Read kapsiki Ka Meha ghwə 19 Bible Online

Ka Meha ghwə 19 - kapsiki bible

Ka Meha ghwə 19

¹Ma vəa ŋkwa shɛ ne, meghe mbe ka Israyɛl we, pa kwete nde Lɛvi talɛ kwetere ghweme nya te hɛɗia Ɛfrayim kelete male meghwa mbe Bɛtelɛhɛm te hɛɗia Zhəwda.

²Pa malea shɛ hwepete wənə va za nta, pa zhɛneghe geva sha ghɛa yitenyɛ mbe Bɛtelɛhɛm te hɛɗia Zhəwda, pa nde ntishɛ nda katere wəfaɗe.

³Pa za nta lə shɛ kezha tsewe lewela kazhɛne kase. Bake hɛ le nde mene slene ta ŋkɛ ba'a kwara bake. Pa male nyagha kemaneve hɛ kadzeki ghɛa yitenyɛ. Ma kwa nakɛ yitenyɛ ne, pa kemaneve hɛ le zlama.

⁴Pa mekwea ŋkɛ keseyi hɛ kahɛ mahekene ki ghɛa ŋkɛ. Pa hɛ zehwe wəsə kezeme ba'a sahwe wəsə kesa, hwencɛke hɛ.

⁵Te kwa wəfaɗe ta hɛ, pa hɛ feɗeghe masheke masheke, pa nde Lɛvi nyagha tseɓate wəshi kezha slə, ama ma ke mekwea ŋkɛ shɛ: «Zehwe wəsə kezha kemave berete yɛ kadzeghwa tsagha.»

⁶Ntishɛ mbeli nyighɛ kazeme wəsə ba'a kasa wəsə kanya kwetɛŋe. Ma ke mekwea ŋkɛ sha nde Lɛvi: «Zəzəte shɛ na hɛ ŋa teke, nda zlama wənəa ŋa.»

⁷Ma mbe hi geva wəndə nyagha kaslə, pa mekwea ŋkɛ mpiyi nda dzeve kwele kwele kezha hɛ ŋkɛ, pa hɛnyɛ tagha shɛ.

⁸Te kwa mcɛfe ta hɛ, feɗeghe ŋkɛ kahi geva kateslə, ama ma ke mekwea ŋkɛ gezete nda: «Tehwə tehwə ŋa 'ya, gweɗakwete veci nda slə yɛ kwa mtsa veci.» Pa hɛ kazeme wəsə bake pɛtɛ.

⁹Kahi geva wəndə nyagha kateslə le male ta ŋkɛ le nde mene slene ta ŋkɛ, ma ke yitenyɛa male shɛ: «Kenakɛ ŋkwa na hetɛhwɛɗi wə, viɗi ŋkwa, hɛ ŋayɛ mə. Hɛ ŋa teke nda zlama wənəa ŋa! Ma masheke ne, katekele hweŋkwa yɛ kalə sha ghɛa ŋa.»

¹⁰Ama kese wəndə nyagha kaɗe kahɛ we. Cape ŋkɛ kadzeghwanyɛ le male ta ŋkɛ ba'a le kwara ta ŋkɛ bake nyi veveyi serede ŋkɛ pelɛ hɛ. Pa hɛ ntsehe mbe kema ta Zhɛbəs, geze ta ŋkɛ Zhɛrəzalɛm.

¹¹Ma takwa takwa hɛ yitea Zhɛbəs ne, na veci kedene. Ma ke wəndə nya kemene nda slene ke wəndə nya kesleke: Hɛ ɓəmə mə teke mbe meleme ta ka Zhɛbəs nya!

¹²Ma ke wəndə nya ke sleke shɛ: kateghereŋe mə mbe meleme ta ka ɗepema Shala nyi we. Teke ne, nde Israyɛl shɛ ya kwetɛŋe we. Hende yahende geva mə kalə hwa'a mbe Gibɛya.

¹³Mbi ɓəmə, kakekave ɓəmə kwete hwa melemea shɛhɛ shɛ gheɓəmə hɛ ɓəmə mbe Gibɛya keɗema mbe Rama.

¹⁴Hendakɛ geva mə cakeɗake, pəkwə veci kwa nza hɛ takwa yitea Gibɛya te hɛɗia Bɛnjamɛn.

¹⁵Pa hɛ kelete hweŋkwa kedzeyi laka Gibɛya kezha hɛ tagha. Pa nde Lɛvi nyagha ntishɛnyɛ te lanehwene nya mbe meleme, ama wəndə shɛ kese kaheka kadzeki ghɛa ŋkɛ kahɛ we.

