Read kapsiki Ka Meha ghwə 9 Bible Online

Ka Meha ghwə 9 - kapsiki bible

Ka Meha ghwə 9

¹Abimɛlɛk, wəzege ta Yerəwba'al, geze ta ŋkɛ Zhɛdɛyon slə Kadzawa Sishɛm kesləyi ka kesaka meghekɛa meghekɛ. Ma ke sha hɛ:

²«Kwiɗi mə 'yɛwete mə wəsə nya va mbeli nyi mbe meleme: ‹Wa yaɗe gheyɛ wa? Nza ta ŋwalea Yerəwba'al mberefaŋemsə kaka meghea ŋayɛ na, megela ma wəndə kwetɛŋe kameghea ŋayɛ na?›» Zəzəte mə hwelefe ta ŋayɛ 'ya.

³Pa ka kwesegwehɛnyɛa Abimɛlɛk lə kazhɛnete nda ke mbeli nyi mbe meleme ta Sishɛm. Nahe hɛ kezəzəte kezha ntave kwa nza ŋkɛ kamenənyɛa hɛ.

⁴Pa hɛ fəave nda dəɓərəa mze kwa tɛawetɛa mberefaŋemsə, shave mbe cɛa Ba'al-Berit. Le dəɓərə nyighɛ, pa Abimɛlɛk pahwe mbeli nyi ɗema ghena ta nci shɛ le ka mefətekwə kezha təkwə təkwəte hɛ.

⁵Kwa sebe ta ŋkɛ pa dzekinyɛ ki ghɛa yitenyɛ kwa Ofra, pa mpəmte ka kesaka yitenyɛ nyi mberefaŋemsə ŋwalea Yerəwba'al te keleɓa nya kwetɛŋe. Deke nya ɓɛhwɛa nci ya mba kwa wəfərənyɛ ŋkɛ.

⁶Pa pɛtɛa mbeli nyi mbe Sishɛm ba'a nyi mbe Bɛt-Milo tsenete geva. Pa hɛ lə kadzeyitea hwemeke nya mbe Sishɛm, vare gɛaŋa nya mɓete mbeli. Tagha gɛ, ma ke hɛ zlapete: «Abimɛlɛk ya ka meghe.»

⁷Pa mbeli gezete nda ghena ke Yotam. Pa dzemenyɛ pelɛ ghəa ghweme ta Garizim, ma ke sha lewela le berete ta ŋkɛ pɛtɛ: «Fa mə ghena ta ɗa, gheyɛ mbeli nyi mbe Sishɛm, keɗe yɛ katefa ŋa ŋayɛ Shala!

⁸Ma te kwete veci ne, pa wəfea lɛmə tarete kanta meghe. Ma ke hɛ sha bekele: ‹Nza kameghea n'yɛ!›

⁹Ama ma ke bekele zhɛnete: ‹Yɛ shala le yɛ mbeli pɛtɛ ne, n'yia ɗa yaɗe hɛ. Katezhɛne 'ya kaleɓe ghəa ɗa ba'a kasərə n'yia ɗa kezha nza kameghe te ghəa kweci wəfe na?›

¹⁰Pa wəfe shɛhɛ geze nda ke dasekwa: Nde gha, kanza kameghea n'yɛ!

¹¹Ama ma ke dasekwa zhɛnete: Ma zəzə yɛ ne, pa 'ya sərəakɛ ya ta ɗa nyi ghɛnike nyi kweɗe kweɗe kalə kaleɓe ghəa ɗa kanza kameghe te ghəa kweci wəfe na?

¹²Pa wəfe shɛhɛ geze nda ke rɛzɛŋe kwa sebe ta ŋkɛ: Gha nza kameghea n'yɛ.

¹³Ama ma ke rɛzɛŋe zhɛnete: Ma zəzə yɛ ne, pa 'ya sərəakɛ tɛa ɗa, nya keve nda zlama ke yɛ shala le mbeli ne, tsema leɓe ghəa ɗa 'ya kalə ɗa kanza te ghəa kweci wəfe wa?

¹⁴Te kwa keɗaŋe, ma ke pɛtɛa wəfe gezete nda ke tigə: Nde tsagha gi, shɛ na nza kameghea n'yɛ!

