Read kapsiki Ghena Kelɛŋə 21 Bible Online

Ghena Kelɛŋə 21 - kapsiki bible

Ghena Kelɛŋə 21

¹Kwa sebe ta ŋkɛ ne, pa 'ya nakɛ mɛnɛfɛa ghweme ba'a mɛnɛfɛa hɛɗi. Nahe kwa ghate ta ghweme ba'a kwa ghate ta hɛɗi kezanji, kezhɛne ndərə kanza we.

²Zhɛne ne, pa 'ya nakɛ meleme nya keveyi geva tekeleke, mɛnɛfɛa Zhɛrəzalɛm nya kesawa pelɛ ghweme, nya ghweneke Shala, kehi hi kala male nya kepɛaɗɛkɛ geva kezha lə kabegeme le za nta.

³Pa 'ya fate ŋwələa nya le berete sawa pelɛ pasla, ma ke: «Tsetsenya ne, nahe ŋkwa kenza ta Shala kenza hwa mbeli. Katenza ŋkɛ hwa hɛ, katenza hɛ kambelia ŋkɛ. Katenza Shala le ghəa ŋkɛ hwa hɛ, katenza ŋkɛ kaShala ta nci.

⁴Katesehwe pɛtɛa nehwene ŋkɛ yitea ntsə ta nci. Katezhɛne mte kanza shɛ we, katezhɛne nehwene, ya ŋgaɗe ghə, ya yaka kanza shɛ we. Kwa nza ŋkɛ nahe wəshi nyi vəashi keza.»

⁵Tagha gɛ, ma ke wəndə nya mentishɛ pelɛ pasla: «Ma tsetsenya gɛ, 'ya kezhɛre pɛtɛa wəshi kamɛnɛfɛ.» Zhɛne ne, ma ke sha 'ya: «Rafete wəsə nya, kwa nza ŋkɛ nahe yɛ ghena ta ɗa kenza kakaganda ba'a tiɗiɗi.»

⁶Zhɛne ne, ma ke mtsehete: «Nahe ŋkɛ kemenete geva tsetsenya gɛ! 'Ya ya kaAlfa, 'ya ya kaOmɛga, gha ba'a keɗaŋe. Ma wəndə nya shewə va ndere ne, kateve nda ɗaslea yɛməa mpi 'ya kezha sa gəmə.

⁷Ma yayata wəndə nya ketehərəte ŋkwa ne, katekemave wəsəa shɛ ŋkɛ va 'ya, katenza 'ya kaShala ta ŋkɛ, katenza ŋkɛ kawəzege ta ɗa.

⁸Ama kaŋa ka ghazlənəa kɛfi, ka nzama dɛŋe dɛŋe, ka mene wəshi nyi ndiremi ndiremi kashasha, ka mpə ŋkwa, ka vale tahe, ka mene ghwɛ, ka hawe va wəshi nyi zhɛrete mbeli kashala ba'a pɛtɛa ka tseŋwəa kɛfi ne, katenza ŋkwa nci kwa ndərəa ghwə ta gezla. Gheŋkɛ ya kakwa bake ta mte.»

⁹Pa kwete wəndəa ka ghwene ta Shala nyi mberefaŋe nyi nza nyi zlerekwe nyi pɛre pɛre va va ka keɗaŋe ta ndiremi nyi mberefaŋe se sha 'ya, ma ke: «Nde, 'ya katencɛ ŋa makwa, male ta Zhɛgwəa təmə.»

¹⁰Pa Sefəa Shala dzembe 'ya ba'a pa nde ghwene ta Shala keleghe ɗa kadzeme ghəa ghweme nya biya. Pa ŋkɛ ncɛte ɗa meleme nya keveyi geva tekeleke, Zhɛrəzalɛm nya kesawa pelɛ ghweme, nya ghweneke Shala.

¹¹Kaslesla ŋkɛ va zləvəa Shala. Kaslesla melemea shɛ kala pelɛ nya nza zləvə te, kala pelɛ kwa nɛ nɛ nya welɛlɛ kala kwacaregesla.

¹²Zli nya biya ba'a nya ɓəsəɓə ya dzeyi yite, mɛ degha ya meŋe bakeghəmbe te, meŋe bakeghəmbe ka ghwene ta Shala nyi keya mɛa degha shɛhɛ. Nahe sləa hwelefefia Israyɛl meŋe bakeghəmbe kerafete geva te mɛ degha shɛhɛ.

