zhigə nya kasla ɗa tseŋwə na kaɗema ncɛ ɗa tema tema se berete ta ŋa nya wəba nya wa!»

¹⁶Ma kwa nza nde mba kageze nda ghena nya kwetɛŋe ke Samson ne, tene ŋkɛ kala wəsə kemte mte va leɓe ta ghena shɛ, shaŋe kazereghe.

¹⁷Pa nde ncɛmte nda zeweve yitea berete ta ŋkɛ nya tewəfərə, ma ke shɛ: «Kegha mbeli kaŋsəmte shintia ghəa ɗa we, kwa nza ŋkɛ na mbeli keveyi ɗa kaŋa Shala tewə 'ya keya. Ma keŋsəmte ghəa ɗa mbeli ne, kanza berete mbe 'ya we, kala mbeli pɛtɛ nza 'ya.»

¹⁸Nahe Dalila keɗepe nahe Samson kepelave nda zəzə ta wənəa ŋkɛ, ma ke lə kageze nda ke ka Filisti: «Ma tsetsenya gɛ ne, wərə yɛ kase, kwa nza ŋkɛ na Samson kencɛte ɗa zəzə ta ŋkɛ nya tewəfərə.» Pa hɛ se shɛ le dəɓərə nya meɗeyi nda mbeli.

¹⁹Pa Dalila ghweteyi Samson yitea hɛ kwa seɗa ta nta ba'a hekakɛ za nya keslamte yɛ ndere ta shintia ŋkɛ nyi mberefaŋe.

²⁰Ma ke shɛ: «Samson, wa nyi ka Filisti nyi kese kaha ŋa mpa!» Pa ŋkɛ feɗeghe, ma ke mbe ghəa ŋkɛ: «Kateya ghəa ɗa 'ya kala nyi ghalanza ba'a katembele ghəa ɗa 'ya.» Keɗepe ŋkɛ nahe Mahwətə kekelemte kemane ta ŋkɛ seyi kənə we.

²¹Pa ka Filisti keseve ŋkɛ ba'a ntsamte ntsə yɛ ntsə ta ŋkɛ. Pa hɛ keleghe ŋkɛ kadzawa Gaza, tseyi kwa yɛ zewe lɛa mze kwa ghwə ghwə ba'a ŋkate le berete kahə ha kwa daŋgayɛ.

²²Ma tsagha ne, mbe pese shintia ŋkɛ ghala kwa ŋsəmte nda ghə mbeli.

²³Ma te kwete hɛ, pa mbeli nyi te ghəa ka Filisti tsenete geva kezha mene gəsəkəa hərə ŋkwa ta nci ba'a kezha dzeghe melɛ ke shala ta nci Dagon. Ma ke hɛ ghate cimə: «Nahe shala ta ɓəmə kesave ɓəmə mbe dzeve Samson, nde ghema ta ka Filisti.»

²⁴Ma kwa nakɛ Samson mbeli ne, ntake hɛ katsahe shala ta nci Dagon, ma ke hɛ sha geze: «Nahe Shala ta ɓəmə kekesambe ɓəmə Samson mbe dzeve nde ghema ta ka Filisti, nde za sebe te hwelefe ta ɓəmə nya kempə mbelia ɓəmə.»

²⁵Ma va farefa ta wənəa nci ne, ma ke hɛ: «Keleke mə Samson karaberə mə le!» Pa hɛ kelakame kwa daŋgayɛ, pa hɛ veyi kwelɛ tepe ta selə nyi mbe cɛ nya wəba.

²⁶Ma ke 'yɛwakɛ va wəzege nya kekese ŋkɛ te dzeve: «Begheyi ɗa vare selə nyi kekeseyi ghɛ shala nya kezha dɛŋame geva 'ya vare hɛ.»

²⁷Viɗi ghɛa shɛ va mbeli, zhili ba'a mi. Tagha mbeli nyi te ghəa ka Filisti nyi mcɛfe nyighɛ, gare 3.000 mbeli nyi tagha pelɛ ghəa ŋkwa kanewe raberəa Samson.

²⁸Ma ke Samson səkwəte Mahwətə: «Mahwətə, Shala ta ɗa, zəzəte ɗa! Ndeke ɗa berete zhɛkwa, deke nya nahe, Shala ta ɗa, kezha menete kwetɛŋe zhigə kawate ghəa ɗa te ka Filisti tewəmbəreke ntsə ta ɗa nyi ntsamte nyi hɛ.»

²⁹Tɛahe tɛahe Samson kwelɛ selə nyi bake nyighɛ nyi nza cɛ te. Dape dzeve kwa zeme te kwete, dape kwa gwela te kwete.

³⁰Kɛake sha lewela: «Mpə ghen'yɛ kanya kwetɛŋe le ka Filisti!» Pa ŋkɛ tsəkwəte hɛ le pɛtɛa berete ta ŋkɛ, ghwəpə ghɛa shala ŋzlanyɛ kənəa ka meghea kɛfia shɛhɛ ba'a pɛtɛa mbeli nyi mbe. Kwele kwele ma mbeli nyi kempə le Samson ke nyi mpəmte ŋkɛ vəa ŋkwa nya nza ŋkɛ teghweme.

³¹Pa ka kesaka meghekɛ le mbeli nyi kwa yita ta ŋkɛ se kakelete geva ta ŋkɛ kakeleghe, kalamte kwa kwele ta Manowa yitenyɛ, kwelɛ yɛ Sora le Ɛshetawol. Kande meha ghwə se Samson hwa ka Israyɛl kava bakemsə.