Read kapsiki Ka Meha ghwə 20 Bible Online

Ka Meha ghwə 20 - kapsiki bible

Ka Meha ghwə 20

¹Pɛtɛ ka Israyɛl nyi tsenete geva kala wəndə kwetɛŋe, tseneke geva se te hɛɗia Dan hwa'a kwa Bɛrshɛba, tsagha se te hɛɗia Gala'ad, kwa kema ta Mahwətə pelɛ Mispa.

²Ka meghe nyi te ghəa mbeli, pɛtɛ hwelefe ta ka Israyɛl, pɛtɛ hɛ tagha hwa tsene ta mbelia Shala, 400.000 zhili nyi le seɗa nyi keɗepe kele kafayɛ.

³Pa ka Bɛnjamɛn fate nahe ka Israyɛl kedzeme Mispa. Ma ke ŋwalea ka Israyɛl: Gezete n'yɛ mə tsema tsema menete geva pesle ta wəndə nya?

⁴Ma ke nde Lɛvi, za male nya peslekɛ mbeli zhɛnete: «Mbe Gibɛya se ghen'yɛ le male ta ɗa kahɛ.

⁵Nahe ka Gibɛya kese heviɗi ba'a kedzaslete ghɛ nya nza 'ya ki. Nahe hɛ keɗete kapesle ɗa, ama male ta ɗa yaɓelahehwe ɓelahe hɛ le kaberete, nahe nde kemte nda ve.

⁶Pa 'ya kelete wəndə kemte mte ta nta, slave ɓɛhwɛ ɓɛhwɛ mbe ba'a ghweneghe hɛ kadzete yayata hɛɗia hwelefe ta Israyɛl, kwa nza ŋkɛ nahe hɛ kemenete wəsə hawe ba'a wəsə nya ndiremi kashasha mbe Israyɛl.

⁷Gheyɛ pɛtɛa ka Israyɛl nyi teke, gezete mə ghena kwelɛ ghəa ŋayɛ ba'a tarete mə wəsə nya temene yɛ.»

⁸Pɛtɛ mbeli sate kala wəndə kwetɛŋe ma ke hɛ: «Wəndə shɛ ya kwetɛŋe kalə sha cɛ lekwesa ta ŋkɛ keɗema sha ghɛa we.

⁹Ma tsetsenya ne, wa nya wəsə nya temene nda gheɓəmə ke ka Gibɛya nya: gheɓəmə kasla kwasheghediɗi nda dzeme mə kaɗa hɛ.

¹⁰Katekele wəndə kwetɛŋe gheɓəmə shave mbe mbeli meŋe mbe yayata hwelefe ta pɛtɛa ka Israyɛl, ghenci ka kele nda wəsə kezeme ke mbeli kedzeme kaɗa ka Gibɛya kala wəsə kwa ndiremi nya menete nda nya hɛ ke ka Israyɛl te hɛɗia Bɛnjamɛn.»

¹¹Pa pɛtɛa zhilia ka Israyɛl tseneyite geva kanya kwetɛŋe yitea melemea shɛ.

¹²Pa pɛtɛa hwelefefia Israyɛl ghweneghe ŋkwa kadzete pɛtɛa hɛɗia Bɛnjamɛn, ma ke hɛ: «Wa sləa nya ndiremi nya kemenete geva nya hwa gheyɛ wa?

¹³Ma tsetsenya gɛ ne, fəave n'yɛ mə ka mefətekwəa shɛhɛ nyi mbe Gibɛya kampə hɛ ghen'yɛ kezha kelemte ndiremi nya te ka Israyɛl.» Ama Keɗe mbelia Bɛnjamɛn kafa ghena ta ka kesaka megheyɛa nci, ka Israyɛl we.

¹⁴Pa hwelefe ta Bɛnjamɛn tseneke geva shave mbe yayata meleme ta nci katsenete geva mbe Gibɛya kezha lə kampa le ŋwale ka Israyɛl.

¹⁵Ma te vecia shɛ ne, pa ŋwalea Bɛnjamɛn shave mbe meleme ta nci kase kaɓelate ghəa nci le rafe ne, 26.000 Zhili nyi keɗepe nteɗe kafayɛ, kese mbeli kaɓela ka Gibɛya nyi gwəmsə mberefaŋe zhili nyi keɗepe mpa.