¹⁵Ma ke tigə sha hɛ: Ma kenza nde kaganda ɗe yɛ kanta ɗa kameghea ŋa ŋayɛ ne, seyi mə kadzeyitea shenaŋkwe ta ɗa. Ma kaɗema yɛ kamene kala nyagha kateshave ghwə mbe tigəa ɗa katere pa le yɛ lekeleke nyi pelɛ Liban.»

¹⁶Mba Yotam yite shanda: «Gheyɛ mbeli nyi mbe Sishɛm, tiɗiɗi menete yɛ le zəzə ganyɛ kwa zlapete yɛ kameghe Abimɛlɛk pe yɛ na? Le hweŋkwa ta ŋkɛ dzeghwate dzeghwa yɛ laka mbelia Yerəwba'al na? Nahe yɛ keɓelate slene nyi menete ŋayɛ ŋkɛ na?

¹⁷Nahe yiteyɛ ɗa kempate mpa yitea gheyɛ weli mpia ŋkɛ keza tewəmbəreke gheyɛ kambele ŋayɛ va ka Madiyan.

¹⁸Ama gheyɛ ɓeshi ne, nahe yɛ keɗema ghena ta mbelia yiteyɛ ɗa, pa yɛ mpəmte ka kesaka yitenyɛ mberefaŋemsə zhili te keleɓa nya kwetɛŋe. Pa yɛ zlapete Abimɛlɛk ya kameghe, wəzege nya yake yiteyɛ ɗa hwa kwatera ta ŋkɛ. Ma nda menete yɛ kala nya ne, va nya nza ŋkɛ kamenə ŋayɛ.

¹⁹Ma ya tiɗiɗi menete yɛ le hweŋkwa ta ŋkɛ laka mbelia Yerəwba'al, wəsə farefa yamene ŋayɛ Abimɛlɛk, gheyɛ perə ne, menete nda mə wəsə farefa!

²⁰Ma wəsə kwa tekeleke ne, kateshave ghwə mbe Abimɛlɛk katere mbeli nyi mbe Sishɛm le nyi mbe Bɛt-Milo! Kashave ghwə mbe mbeli nyi mbe Sishɛm le nyi mbe Bɛt-Milo katere Abimɛlɛk!»

²¹Kwa sebe ta ŋkɛ, pa Yotam hwɛnyɛ kadzeme Beyɛra kanzanyɛ pelɛ va nya zhɛ nda ghazlənə va wəza yitenyɛ Abimɛlɛk.

²²Abimɛlɛk kamene meghe te ka Israyɛl kava mahekene.

²³Ma kwa sebe ta ŋkɛ ne, pa Shala ghwenakɛ sefə nya keheɗete yɛ meghe le mbeli nyi kwa degha ta meghe mbe Sishɛm. Pa hɛ ɗema ghena ta Abimɛlɛk.

²⁴Laka wəsə nya kala nya ne, pa hɛ lə kawate dewa te nyi mberefaŋemsə ŋwalea Yerəwba'al: kwa mpəmte ka kesaka yitenyɛ Abimɛlɛk, ma mbeli nyi kwa degha ta meghe mbe Sishɛm ne, pa hɛ kemanakɛ Abimɛlɛk hɛ kampə hɛ.

²⁵Ma kezha mene nda wəsə kwa fete ke Abimɛlɛk ne, pa mbeli nyi kwa degha ta meghe mbe Sishɛm veyi ŋkwa pelɛ ŋkwa nya biya takwa yitea meleme. Pɛtɛ hɛ zləgwəhwe wəshia mbeli nyi keseyi kwa hweŋkwa nyi takwa yitea hɛ. Pa Abimɛlɛk fate.

²⁶Te kwete hɛ, pa Ga'al, wəzege ta Ɛbɛd, ntsehe kwa Sishɛm le ka kesaka meghekɛ. Pa mbeli nyi mbe meleme ɗema gezleŋe ghə ve.

²⁷Cape hɛ kadzemte kezha nda rɛzɛŋe, pa hɛ ŋkeɗekɛ rɛzɛŋe ba'a tseɓate ghena ta gəsəkə. Kalə kadzembe cɛ shala ta nci, kazeme wəshi kasa wəshi, ntake hɛ kabezla nda wəsə kwa ndiremi ke Abimɛlɛk.

