Read kapsiki Ghena Kelɛŋə 13 Bible Online

Ghena Kelɛŋə 13 - kapsiki bible

Ghena Kelɛŋə 13

¹Kwa sebe ta ŋkɛ, pa 'ya nakɛ wəsə keseɗa kasame kwa ndərə. Meŋe tereme ba'a mberefaŋe ghə te. Derə meghe ya te yayata tereme, slə nya keŋele Shala ya te yayata ghə.

²Nahe wəsə keseɗa nya nakɛa shɛ 'ya kenza kala deghwava, yɛ seɗa ta ŋkɛ kenza kala ŋa mtsekwele ba'a mɛa ŋkɛ kenza kala ŋa nivɛrə. Pa shishi meŋele ndeke nda berete ta ŋkɛ, pasla ta ŋkɛ ba'a kwelea ŋkɛ nya wəba.

³Nahe zhi kemte keɗakɛ kwete hwa ghəa wəsə keseɗa shɛ, ama nahe zhia shɛ kempimte geva. Tagha gɛ, pɛtɛa mbeli nyi te hɛɗi heheɓake, ntake hɛ katəkwə təkwə wəsə keseɗa shɛ.

⁴Pɛtɛa mbeli nyi te hɛɗi kahawe va shishi meŋele, va nya ndeke nda berete ŋkɛ ke wəsə keseɗa. Pɛtɛa mbeli kahawe va wəsə keseɗa shɛ perə, ma ke hɛ: «Wa wəndə nya kala wəsə keseɗa nya wa? Wa nde nza kapesle yitea mpa le wa?»

⁵Pa wəsə keseɗa shɛ kemave hweŋkwa kegeze ghena ŋkele ntsə ba'a ghena keŋele Shala. Pa nde kemave berete kemene wəsə nya ɗe ŋkɛ katere wəfaɗemsə bakeghəmbe.

⁶Ntake nde kaŋele Shala, kaŋele sləa ŋkɛ ba'a ŋkwa nya nza ŋkɛ te, tsagha mbeli nyi pelɛ ghweme pɛtɛ.

⁷Nahe hweŋkwa kendeke nda geva kezha mpa le mbelia Shala ba'a kezha hərə hɛ. Nahe nde kekemave berete te ghəa yayata yita, yayata hwelefe, yayata ghena ba'a yayata hɛɗi.

⁸Pɛtɛa mbeli nyi te hɛɗi katehawe ve, mbeli nyi ɗema sləa nci kerafete geva te palepa ta mpi ghala pate geva yɛ hɛɗi le ghweme. Nahe palepa shɛ kenza kaŋa Zhɛgwəa təmə nya dzeghekɛ geva melɛ le.

⁹Ma wəndə nya nza sleme ve ne, fa ghena nya ŋkɛ ndeɗekə gɛ!

¹⁰Yayata wəndə nya keveyi geva kanza kande daŋgayɛ ne, katedzawa daŋgayɛ ŋkɛ. Ma wəndə nya keveyi geva kezha mte va kafayɛ ne, katemte ŋkɛ va kafayɛ. Vatse hi mbelia Shala kanza kaka zereghe ghena ba'a kambeli nyi nza yɛ va hɛ.

¹¹Kwa sebe ta ŋkɛ, pa 'ya nakɛ kwete wəsə keseɗa kasame kwa hɛɗi. Tereme ya bake kwa ghə ve kala ŋa zhɛgwəa təmə, ama kala shishi meŋele geze ghena ŋkɛ.

¹²Berete ta wəsə keseɗa nya kesame kwa ndərə ya ve. Le beretea shɛ mene slene ŋkɛ kwa kema ta wəsə keseɗa shɛ. Kaŋka hɛɗi lema le mbeli nyi te ŋkɛ kahawe va kwa ghate ta wəsə keseɗa nya mpimte geva zhi kemte ta ŋkɛ.

¹³Kwa bake ta wəsə keseɗa shɛ ne, kwele kwele mene wəshi meŋele ŋkɛ, kakele ghwə ŋkɛ sawa pelɛ ghweme kadzete hɛɗi kanewe newe mbeli.

¹⁴Kaghwete mbeli nyi te hɛɗi ŋkɛ kwele kwele le wəshi meŋele nyi mene ŋkɛ kwa kema ta kwa ghate ta wəsə keseɗa. Kageze nda ŋkɛ ke mbeli kamene pa ta wəsə kazləvəa wəsə keseɗa nya ɗakɛ kafayɛ le zhi ba'a nya kezhɛne kanza teghweme.

¹⁵Pa kwa bake ta wəsə keseɗa kemave berete nya keve nda sefəa mpi ke pa ta kwa ghate ta wəsə keseɗa, yitea geze ghena ba'a yitea mpə pɛtɛa mbeli nyi keɗema kahawe ve pa ta wəsə keseɗa shɛ.

¹⁶Ntake wəsə keseɗa shɛ kaŋka mbeli pɛtɛ, mbeli nyi ɓɛhwɛ ɓɛhwɛ ba'a nyi jama jama, ka mcɛləa kɛfi ba'a ka titikwəa kɛfi, ka mamzashi ba'a ka mavashi, kezha kele lamba te dzeve kwa zeme keɗema mɛa kema.

¹⁷Wəndə shɛ kapave wəsə keɗema kapamte wəsə keɗema lamba shɛ te, geze ta ŋkɛ, sləa wəsə keseɗa shɛ keɗema lamba ta sləa ŋkɛ we.

¹⁸Nya ya kavə kencɛ ntsehwelea ŋkɛ: Wərə wəndə nya keɗepe wəshi kaɗepete ghena nya mbe lamba ta wəsə keseɗa shɛ, kwa nza ŋkɛ lamba ta sləa wəndə ŋkɛ: nahe lamba ta ŋkɛa shɛ kenza kalamba gwəmsə ŋkwaŋe ba'a ŋkwaŋemsə ŋkwaŋeghəmbe (666).