Read kapsiki Ghena Kelɛŋə 17 Bible Online

Ghena Kelɛŋə 17 - kapsiki bible

Ghena Kelɛŋə 17

¹Pa kwete wəndəa ka ghwene ta Shala nyi mberefaŋe nyi nza nyi zlerekwe mberefaŋe va hɛ hendeke geva kase sha 'ya, ma ke: «Nde, 'ya katencɛ ŋa ghwə nya ketenza te male mefətekwə nya wəba. Ghenta ya kameleme nya wəba nya keŋate geva mɛa yɛ hələ kwele kwele.

²Nahe ka meghe nyi te hɛɗi kemenete mefətekwə le malea shɛ, nahe mbeli nyi te hɛɗi keghwəyinji va tɛa mefətekwəa nta.»

³Pa Sefəa Shala dzembe 'ya ba'a pa nde ghwene ta Shala keleghe ɗa kadzete ɓerama. Tagha ne, pa 'ya nakɛ male mentishɛ pelɛ wəsə keseɗa kwa ghɛmɛ. Ghə mberefaŋe ba'a tereme meŋe ya te wəsə keseɗa shɛ, bətə geva ta ŋkɛ mbe slə nyi keŋele Shala.

⁴Lekwesa ganji nyi ghɛmɛa ghɛmɛa ya kənəa malea shɛ, nahe nde kepesakɛ geva le wəshi mze kwa tere, pelɛ nyi nza zləvə te hɛ ba'a kweci wəshi kepesa geva. Zlerekwe mze kwa tere nya nza wəshi nyi ndiremi ndiremi kashasha nyi kese mbe mene mefətekwə ta nta pɛre te ya yitea dzeve ta nta.

⁵Slə nya nza ghena mbe tewəfərə ya kerafe rafe kwa kema ta nta: Babilone nya wəba, meghekɛa mi nyi kemene mefətekwə ba'a ŋa wəshi nyi ndiremi ndiremi kashasha te hɛɗi lema.

⁶Nahe 'ya kenakɛ malea shɛ keghwəyi ghwəyi va mimia mbelia Shala ba'a mimia mbeli nyi mpəmte mbeli va nza ta nci dɛŋe dɛŋe te Yɛsə. Ma vəa ŋkwa nya newe malea shɛ 'ya ne, hake 'ya nza ɗa.

⁷Tagha gɛ, ma ke nde ghwene ta Shala sha 'ya: «Va wa nza na hake wa? 'Ya katencɛ ŋa wəsə nya tewəfərə mbe ghena ta malea shɛ ba'a ŋa wəsə keseɗa nya nza ghə mberefaŋe ba'a tereme meŋe te, nya kekele ŋkɛ.

⁸Nahe wəsə keseɗa nya nakɛ nya na kese teghweme, ama mba ŋkɛ we. Katesame ŋkɛ kwa ki nya ɗema ghala kwa, ama kezha lə kaza. Ma mbeli nyi te hɛɗi nyi rafetema geva sləa nci te palepa ta mpi ghala pate geva yɛ hɛɗi le ghweme ne, katenza hɛ heheɓake va newe wəsə keseɗa shɛ. Kwa nza ŋkɛ teghweme se ŋkɛ vəashi, tsetsenya ne, mba ŋkɛ we, ama katezhɛne ŋkɛ kase.

⁹Nya ya kavə kefa wəshi laka ntsehwele. Nahe ghə nyi mberefaŋe kenza kaghweme mberefaŋe, nyi nza malea shɛ mentishɛ pelɛ. Ghenci ya kaka meghe mberefaŋe perə.

¹⁰Nahe kweci mbelia nci mcɛfe kebete, nde ŋkwaŋe ya mbe meghe tsetsenya, kenaka nde mberefaŋe kase we. Ma vəa ŋkwa nya tese ŋkɛ ne, deke və ɓɛhwɛ tetemə ŋkɛ.

¹¹Ma wəsə keseɗa nya kese teghweme vəashi ba'a nya keɗema mba shɛ ne, gheŋkɛ ya kande deghese ta meghe. Kwete ŋkɛ wəndəa nyi mberefaŋe, kateza ŋkɛ.

¹²Ma tereme nyi nakɛ nyi na meŋe ne, ka meghea kɛfi nyi kenakama kadzembe meghe. Ama katekemave berete kemene meghe hɛ le wəsə keseɗa kalerə kwetɛŋe.

¹³Nahe zəzə ta pɛtɛa ka meghea shɛhɛ kenza kanya kwetɛŋe: mene nda slene ke wəsə keseɗa le berete ta nci ba'a kwelea nci.

¹⁴Katempa hɛ le zhɛgwəa təmə, ama katehərə hɛ zhɛgwəa shɛ, kwa nza ŋkɛ nahe ŋkɛ kenza kaNde sleke ka sleke ŋkwa ba'a kameghea ka meghea kɛfi. Katehərə hɛ ŋkɛ le mbeli nyi hekakɛ ba'a nyi tsehave ŋkɛ, mbeli nyi dɛŋe dɛŋe te.»

¹⁵Ma ke nde ghwene ta Shala sha 'ya zhɛkwa: «Ma yɛmə nyi nakɛ nyi na, te ŋkwa nya nza male mefətekwə mentishɛ ne, ghenci ya kahwelefefi, kambeli kwele kwele, kayɛ hɛɗi ba'a kayɛ ghena.

¹⁶Kateɗema ntsə ta male mefətekwə tereme nyi nakɛ nyi na meŋe ba'a wəsə keseɗa. Katefəhwe wəshia nta hɛ ba'a kateve ŋkɛ hɛ mederelaŋe, katezeme geva ta nta hɛ ba'a katetere nya ketene hɛ le ghwə.

¹⁷Kwa nza ŋkɛ nahe Shala keveyi zəzə kemene ɗe ta ŋkɛ mbe ghəa nci. Ma tereme meŋe, geze ta ŋkɛ, ka meghea kɛfi tsa ghena ne, katejikə mehele ta nci kezha mene nda slene le berete ta nci ke wəsə keseɗa, hwa'a te və nya teyipə geva ghena nyi gezete Shala kadzawa.

¹⁸Ma male nya nakɛ nya na ne, ghenta ya kameleme nya wəba nya kesleke ka meghea kɛfi nyi te hɛɗi.»