Read kapsiki 3 Zhaŋe 1 Bible Online

3 Zhaŋe 1 - kapsiki bible

3 Zhaŋe 1

¹Se va Meha za ke Gayəs, mcɛ ɗa ganyɛ nya ɗe 'ya mbe waŋe ta kaganda.

²Mcɛ ɗa ganyɛ, kaɗe 'ya kezha jive na mbe kema mbe pɛtɛa wəshi ba'a kezha nza geva ta ŋa lɛŋe lɛŋe kala mehele ta ŋa.

³Kwele kwele se 'ya kazlama, kwa se kweci ka kesaka ma kaneghate fete te kaganda nya kencɛ geva mbe nza ta ŋa: ma gha ne, kadzeghwa na mbe waŋe ta kaganda.

⁴Ma wəsə nya zlama 'ya te za ma ne, fa nya fate 'ya dzeghwa yadzeghwa ŋwalea ɗa mbe waŋe ta kaganda.

⁵Mcɛ ɗa ganyɛ, kanewe ghweme na te ka Kriste, ya kwela nza hɛ kaka mentiɓə. Ma kwa nza na kamene kala nya ne, kale nde zele Shala mene na.

⁶Nahe hɛ keneghate fete yitea ɗe ta ŋa kwa kema ta Jikə ta ka Kriste. Kemane hɛ mbe dzeghwa ta nci kala nya kehi sha Shala.

⁷Kwa nza ŋkɛ nahe hɛ keslə yitea dzeghwa kezha slene ta Kriste, kaɗema kese kaɗe wəshia ka ɗepema Shala.

⁸Ma tsagha gɛ, nahe gheɓəmə kehi kakemane mbeli nyi kala nyi, yitea ncɛ ghəa ɓəmə kaka mene slene ta kaganda.

⁹Nahe 'ya kerafete nda palepa ɓɛhwɛ ke Jikə ta ka Kriste. Ama Diyotrɛfe nya keɗe kanza te ghəa mbeli ne, kese ŋkɛ kayɛ ghena nya geze 'ya we.

¹⁰Vatse gɛ, ma te veci nya tese 'ya ne, katencɛ wəsə kwa ndiremi nya mene ŋkɛ 'ya, gheŋkɛ nya kegeze ghena nyi ndiremi ndiremi te ghen'yɛ. Ama kenza wərə nda we: hɛreɗɛ ŋkɛ ɗema kemaneve ka kesaka ma nyi kese. Ma mbeli nyi keɗe kakemaneve hɛ ne, kafɛa hɛ ŋkɛ ba'a kaŋka hɛ ŋkɛ shave hwa Jikə ta ka Kriste.

¹¹Mcɛ ɗa ganyɛ, tekema wəsə kwa ndiremi na ma, ama teke wəsə ganyɛ. Ma wəndə nya kemene ganyɛ ne, wəndəa Shala ŋkɛ. Ma wəndə nya kemene wəsə kwa ndiremi ne, kenakɛ Shala ŋkɛ we.

¹²Pɛtɛa mbeli kageze ghena ganyɛ te Dɛmɛtriyəs, kanegha fete kaganda le ghəa ŋkɛ te Dɛmɛtriyəs. Ghen'yɛ perə ne, nahe ghen'yɛ keneghate fete yite, nahe na keɗepe nahe negha fete ta n'yɛ kenza kakaganda.

¹³Kwele kwele ghena va 'ya kageze ŋa, ama kaɗe 'ya karafe hɛ le wəsə kerafe wəsə ba'a le yirə we.

¹⁴Kaɗe 'ya kalə sha gha temə vireɗi, kategeze gheɓə mɛ le mɛ.

¹⁵Pa na nza kwelɛŋe. Kanjiŋwe ŋa ka mcɛhɛ ŋa. Njiŋwe ka mcɛhɛ n'yɛ, keslə keslə.