²⁸Ma ke Ga'al, wəzege ta Ɛbɛd 'yɛwete va hɛ: «Wa sləa ɓəmə mbe Sishɛm nda mene nda slene gheɓəmə ke Abimɛlɛk wa? Wa ŋkɛ ŋkɛ le ŋa ŋkɛ wa? Ashɛ wəzege ta Yerəwba'al ŋkɛ ba'a laka Zɛbəwl kemanakɛ ghəa ŋkɛ ŋkɛ kasleke meleme wəka? Yawa ma gheyɛ mbelia Sishɛm gɛ ne, mene nda mə slene ɓetəkə ke mbelia Hamor, ghenci nyi keŋslete meleme. Tewəmbəreke wa nda nza mə kaka mene nda slene ke Abimɛlɛk wa?

²⁹'Ya le ghəa ɗa ne, kaɗe 'ya kanza te ghəa ka Sishɛm. Kateŋkamte Abimɛlɛk 'ya!» Ma ke Ga'al: «Abimɛlɛk, mtsehete ka sewajɛa ŋa nda se na yitea mpa le 'ya!»

³⁰Pa Zɛbəwl, ŋgwamna ta Sishɛm fate wəsə nya gezete Ga'al, wəzege ta Ɛbɛd, pa hwepete wənə.

³¹Pa ghwenakɛ nda mɛ ke Abimɛlɛk te wəfərə kezha geze nda: «Nahe yɛ Ga'al le ka kesaka meghekɛ kese tsetsenya kadzembe Sishɛm, nyi hɛ nyi mbe heɗe mbeli nyi mbe meleme kadzeyitea gha.

³²Heviɗi nya, gha le mbelia ŋa, na kehite geva kalə yɛ kawəfərə ŋayɛ hwa gamba.

³³Hendɛ masheke samema ta veci ne, nda se yɛ kaɗa meleme. Ma keshave Ga'al le mbelia ŋkɛ kabegeme le gha ne, nda mene nda wəsə nya mene nda na na, kala nya nakɛ na.»

³⁴Ma viɗi nya kwa sebe ta ŋkɛ ne, pa Abimɛlɛk le mbelia ŋkɛ pɛtɛ kaneheve geva mbe kawəvəsə wəfaɗe kalə kawəfərənji takwa yitea Sishɛm.

³⁵Ma kwa shave Ga'al mbe meleme ba'a kwa slete ŋkɛ vare ŋkwa kedzembe ne, pa yɛ Abimɛlɛk le mbelia ŋkɛ shave mbe ŋkwa nya wəfərənji hɛ.

³⁶Pa Ga'al nakɛ hɛ, ma ke sha Zɛbəwl: «Newema mbeli kasawa pelɛ yɛ ghweme!» Ma ke Zɛbəwl zhɛnete: «Ewə, shenaŋkwe ta ghweme yanewe na kala mbeli!»

³⁷Ma ke Ga'al ntsəte geva kageze: «Newe! Mbeli hɛ kaganda kasawa pelɛ wəmbə nya te tepe. Pɛkwe kwete wəvəsə kwetɛŋe kase laka hweŋkwa ta cɛana nya nza ka ŋa zlera yite.»

³⁸Ma ke Zɛbəwl zhɛnete nda: «Tema ghena za ta ŋa nyi ganji nyi gɛ wa? Ma pa na sha gheɓə: Wa ŋkɛ Abimɛlɛk nda mene nda slene mə wa? Yawa, wa nyi mbeli nyi yiɗə nyi na kase gɛ! Ma tsetsenya ne, kwiɗi mə kampa le hɛ!»

³⁹Pa Ga'al shave mbe meleme te ghəa ka Sishɛm kampa le Abimɛlɛk.

⁴⁰Tereŋe Abimɛlɛk kakeka Ga'al nya kehwɛ. Kwele kwele mbeli nyi ɗakɛ zhi nyi keteɗe kwa mɛ degha ta Sishɛm.

⁴¹Pa Abimɛlɛk lə kanzanyɛ mbe Arəwma. Pa Zɛbəwl ŋkamte Ga'al le yɛ ka kesaka meghekɛ ba'a fɛake hɛ kenza mbe Sishɛm.

⁴²Ma te hendɛ ta ŋkwa kahi geva ka Sishɛm kashave kadzemte ne, pa Abimɛlɛk fate.