¹³Mɛ degha maheke ya laka yayata bela: mahekene laka ŋkwa kesame ta veci, mahekene laka bela kwa gwela, mahekene laka bela kwa zeme ba'a mahekene laka ŋkwa kepəkwə ta veci.

¹⁴Pelɛ meŋe bakeghəmbe ya kashihəa zlia ŋkɛ, te pelɛa shɛhɛ rafete geva sləa ka ghwene nyi meŋe bakeghəmbe ta Zhɛgwə.

¹⁵Ma nde ghwene ta Shala nya kegezete ɗa ghena ne, wəsə kedzeghe wəsə, cafecɛ mze kwa tere tere ya yitea dzeve ta ŋkɛ kezha dzeghe meleme, yɛ mɛa degha ta ŋkɛ ba'a zlia ŋkɛ.

¹⁶Nahe melemea shɛ kenza kakwa zlerehwaŋe: yipə yipə biya ta ŋkɛ le bezlea ŋkɛ. Pa nde ghwene ta Shala dzeghete melemea shɛ le cafecɛa ŋkɛ: kilemɛtre 2.400 biya ta ŋkɛ, bezlea ŋkɛ ba'a dzeme ghweme ta ŋkɛ.

¹⁷Pa nde ghwene ta Shala dzeghete zli kamɛtre ŋkwaŋemsə ŋkwaŋeghəmbe kadzeme yitea ghweme, kala nya dzeghe wəsə wəndə ŋelɛ perə.

¹⁸Le pelɛ kwa nɛ nɛ ŋate geva zlia shɛ, le mze kwa tere tere nya ganyɛ, nya welɛlɛ kala kwacaregesla ŋate geva meleme.

¹⁹Nahe shihəa zli nya yitea meleme kepesakɛ geva le mama pelɛ nyi nza zləvə te hɛ: nahe kwa ghate ta pelɛa shihə kenza le pelɛ kwa nɛ nɛ, kwa bake, le pelɛ kwa lɛa lɛa ghweme, kwa maheke, pelɛ kwa jiɓe jiɓe, kwa wəfaɗe, le pelɛ kwa mede mede,

²⁰kwa mcɛfe, le pelɛ kwa gheme, kwa ŋkwaŋe, le pelɛ kwa ghɛmɛ, kwa mberefaŋe, le pelɛ kwa nɛ nɛ, kwa deghese, pelɛ kwa gheme gheme, kwa mesli, pelɛ kwa rəghwə rəghwə, kwa meŋe, pelɛ kwa sleke sleke, kwa meŋe kwetɛŋeghəmbe, pelɛ kwa gatawəfa gatawəfa, kwa meŋe bakeghəmbe, pelɛ kwa ndereme ndereme.

²¹Nahe mɛ degha nyi meŋe bakeghəmbe kenza kawəshi kepesa geva meŋe bakeghəmbe. Nahe yayata mɛ degha kenza kawəsə kepesa geva kwetɛŋe. Nahe ŋkwa nya mbe melemea shɛ kenza le mze kwa tere tere nya ganyɛ nya welɛlɛ kala kwacaregesla.

²²Kenakɛ ghɛa Shala 'ya mbe melemea shɛ we, kwa nza ŋkɛ Mahwətə Shala nde berete ba'a Zhɛgwə ya kaghɛa Shala ta ŋkɛ.

²³Kezha nza waŋe ŋkwa ne, kaɗe veci, ya tere melemea shɛ we, kwa nza ŋkɛ zləvəa Shala nde waŋe ŋkɛ ba'a Zhɛgwə ya kapaterela ta ŋkɛ.

²⁴Katedzeghwa hwelefefi yitea waŋe ta ŋkɛ, katefə mcɛləa nci ka meghea kɛfi nyi te hɛɗi kase kadzembe.

²⁵Katenza mɛ degha nyi te melemea shɛ teghwene kavəghwə, katenza hɛ keŋzle ŋzle tɛape we, kwa nza ŋkɛ ne, katezhɛne viɗi kanza mbe melemea shɛ we.

²⁶Katefə zləvə ba'a mcɛləa hwelefefi mbeli kase kadzembe.

²⁷Ama katedzembe melemea shɛ wəsə kwa wale wale we, katedzembe mbeli nyi kemene wəshi nyi ndiremi ndiremi kashasha ba'a ka tseŋwəa kɛfi perə we. Deke mbeli nyi nza sləa kerafe rafe te palepa ta mpi ta Zhɛgwə ka tedzembe.