¹⁶Hwa ka sewajɛ nyi keɗepe mpa nyi kaka gwela kɛfi ne, 700. Yayata wəndəa nci ne, katebeza shinti ŋkɛ le beza pelɛa ŋkɛ kaɗema kaneke.

¹⁷Ma laka kwete bela ne, nahe kweci hwelefefia ka Israyɛl ketsenete ka sewajɛ nyi ketekeve mpa kaslibə wəfaɗe 400.000.

¹⁸Pa ka Israyɛl dzeme Bɛtɛl kezha fa ghena nya kese va Shala kezha ɗepe yita ta nci nya keha nda mpa kakwa ghate ke ka Bɛnjamɛn. Pa Mahwətə ntave yita ta Zhəwda.

¹⁹Masheke masheke te hendɛ ta ŋkwa ne, pa ka Israyɛl kelete seɗa ba'a lə kamenete ghedəkwəa nci kwa kema ta Gibɛya.

²⁰Kwa sebe ta ŋkɛ, pa hɛ shave yitea mpa le ka Bɛnjamɛn ba'a pate geva kezha mpa kwa kema ta Gibɛya.

²¹Pa ka Bɛnjamɛn shave mbe Gibɛya. Ma te vecia shɛ ne, pa hɛ mpəmte zhili 22.000 yitea ka Israyɛl.

²²Pa ka Israyɛl gweɗakwete ghəa nci ba'a zhɛne kapate geva yitea mpa te ŋkwa nya pate geva te kwa ghate ta hɛ.

²³Pa ka Israyɛl dzeme kanehwene kwa kema ta Mahwətə pa va tɛhwɛɗi, ma ke hɛ 'yɛwete va Mahwətə: «Zhɛne ghen'yɛ kahave nda mpa ke ka Bɛnjamɛn nyi kaka menəhɛ n'yɛ na?» Ma ke Mahwətə zhɛnete: «Dzeme mə kampa le hɛ.»

²⁴Ma te kwa bake ta hɛ ne, pa ka Israyɛl zhɛne kahave nda mpa ke ka Bɛnjamɛn.

²⁵Ma te kwa bake ta hɛa shɛ ne, pa ka Bɛnjamɛn shave mbe Gibɛya sha hɛ ba'a mpəmte zhili 18.000 yitea ka Israyɛl, pɛtɛ kaka ɗepe mpa le kafayɛ.

²⁶Tagha gɛ, pa pɛtɛa ka Israyɛl dzeme Bɛtɛl. Pelɛagha ne, pa hɛ nehweneyi nehwene mentishɛ kwa kema ta Mahwətə ba'a menete səwəmayɛ te vecia shɛ pa va tɛhwɛɗi. Pa hɛ dzeghekɛ melɛ kwa tere tere ba'a melɛ kejikə ghə kwa kema ta Mahwətə.

²⁷Pa ka Israyɛl fate ghena va Mahwətə, kwa nza ŋkɛ nahe səndəkwəa jikə geva ta Shala kenza te ŋkwa shɛ vəa ŋkwa shɛ.

²⁸Nahe Pinhas, wəzege ta Ɛlazar ba'a hwelefe ta Aron kenza meslete kwa kema ta ŋkɛ te vəa shɛ. Ma ke hɛ gezete: «Zhɛne ghen'yɛ kahave nda mpa ke ka Bɛnjamɛn nyi kaka menəhɛ n'yɛ na, na nza n'yɛ ghen'yɛ na?» Ma ke Mahwətə zhɛnete: «Dzeme mə, kwa nza ŋkɛ kateve hɛ 'ya mbe dzeve ta ŋayɛ hendɛ.»

²⁹Pa ka Israyɛl veyi ghweɓe dzeyi yitea Gibɛya ntəslə.

³⁰Te kwa maheke ta hɛ, pa ka Israyɛl dzeme kapate geva yitea mpa le ka Gibɛya kala nya kaghate.

³¹Pa mbelia ka Bɛnjamɛn shave le mpa cakeɗake le Gibɛya. Kala nya vecagha, cape hɛ kampə ka sewajɛa ka Israyɛl gare mahekenemsə mbeli nyi kempə mpə, kwamte hwa gamba, kwa hweŋkwa ta Bɛtɛl ba'a kwa ŋa Gibɛya.

