Read kapsiki Ghena Kelɛŋə 4 Bible Online

Ghena Kelɛŋə 4 - kapsiki bible

Ghena Kelɛŋə 4

¹Ma kwa sebe ta ŋkɛ ne, pa 'ya nakɛ kwete wəsə zhɛkwa: nahe mɛ degha keghwenemte geva pelɛ ghweme. Ma ke ŋwələ nya fate nya 'ya kagaka le berete kala vɛ ta veke vəashi sha 'ya: «Same ŋa teke, 'ya ketencɛ ŋa wəsə nya ketemene geva te kwete hɛ.»

²Te ŋkwa shɛnyɛ ne, pa Sefəa Shala keseve ɗa. Pa 'ya nakɛ pasla pelɛ ghweme. Mentishɛ kwete wəndə pelɛ pasla shɛ.

³Kaslesla wəndəa shɛ kala pelɛ kwa nɛ nɛ ba'a pelɛ kwa ghɛmɛ nyi nza zləvə te hɛ. Dzasle pasla shɛ kwa maɓelɛaŋe nya keslesla kala pelɛ kwa mede mede.

⁴Dzeyi yitea pasla shɛ ne, kweci pasla ya shɛ bakemsə wəfaɗeghəmbe, nyi nza mbelia jama bakemsə wəfaɗeghəmbe pelɛ pasla shɛhɛ, mbe lekwesa kwa tɛawetɛa ba'a le derə mze kwa tere tere mbe ghəa nci.

⁵Sawa pelɛ pasla shɛ ne, kaslesla va, kagaka yɛ ŋwələ ba'a kaberazlɛ va. Paterela nyi ketse ghyanake nake ya mberefaŋe kwa kwa kema ta pasla shɛ, ghenci ya kasefə mberefaŋe nyi kese va Shala.

⁶Ma te kema ta pasla ne, kwete wəsə ya shɛ ɗake ɗake kala ndərə, welɛlɛ kala kwacaregesla. Ma te tepe, dzeyi yitea pasla shɛ ne, wəshi keseɗa ya shɛ wəfaɗe, nyi nza ntsə kwa kema ba'a kwetere ghə va hɛ.

⁷Nahe kwa ghate ta wəsə keseɗa kenza kala nivɛrə, kwa bake, kala mca nya kawəzege. Kala kema ta wəndə ŋelɛ kema ta kwa maheke. Nahe kwa wəfaɗe kenza kala zele nya kezlə.

⁸Bidzə nyi bətə mbe ntsə, pelɛke te wəmbə ba'a mbe mbe ya ŋkwaŋe te yayata wəndəa wəshi keseɗa nyi wəfaɗea shɛhɛ. Ma ke hɛ sha gha cimə veci le viɗi kaɗema kafɛa yite: «Tekeleke, tekeleke, tekeleke veyi geva Mahwətə Shala nde berete, nya kenza shɛ, nya kese ba'a nya ketese!»

⁹Ma mbe yayata və nya tsahe, nya ve zləvə ba'a nya tsa nda hana wəshi keseɗa nyi wəfaɗea shɛhɛ ke wəndə nya mentishɛ pelɛ pasla, gheŋkɛ nya kaghala ghala ne,

¹⁰kagwəɗəŋə mbelia jama nyi bakemsə wəfaɗeghəmbe kwa kema ta wəndə nya mentishɛ pelɛ pasla, kahawe hɛ va wəndə nya kenza kaghala ghala. Tereke hɛ sha derə meghea nci te kema ta pasla, ma ke hɛ:

¹¹Mahwətə Shala ta n'yɛ, gha nde hi kakemave zləvə, kwele ba'a berete. Kwa nza ŋkɛ gha nde pate wəshi pɛtɛ, va nya ɗete nza ta nci na nda se hɛ kapate geva.