Read kapsiki Ghena Kelɛŋə 14 Bible Online

Ghena Kelɛŋə 14 - kapsiki bible

Ghena Kelɛŋə 14

¹Newe 'ya zhɛkwa ne, dəkwə 'ya te Zhɛgwəa təmə meghereŋe pelɛ ghweme ta Siyon. Mbeli 144.000 ya yite. Nahe sləa Zhɛgwə ba'a sləa Yitenyɛ kerafete geva mɛa kema ta mbelia shɛhɛ.

²Ma fa 'ya ne, kagaka ŋwələ sawa pelɛ ghweme kala mewədzərə ta ghwa ba'a kala berazlɛ ta va. Nahe gaka ta ghena nya fatea shɛ 'ya sawa pelɛ ghweme kenza kala gaka ta gagera nyi tsa ka tsa gagera.

³Kagha cimə mɛnɛfɛ mbeli nyi tipə tipəa shɛhɛ kwa kema ta pasla, kwa kema ta wəshi keseɗa nyi wəfaɗea shɛhɛ ba'a kwa kema ta mbelia jama. Wəndə shɛ katekeve ciməa shɛ keɗema mbeli nyi 144.000, nyi kembeɗeke geva kwake te hɛɗi we.

⁴Ma mbeli nyi ne, kezhɛrete ghəa nci hɛ wale wale le mi we, nahe hɛ keyate ghəa nci wɛŋe wɛŋe. Katəkwə təkwə Zhɛgwəa təmə hɛ te yayata ŋkwa nya lə ŋkɛ. Nahe hɛ kembeɗeke geva hwa mbeli kezha nza kaka ghate kezha Shala ba'a kezha Zhɛgwə.

⁵Kegha mbeli kafa tseŋwə kwa mɛa nci we, beze te hɛ we.

⁶Kwa sebe ta ŋkɛ, pa 'ya nakɛ kwete nde ghwene ta Shala kazlə pelɛagha yitea ghweme. Ghena kwatenca nya ganyɛ nya kaghala ghala ya ve kezha geze nda ke mbeli nyi te hɛɗi: yayata hɛɗi, yayata yita, yayata ghena ba'a yayata hwelefe.

⁷Ma ke zlapete: «Hawe mə va Shala ba'a tsahe mə ŋkɛ. Kwa nza ŋkɛ nahe və kese kezha meha ghwə ŋkɛ te mbeli. Hawe mə va nde pate ghweme, hɛɗi, ndərə ba'a yɛ ɗasle.»

⁸Pa nde bake ta nde ghwene ta Shala zelete nde ghate, ma ke: «Nahe Babilone nya wəba keŋzla, nahe ŋkɛ keŋzla, ghenta nya kesahwe nda tɛa mefətekwəa nta ke pɛtɛa hwelefefi.»

⁹Pa nde maheke ta nde ghwene ta Shala zelete ka ghate nyi bake, ma ke zlapete: «Ma kenza wəndə kahawe va wəsə keseɗa ba'a pa ta ŋkɛ, ma kekemave lamba ŋkɛ mɛa kema keɗema te dzeve ne,

¹⁰katesa tɛa hwepe wənəa Shala, ghəa tɛ nya kwa zlerekwe ta hwepe wənəa ŋkɛ wəndəa shɛ perə. Katesa yaka ŋkɛ mbe ghwə ta gezla kwa kema ta ka ghwene ta Shala ganji ba'a kwa kema ta Zhɛgwə.

¹¹Kadzeme n'yia ghwə nya kesa nda yaka kwele kwele ke hɛ yitea ghweme kaghala ghala. Ndaŋe mbeli nyi kehawe va wəsə keseɗa ba'a pa ta ŋkɛ ke zhɛne mpi viɗi le veci, tsagha yayata wəndə nya kekemave lamba ta sləa ŋkɛ.»

¹²Vatse hi mbelia Shala, mbeli nyi kehawe va ghena nyi gezete ŋkɛ ba'a nyi keyɛte Yɛsə kanza kaka zereghe ghena.

¹³Kwa sebe ta ŋkɛ, pa 'ya fate ŋwələ sawa pelɛ ghwene, ma ke: «Rafete ghena nya: Zlama ya mbeli nyi kempə mbe slene ta Nde sleke ŋkwa tsetsenyanyɛ. Ma ke Sefəa Shala gezete: Kaganda ne, zlama ya va hɛ. Katezhɛne mpi hɛ va slene nyi dzawe dzawe nyi menete hɛ. Kwa nza ŋkɛ ne, kabeghe hɛ slene nyi menete hɛ.»

¹⁴Newe 'ya zhɛkwa ne, pa 'ya nakɛ ləmbə kwa tɛawetɛa, ntishɛ kwete wəndə te ləmbəa shɛ kala wəndə ŋelɛ. Derə mze kwa tere tere ya mbe ghəa ŋkɛ ba'a hwətə nya nale nale ya yitea dzeve ve.

¹⁵Pa kwete nde ghwene ta Shala shave mbe ghɛa Shala, ma ke zlapete nda ghena le berete ke wəndə nya mentishɛ te ləmbə: «Kelete hwətəa ŋa ba'a mene wəshi seyi te wəshi, kwa nza ŋkɛ nahe vəa mene wəshi se te wəve kese, nahe wəshi nyi te hɛɗi kenehe.»

¹⁶Tagha gɛ, pa wəndə nya mentishɛ te ləmbə neghakawa hwətəa ŋkɛ kadzete hɛɗi, pa wəshi menemte geva seyi te pɛtɛa hɛɗi.

¹⁷Pa kwete nde ghwene ta Shala shave mbe ghɛa Shala nya pelɛ ghweme, hwətə nya nale nale ya ve perə.

¹⁸Pa kwete nde ghwene ta Shala nya kesleke ghwə, shave mbe reghwetɛ. Ma ke zlapete nda ghena le berete ke wəndə nya nza hwətə nya nale nale ve: «Kelete hwətəa ŋa ba'a slamte yɛ ghwedzekwe ta rɛzɛŋe nyi te hɛɗi, nahe yɛ rɛzɛŋe kenehe.»

¹⁹Pa nde ghwene ta Shala negheyi hwətəa ŋkɛ te hɛɗi, slamte yɛ ghwedzekwe ta rɛzɛŋe nyi te hɛɗi ba'a beteyi hɛ kwa ŋkwa kehetəsə nya wəba ta hwepe wənəa Shala.

²⁰Pa mbeli ŋkeɗekɛ rɛzɛŋe pelɛke te wəmbəa meleme. Tagha gɛ, pa mimi nya kehwɛ same kwa ŋkwa keŋkeɗe rɛzɛŋe dzeme hwa'a yitea mɛa gədəwəa lɛmə ba'a pesleyi geva kakiləmɛtre gwəmsə mahekene.