Read kapsiki Ka Meha ghwə 5 Bible Online

Ka Meha ghwə 5 - kapsiki bible

Ka Meha ghwə 5

¹Te vecia shɛ se yɛ Dɛbora hɛ le Barak, wəzege ta Abinowam, kagha cimə ma ke hɛ:

²«Mbe Israyɛl ne, nahe yayata wəndə kehimte geva yitea mpa, nahe hɛ kendeke nda ghəa nci ke mpa. Tsa nda mə 'ŋ'wese ke Mahwətə!

³Gheyɛ ka meghe, gheyɛ mbeli nyi te ghə, ghwene mə sleme ta ŋayɛ! 'Ya kagha cimə, e'e 'ya kagha cimə kezha Mahwətə, Shala ta ka Israyɛl.

⁴Mahwətə, ma kwa slə te hɛɗia ka Ɛdom, ma kwa sawa na pelɛ ghweme ta Sɛyir na hɛɗi kegaŋkəɗə kwele kwele, pa ləmbə shekeke yɛməa ŋkɛ, va kwele kwele nde me sawa pelɛ ghweme,

⁵Nahe yɛ ghweme kebare bare kwa kema ta ŋa, Mahwətə ta Sinay, Shala ta ka Israyɛl.

⁶Te vəa Shamgar, wəzege ta Anat, te vəa Yayɛl, na mbeli kesərəakɛ yɛ hweŋkwa, mbeli nyi kelə yitea dzeghwa ne kwete hweŋkwa yakele hɛ.

⁷Meghe shɛ we, meghe mbe hɛɗia ka Israyɛl we, mpelɛa ma ke 'ya, Dɛbora, nda tese 'ya kezha nza kameghekɛa ka Israyɛl.

⁸Pa mbeli ntave kweci shala kamɛnɛfɛ taghanyɛ ne mpa ya shɛ. Ama dzawe nda nza mbeli kakemave gelə le megha kezha mbeli 40.000 mbe Israyɛl,

⁹Le ka meghea ka sewajɛa ka Israyɛl wənəa ɗa zlaɓe wənəa ɗa le ŋa yɛ mbelia nyi keve nda ghə ke mpa. Tsa nda mə 'ŋ'wese ke Mahwətə.

¹⁰Gheyɛ nyi kedzeghwa le kwara kwa tɛawetɛa, geze mə ghena gheyɛ nyi mentishɛ te deyɛte, geze mə ghena gheyɛ nyi kedzeghwa kwa hweŋkwa, geze mə ghena!

¹¹Takwa yitea ŋkwa kesa yɛmə ta wəshi, kageze ganyɛa Mahwətə ka ya wəshi, ganyɛa ŋkɛ laka ka meghea ka Israyɛl, kwa kelete ŋkwa kenza mbelia Mahwətə, mɛa degha ta meleme.

¹²Feɗeghe ŋa, Dɛbora, yake ŋkwa! Feɗeghe ŋa! Ghate geza kempa! Slete, Barak, wəzege ta Abinowam fəghe ka mavashia ŋa!

¹³Nyi mba le mpi, nahe hɛ kedzehwa ka meghe, nahe mbelia Mahwətə ketsenete geva yite, kala ka katsala nyi kwa mpa.

¹⁴Ka hərəte mpa ta ka Amalɛk ne, mbe Ɛfrayim se hɛ. Kwa sebe ta nci hwelefe ta Bɛnjamɛn, jikə hɛ hwa wəvəsəa nci. Nahe peləa Makir kendeka mbeli nyi te ghə ba'a hwelefe ta Zabəlon kendeka mbeli nyi te ghə.

¹⁵Ka meghea Isakar ne jikə hɛ le Dɛbora. Ma mbelia Isakar ne, kenza hɛ dɛŋe dɛŋe te ghena ta Barak we, kahe kahe jikəahwe geva hɛ hwa hɛ kwake te ŋwela. Ama mbe yita ta Rəbɛn, nahe hɛ ketemə te zhɛne ghəpə kwa kiɗima.

¹⁶Wa raberə nza ŋayɛ yɛ kwelɛ tepe ta ŋkwa keya wəshi bake kafa ka ya wəshi kaheka wəshia nci wa? Kaganda, ma mbe yita ta Rəbɛn ne, nahe mbeli ketemə te zhɛne ghəpə nya kekiɗima.

