Read kapsiki Rət 2 Bible Online

Rət 2 - kapsiki bible

Rət 2

¹Le kwete wəndə shɛ kwa yita ta Ɛlimɛlɛk, za Nowɛmi kande berete, kande mcɛlə, nya nza sləa ŋkɛ kaBowoz.

²Ma ke Rət wəzha ta ka Mowab sha Nowɛmi: «Kaɗe 'ya kadzemte kavɛane zləkə kwa sebe ta mbeli. Nda kwete kazhɛakɛ heli kwete wəndə yitea 'ya.» Ma ke shɛ: «Kwiɗi wəzha ta ɗa!»

³Cape nde kadzemte kavɛane zləkə mbe wəve kwa sebe ta ka cɛsle ha. Ma newe ke ne, mbe wəvea Bowoz nya kwa yita ta Ɛlimɛlɛk nde.

⁴Temə vireɗi, pɛkwe Bowoz se mbe Bɛtelɛhɛm kadzemte, pa njiŋwakɛ ka tsa ha, ma ke: «Pa Shala nza le gheyɛ!» Ma ke hɛ zhɛnete nda: «Pa Shala wəpikɛ ŋa.»

⁵Ma ke Bowoz 'yɛwakɛ va wəndə kwelea ka cɛsle ha: «Ŋa wa jɛmbezlɛa male nya wa?»

⁶Ma ke wəndə kwelea ka mene ha shɛ: «Wəzha ta ka Mowab nya kezhɛneke geva le Nowɛmi se mbe Mowab.

⁷Nahe nde kesəkwəve hweŋkwa va 'ya kezha vɛane zləkə kwa sebe ta ka cɛsle ha. Ghala se nde masheke ne, slene yamene nde shanda pa tsetsenya kese kalə sha ghɛ kazhɛne mpi ya ci'a we.»

⁸Ma ke Bowoz sha Rət: «Fate ghena ta ɗa megela wəzha ta ɗa, mba na kelə kavɛane zləkə mbe wəvea kwete wəndə, mba na kenza cakeɗake le mi nyi kemene ɗa slene nyi.

⁹Newe wəve nya mene slene nya hɛ mbe, nda lə na kwa sebe ta nci. Nahe 'ya kegezete nda ke ka mene ɗa slene yagha wəndə tekwaɗe ŋa. Ma kezhɛ ŋa ndere ne, lə yalə na kasa yɛmə nya gəke hɛ kwa ghwelepe.»

¹⁰Pa Rət gwəɗəŋə ntiŋə ghə mbe hɛɗi, ma ke sha Bowoz: «Tsema menete ɗa ganyɛ na kwele kwele kala nya, ndagwara kamentiɓə 'ya wa?»

¹¹Ma ke Bowoz zhɛnete nda: «Nahe mbeli kegezemte ɗa wəsə nya menete nda na ke meghekɛa za ŋa ghala mte za ŋa, nahe na kesərəakɛ yiteyɛ ŋa, meyɛ ŋa, hɛɗi nya ya na te, kezha lə sha hwelefe nya ɗepema na ghalanza.

¹²Pa Mahwətə ŋkikɛ ŋa ganyɛa ŋa kwele kwele, Shala Mahwətə ta ka Israyɛl, nya wəfərə ŋa na kwa ghwədərəa ŋkɛ.»

¹³Ma ke Rət shɛ: «Nde sleke ɗa, ganyɛke na laka 'ya. Nahe na kegweɗakwete ɗa, nahe ghena ta ŋa kedzawa wənəa ɗa, ndagwara keyipəte geva 'ya le mi nyi kemene ŋa slene nyi we.»

¹⁴Ma kwa naka və kezeme ɗafa ne, ma ke Bowoz shɛ: «Hende geva kaseyi yitea ɗafa, mzate nɗeli te ɗafa ta ŋa.» Pa ntishɛ nda vare ka mene slene. Pa hɛ ndeke nda ha kwa pesa pesa. Pa zehwe behe ve, pa veyi nya ketene ve.

¹⁵Pelɛhetɛme nde sate kavɛane zləkə, ma ke Bowoz sha ka mene slene ta ŋkɛ: «Pa yɛ sərəakɛ kavɛane pa dzeyi yitea ghwɛpɛ, mba yɛ kepəli nda hawe.

¹⁶Ntentamte mə yɛ ghəa ha seyi te yɛ ghwɛpɛ ba'a bebeteyi mə hɛ dzeyi hwa hɛɗi kezha tseha hɛ nde. Ŋelema ŋkɛ yɛ ma.»

¹⁷Ntake nde kavɛane zləkə pa va tɛhwɛɗi, pa nde lekemte ha nyi tsehave nde. Pa viɗikɛ behwe nya wəba le megi.

¹⁸Pa keleghe behwea shɛ kajɛghɛ ba'a pa ncɛte nda ke meghekɛ za nta. Pa nde kelakame wəsə kezeme nya ketene ve sheke kwamte kandeke nda ke Nowɛmi perə.

¹⁹Ma ke meghekɛ za nta shɛ: «Tema tsehave ha nya na ɓeshi wa? Mbe wəvea wa se na kamene slene wa? Pa Shala wəpikɛ wəndə nya kezəzəte ŋa nya.» Pa ɓelamte nda wəshi nyi kemenete nda geva ke meghekɛa za nta. Zhɛne ne, ma ke shɛ: «Ma wəndə nya menete slene 'ya mbe wəvea ŋkɛ ne, Bowoz sləa ŋkɛ.»

²⁰Ma ke Nowɛmi shɛ: «Pa Mahwətə wəpikɛ, gheŋkɛ nya keɗema kafɛa yitea mene nda ganyɛa ŋkɛ ke mbeli nyi teghweme ba'a ke nyi kempə mpə.» Ma ke Nowɛmi ɓiyitsa: «Kande zeme ghɛa gheɓəmə wəndəa shɛ, hwa mbeli nyi kehi kanewe ghweme te gheɓə ŋkɛ.»

²¹Ma ke Rət, kwa Mowab shɛ: «Nahe ŋkɛ kegezete ɗa kezha vɛane ha kwa sebe ta ka mene slene ta ŋkɛ hwa'a te və nya temenemte wəshi hɛ pɛtɛ seyi te wəve perə.»

²²Ma ke Nowɛmi sha Rət: «Tsagha shɛ wəzha ta ɗa, mene mə slene le hɛ, mba na kedzembe wəvea kwete wəndə yagha mbeli tesa ŋa yaka ma.»

²³Kalə nde kezha vɛane zləkə yitea mi nyi kemene nda slene ke Bowoz hwa'a te və nya lekemte megi ba'a ha mbeli. Pa nza nda yitea meghekɛa za nta.