Read kapsiki Ka Meha ghwə 2 Bible Online

Ka Meha ghwə 2 - kapsiki bible

Ka Meha ghwə 2

¹Pa nde ghwene ta Mahwətə slə mbe Gilgal kadzembe Bokim. Ma ke gezete ghena nya kese va Mahwətə ke ka Israyɛl: «Nahe 'ya kefəakave ŋayɛ shave mbe Ɛzhipte. Pa 'ya keleke ŋayɛ kadzete hɛɗi nya meɗeyi nda 'ya ke ka shihɛ ŋayɛ le fela, nahe 'ya kegezete kezha ɗema kanehe meɗe mɛa ɗa le gheyɛ.

²Ma gheyɛ gɛ ne, tseɓama ghena yɛ le mbeli nyi te hɛɗia shɛ ma, ŋzlamte mə reghwetɛ kedzeghe shala ta nci. Ama kese yɛ kafa ɗa ghena we, wa wəsə nya menete nya yɛ wa?

³Ma 'ya ne, kateŋka mbelia shɛhɛ 'ya te kema ta ŋayɛ we, keleŋa yateŋa ŋayɛ hɛ ba'a kateteɗe yɛ te keleŋa shɛ laka hawe va wəshi nyi zhɛrete hɛ kashala.»

⁴Ma kwa gezete nda ghena nya nde ghwene ta Mahwətə ke ka Israyɛl ne, kɛake hɛ sha lewela, ntake hɛ kanehwene.

⁵Pa hɛ hekate nda slə ke ŋkwa shɛ kaBokim, tagha ne, pa hɛ dzeghekɛ nda melɛ ke Mahwətə.

⁶Ma kwa pelakɛ mbeli Zhozəwɛ ne, yayata wəndə kalə sha hɛɗia ŋkɛ. Ntishɛ hɛ te hɛɗia shɛ.

⁷Pɛtɛ ka Israyɛl kemenete nda slene ke Mahwətə kala nza nya nzahwe Zhozəwɛ teghweme. Tsagha shɛ kwa sebe ta mte ta ŋkɛ perə te vəa mbelia jama nyi kenakɛ slene nyi menete Mahwətə kezha ka Israyɛl.

⁸Mtiwə Zhozəwɛ, wəzege ta Nəwn nde mene slene ta Mahwətə. Va gwəmsə ba'a meŋe menete ŋkɛ.

⁹Pa mbeli lamte ŋkɛ te hɛɗi nya kaŋa ŋkɛ, mbe Timnat-Hɛrɛs, laka ŋkwa nyi hwa ghweme ta Ɛfrayim, laka bela kwa gwela ta ghweme ta Ga'ash.

¹⁰Tsagha gɛ, pa ka mandalahɛnyɛ lənji sha ka shihɛ nci. Ma kweci ŋwale nyi keya kwa sebe ne, keɗepe Mahwətə hɛ, ya slene nyi menete nda ŋkɛ ke ka Israyɛl we.

¹¹Wəsə kwa ndiremi yamene ka Israyɛl kwa kema ta Mahwətə, ntake hɛ kahawe va yɛ shala Ba'al.

¹²Pa hɛ sərəakɛ Shala Mahwətə ta ka shihɛ nci, nya kefəakave hɛ shave mbe Ɛzhipte. Ntake hɛ kamene nda slene ke kweci shala, ŋa mbeli nyi kentəsləte hɛ. Kagwəɗəŋə hɛ kwa kema ta nci, tsetse ghwezeke mɛ hɛ hwa hwepe wənəa Mahwətə.

¹³Pa hɛ sərəakɛ Mahwətə kahawe va yɛ Ba'al ba'a yɛ Astartɛ.

¹⁴Pa Mahwətə hwepete wənə va ka Israyɛl. Pa ŋkɛ ɗema ya hɛ va ka mefətekwə nyi keghərə wəshia nci. Pa ŋkɛ pelave nda hɛ ke ka ghema ta nci nyi kentəsləte hɛ, mba berete va ka Israyɛl kazhɛnete nda ghə ke hɛ we.

¹⁵Yayata və nya dzemte mpa hɛ ne, mbe zamte berete kempa ta nci Mahwətə, kala nya zemete nda fela ŋkɛ ke hɛ kezha mene tsagha. Kwetɛ kwetɛŋe hɛ zanji.

¹⁶Pa Mahwətə ghwenave nda ka meha ghwə ke hɛ kezha beghe hɛ, pa ka meha ghwə zləgwəke hɛ va ka mefətekwə.

¹⁷Ya tsagha shɛ ŋkɛ ne, kayɛ nda fete ka Israyɛl ke ka meha ghwə we. Kweci shala ta ka se se yamene nda slene hɛ ba'a yagwəɗəŋə hɛ kwa kema ta nci. Kahe kahe hɛ slənji kwa hweŋkwa ta ka shihɛ nci. Nahe ka shihɛ nci keyɛte nda fete ke wəshi mahalegəa Mahwətə, ama kese hɛ kamene kala ghenci we.

¹⁸Yayata və nya ghwene nda nde meha ghwə Mahwətə ke hɛ ne, dzeme vare wəndə nyagha Mahwətə le ghəa ŋkɛ. Mbe pɛtɛa nza ta nde meha ghwə nyagha ne, mbe mbele hɛ ŋkɛ va ka ghema ta nci. Ndagwara nahe Mahwətə kezhɛakɛ heli yitea hɛ kwa se hɛ katsa lewela te ghweɗa ta mbeli nyi kesa nda yaka ke hɛ.

¹⁹Ama kemtenyɛ nde meha ghwə ne, kazhɛne hɛ kamene wəsə kwa ndiremi, za ma ke ŋa ka shihɛ nci. Kazele kweci shala hɛ, kamene nda slene hɛ ke hɛ ba'a kagwəɗəŋə hɛ kwa kema ta nci. Kesərəakɛ slene ta nci kwa ndiremi hɛ we, mbe kema mbe kema lə hɛ le ɗema fa nda ghena ke Shala.

²⁰Pa Mahwətə hwepete wənə va ka Israyɛl, ma ke: «Hwelefe ta mbeli nyi ne, kese hɛ kaya wəshi mahalegə nyi ndeke nda 'ya ke ka shihɛ nci we. Kefate ɗa ghena hɛ we.

²¹Yawa, ma 'ya gɛ, katezhɛne 'ya kaŋka wəndə ya kwetɛŋe hwa hwelefefi nyi sərəakɛ Zhozəwɛ nda temte ŋkɛ kwa kema ta nci we.

²²Katedzeghe mbeli nyi 'ya kezha ɗepe kenza nde kaganda dzeghwa ka Israyɛl kala nya 'yɛwete 'ya va hɛ. Kateɗepete 'ya kenza nde kafa ɗa ghena hɛ kala nya menete ka shihɛ nci.»

²³Vatse sərəakɛ mbeli nyi te hɛɗia shɛ Mahwətə nyi nakama ŋkɛ kaveyi hɛ mbe dzeve ta Zhozəwɛ. Kese ŋkɛ kaŋka hɛ taghanyɛ we.