¹⁷Mbe Gala'ad, laka ŋkwa nya same veci sha Zhəwrdɛŋe, kegaŋkəɗə yita ta nci we. Ka yita ta Dan ne, ntishɛ hɛ yitea kwambeləa nci nya wəba ŋa Asɛr ne, ntishɛ hɛ perə mɛa hələ takwa yitea yɛ mɛa ŋkwa kenza ta kwambelə.

¹⁸Ma mbelia Zabəlon hɛ ne, kala ŋa Nɛftali perə, weli kempəmte hɛ mbeli, te ghwa mpa.

¹⁹Ka meghe nyi kaka ghema, ka meghea ka Kanan, kase kampate mpa kwa le ka Ta'anak, takwa yitea hələa Mɛgido. Ama wəshi shɛ kefəke hɛ we, ya kweci wəshi, ya cɛdɛ.

²⁰Pelɛ yitea ghəa ghweme, nahe yɛ saseregwa kese mbe mpa, kwa hweŋkwa ta nci hɛ kadzeghwa, nda mpate mpa hɛ le Sisra.

²¹Hələ nya kehwɛ ghalanza, hələa Kishon nahe ŋkɛ ketsalemte ka ghema. Ntsə ɓə geva te kema te kema yitea mpa.

²²Cape gədəwəa lɛmə yitea hwɛ, kagaka seɗa ta nci te hɛɗi.

²³Ma ke nde ghwene ta Mahwətə: bezlakɛ mə meleme ta Mɛroz, bezlamte, bezlamte mbeli nyi mbe kwaɗema hɛ kese kakemane Mahwətə, kese hɛ kase kakemane le mbeli kempa ka ghyana nyi ve we.

²⁴Pa Mahwətə wəpikɛ ŋa za ma ke pɛtɛa mi, Yayɛl, male ta Hɛbɛr kwa Kɛn! E'e, pa Mahwətə wəpikɛ ŋa za ma ke pɛtɛa mi nyi mbe cɛ lekwesa!

²⁵Nahe Sisra ke'yɛwakɛ yɛmə, ŋ'wa yandeke nda Yayɛl, mɛmre ŋ'wa yandeke nda nde kwa kwalekwə nya ndeɗe tsape.

²⁶Pa kelete lɛ kwa lɛmelɛ mbe dzeve kwetɛŋe, ndevelea ka mene slene ya mbe kwete dzeve. Pa mpave Sisra, pa nde ŋkwapemte ghə te. Pa nde kantsamte 'yɛ'yɛa ghə.

²⁷Kwa kema ta nta seraɗete geva ŋkɛ, pa ŋkɛ teɗenyɛ, nahe ŋkɛ kenza ɓelayɛ yitea seɗa ta nta. Nahe ŋkɛ keseraɗete geva, pa ŋkɛ teɗenyɛ, mtiwə ŋkɛ.

²⁸Kanewe ŋkɛ meghekɛ Sisra dzawa te wəfela ta cɛ, ma ke sha lewela jive hwa lareya: wa raberə nda gaka wəmata ta gədəwəa wəzege ta ɗa? Wa raberə nda dera ŋkɛ kese wa?

²⁹Mba nde kageze kazhɛne kageze kezhɛnete nda mbeli we hwa ka mcɛhɛ nda nyi kentsehwele ntsehwele we:

³⁰Katsene wəshi nyi fəke mbeli hwa mpa ka sewajɛ, kaganda ne, nehe yanehe wəshia shɛhɛ hɛ: təhə wəzha makwa keɗema bake kaŋa yayata nde mpa, zlave nyi kefi fi ba'a nyi ketsa tsa kaŋa Sisra, kaganda ne, zlave nya tsate mbeli zlahe kaŋa welɛa ŋkɛ.

³¹Mahwətə, pɛtɛ hi ka ghema ta ŋa, kampə kala nya mte Sisra! Ama ka mcɛhɛ ŋa kanza kala veci, kwa same ŋkɛ le ɓele ta ŋkɛ pɛtɛ!» Pa kwelɛŋe menete geva te hɛɗi kava wəfaɗemsə.