¹⁶Pɛkwe kwete meha za sheke kwamte wəza hetɛhwɛɗi. Wəndə nya pelɛ ghweme ta Ɛfrayim ŋkɛ nda nza ŋkɛ kwa Gibɛya le ghɛ, ma mbeli nyi te ŋkwa shɛ ne, ka Bɛnjamɛn hɛ pɛtɛ.

¹⁷Newe ke ne, pa ŋkɛ nakɛ wəndə nya kese yitea dzeghwa te lanehwene, ma ke shɛ: Tema lə na wa, tema se na?

¹⁸Ma ke shɛ: «Same kwa Bɛtelɛhɛm te hɛɗia Zhəwda ghen'yɛ, ghen'yɛ kadzete hɛɗi nya cakeɗa yitea ghweme ta Ɛfrayim. Tagha 'ya le nza, 'ya kazhɛre geva kalə sha ghɛa ɗa kwa sebe ta nya se 'ya kwa Bɛtelɛhɛm. Wəndə shɛ kehekaghe ɗa kadzeki ghɛa ŋkɛ we.

¹⁹Ndagwara gwəzə ya va ghen'yɛ kezha kwara ta n'yɛ. Ɗafa le tɛ ya va 'ya, tsagha kezha male ta ɗa le nde mene slene ta nya kebeghe nde mene slene ta ŋa. Wəsə shɛ kaɗema va ghen'yɛ we.»

²⁰Ma ke meha za shɛ: «Same le se, pɛtɛ temene ŋa wəsə nya keɗema va gha 'ya. Kehite geva ŋkɛ kahɛ na te lanehwene we!»

²¹Pa keleghe kadzeki ghɛa ŋkɛ kantave nda zhawa ke kwara. Pa ka se yitea dzeghwa pɛkɛ seɗa, kazehwe wəsə kezeme ba'a sahwe wəsə.

²²Ma mbe zlama hɛ ne, pa ka mefətekwə nyi mbe meleme se kantəsləte ghɛ, pa hɛ tsate ŋkwa le berete, ma ke hɛ sha meha za nya kawəndə ke ghɛ: Kelakave wəndə nya kedzeki ghɛa ŋa nya kezha ɓelahe ghen'yɛ le.

²³Pa wəndə ke ghɛ shave kageze nda ke hɛ: Ewə, ka kesaka ma, kasəkwə ŋayɛ 'ya, menema wəsə kwa ndiremi nya yɛ ma. Ma tsetsenya ne, mentiɓəa ɗa wəndə nya, menema wəsə gezhi nya yɛ ma!

²⁴Wəzha makwa ya va 'ya nya keghama le za, 'ya kave ŋayɛ kajive. Kele mə kamene kala nya nakɛ yɛ megela. Ama laka wəndə nya ne, menema nyagha yɛ mashiwəshi kala nya ma.

²⁵Keɗe mbelia shɛhɛ kafa we. Pa nde Lɛvi keseve male ta ŋkɛ ba'a kelakave nda ke hɛ te ŋwela, hwencɛke ncɛke hɛ kaɓelahe le kaberete, pa hɛ sərəakɛ ŋkɛ dzehwa hə ŋkwa.

²⁶Ma takwa ŋkwa kakiɗi ne, pa male se kateɗe nda mɛa degha ta wəndə nya nza za nta ki, mba tagha pa va masheke.

²⁷Sate za nta masheke, pa ŋkɛ pelemte degha kashave kezha slə yitea dzeghwa ta ŋkɛ, beraɓe male ta ŋkɛ tagha tereke dzeve mɛa mɛ degha.

²⁸Ma ke shɛ: «Sate ŋa, dzeghwa ɓə!» Ama zhɛne shɛ we. Tagha gɛ, pa ŋkɛ vate geva ta male ta ŋkɛ te kwara ta ŋkɛ, pa wəndəa shɛ kekave hɛɗia ŋkɛ.

²⁹Ma kwa ntsehe ŋkɛ ne, pa ŋkɛ kelete hwa ba'a slave geva ta male ta ŋkɛ meŋe bakeghəmbe mbe. Pa ŋkɛ ghweneghe nda zhɛzhi ke yayata hwelefe ta Israyɛl.

³⁰Ma ke yayata wəndə nya kenakɛ wəsəa shɛ gezete: «Kegha mbeli kanakɛ wəsə nya kala nya ghala shave ka Israyɛl mbe Ɛzhipte we!» Ma ke nde Lɛvi gezave nda ke mbeli nyi ghweneke n'yɛ ŋkɛ: «Ma pe yɛ sha ka Israyɛl: Nahe wəsə nya kala nya kegha menete geva ghala shave ŋwalea ka Israyɛl mbe Ɛzhipte pa te veci nya na? Zəzəve mə, 'yɛwe mə kwelɛ ghəa ŋayɛ, gezete mə ghena te wəsə nya nakɛ yɛ.»