⁴³Pa fəte mbelia ŋkɛ kaneheve kawəvəsə mahekene kawəfərənji mbe gamba. Ma kwa nakɛ ka Sishɛm hɛ kashave mbe meleme, pa hɛ kahwɛ kaɗa hɛ.

⁴⁴Pa yɛ Abimɛlɛk le mbelia ŋkɛ lə kahe kahe kanzanji mɛa meleme, vəa ŋkwa nya ha nda mpa kweci wəvəsə nyi bake ke ka Sishɛm nyi hwa gamba ba'a nya ghazle hɛ hɛ.

⁴⁵Pa Abimɛlɛk vəghwə kampa ba'a kelehwe meleme. Pa ŋkɛ mpəmte mbeli nyi mbe, ŋzlamte melemea shɛ pɛtɛ ba'a kwərə kwərəyi ghwene te yayata ŋkwa.

⁴⁶Ma kwa fate mbeli nyi kwa degha ta meghe ta meleme Migdal-Sishɛm ne, pa hɛ lənji pɛtɛ kadzembe cɛ nya yitea cɛa Ba'al-Berit.

⁴⁷Pa Abimɛlɛk fate pɛtɛ tsenete geva hɛ te ŋkwa shɛ.

⁴⁸Cape Abimɛlɛk kadzeme ghweme ta Salmon le mbelia ŋkɛ. Pa ŋkɛ kelete tseyɛ tsasleve dzeve ta wəfe ba'a veyi ŋkɛ te bazla ta ŋkɛ. Kwa sebe ta ŋkɛ, ma ke sha mbeli nyi yite: «Nahe yɛ kenakɛ wəsə nya menete nya 'ya. Ntsə mə geva kahe kahe kamene kala nyagha!»

⁴⁹Yayata wəndə katsasle dzeve ta wəfe, cape hɛ katəkwə təkwə Abimɛlɛk. Pa hɛ tseneyi dzeve ta wəfe vare ghɛa nya wəba nya kaŋa Ba'al kandəmte le ghwə pɛtɛ le mbeli nyi mbe. Wa nya tsetse mpənji mbeli nyi mbe Migdal-Sishɛm. Ma nza ta nci ne, gare slibə zhili le mi.

⁵⁰Slə tagha ne, cape Abimɛlɛk kadzembe Tɛbɛs. Pa ŋkɛ dzaslete meleme ba'a kelehwe ŋkɛ.

⁵¹Ma te tepe ta meleme ne, cɛ nya pelɛ ghəa cɛ kewəbanyɛ nya nza zli yite ya shɛ. Zhili, mi, pɛtɛ mbeli nyi mbe meleme lə kawəfərənji mbe. Pa hɛ ŋzlete mɛa ŋkɛ, pa hɛ dzemenji pelɛ ghəa cɛa shɛ.

⁵²Pa Abimɛlɛk se kaɗa hɛ. Pa hendeyite geva yitea mɛa ŋkɛ kezha ndə ghwə yite.

⁵³Ama pa kwete male ŋkwapaghe pelɛ kənə, ŋkwape ghəa ŋkɛ.

⁵⁴Te ŋkwa shɛnyɛ pa Abimɛlɛk hekakɛ mempɛhweta nya kekele wəshi kempa ta ŋkɛ, ma ke shɛ: «Nteɗeve kafayɛa ŋa peslekɛ ɗa. Ma tsagha ne, kategeze mbeli male nde peslekɛ ɗa ke hɛ we.» Pa mempɛhweta shɛ n'yimte, mtiwə ŋkɛ.

⁵⁵Ma kwa nakɛ Abimɛlɛk ka Israyɛl kemte mte, pa hɛ dzeghwanji yayata wəndə sha ghɛa ŋkɛ.

⁵⁶Tsetse kala nya wate wəsə nya menete nda Abimɛlɛk ke mbelia yitenyɛ Shala, kwa mpəmte ka kesaka yitenyɛ ŋkɛ mberefaŋemsə.

⁵⁷Pa Shala ɗate ka Sishɛm te wəshi nyi ndiremi ndiremi nyi menete hɛ pɛtɛ. Tsetse yipəte geva bezla nya bezlakɛ hɛ Yotam, wəzege ta Yerəwba'al.