³²Ma ke hwelefefia Bɛnjamɛn gezete: «Nahe gheɓəmə keɗate hɛ kala nyi ghala veci.» Ama ma ke ka Israyɛl gezete kwelɛ ghəa nci: «Katehwɛ gheɓəmə ba'a kateghwete hɛ gheɓəmə kalə cakeɗake yitea meleme kwa yɛ hweŋkwa.»

³³Pɛtɛa zhilia ka Israyɛl kehite geva yitea mpa kwa Ba'al-Tamar, ma nyi kese te ghweɓe ne, pa hɛ wədəhwe ŋkwa nya te ŋwela ta Gɛba.

³⁴Zhilia ka Israyɛl 10.000 nyi keɗepe mpa mbe kema ta Gibɛya. Nahe mpa keŋzle, ama keɗepe ndiremi nya kesave nda se ka Bɛnjamɛn hɛ we.

³⁵Pa Mahwətə mpəmte ka Bɛnjamɛn kwa kema ta ka Israyɛl te vecia shɛ zhili 25.100 mbeli nyi keɗepe nteɗe kafayɛ.

³⁶Nahe mbelia Bɛnjamɛn kefave nahe mbeli keɗate hɛ. Pa ka Israyɛl pelave nda ŋkwa ke ka Bɛnjamɛn va nya ɗepe hɛ ghweɓe ya tagha yitea Gibɛya.

³⁷Pa mbelia shɛhɛ dzembenji mbe meleme kahe kahe, pa hɛ pesleve geva mbe ba'a ghazlakawa mbeli nyi mbe.

³⁸Nahe hɛ kegezehwe wəsə kencɛ wəsə nya nza hɛ kaɗepete ghena shɛ te kwelɛ ghəa nci: pa hɛ ɗələte n'yia ghwə geɗeɗe dzeme yitea ghweme mbe meleme.

³⁹Ma kwa hendemte geva ka Israyɛl seyi yitea meleme ne, pa mbelia Bɛnjamɛn mpəmte zhilia nci gare mahekenemsə ma zəzə hɛ ne, nahe mə kehərəte hɛ kala nya ghalanza ke hɛ.

⁴⁰Ama vəa ŋkwa shɛ ne mbe dzeme n'yia ghwə yitea ghweme mbe Gibɛya. Newe mbelia Bɛnjamɛn kwa sebe ne ghwə ya yitea meleme ta nci pɛtɛ.

⁴¹Tewətelɛwe ka Israyɛl nyi kehwɛ kadzeghəa hɛ, kanewe newe ɗa nya te hɛ ka Bɛnjamɛn yirə hɛ.

⁴²Ntake hɛ kahwɛ kadzemte te ɓerama, ama pa hɛ fiyi geva kwelɛ wəvəsəa ka sewajɛ nya wəba le ka Israyɛl nyi kese mbe Gibɛya, pa hɛ mpəmte hɛ.

⁴³Pa ka Israyɛl have nda mpa ke ka Bɛnjamɛn ba'a ntsa yitea hɛ kezha mpə hɛ kwa hweŋkwa hwa'a te ŋkwa nya laka ŋkwa kesame ta veci yitea Gibɛya.

⁴⁴Tsetse mpəate ka sewajɛa ka Bɛnjamɛn ka Israyɛl zhili 18.000 pɛtɛa nci kaka katsala kempa.

⁴⁵Pa kweci ka Bɛnjamɛn hwɛnji jive laka ɓerama, laka ghweme ta Rimon. Pa ka Israyɛl mpəmte zhili 5.000 kwa hweŋkwa, pa mbeli kekate nyi ketene hwa'a mbe Gidom ba'a pa mbeli zhɛne kampəmte zhili 2.000.

⁴⁶Ma mbelia ka Bɛnjamɛn nyi kempə te vecia shɛ ne 25.000 ka sewajɛ nyi kaka katsala kempa.

⁴⁷Ma ya tsagha shɛ ŋkɛ ne, nyi kembele kadzeme ghweme ta Rimon gwəmsə ŋkwaŋe ka menete tere wəfaɗe pelɛ.

⁴⁸Pa ka Israyɛl zhɛnaghe geva ka Bɛnjamɛn nyi ketene. Kemeleme kemeleme ne, pa hɛ mpəmte mbeli ba'a wəshi keseɗa, pa hɛ ndəyite ghwə yitea pɛtɛa meleme nyi te hɛɗia shɛ.