Read kapsiki 1 Saməyɛl 1 Bible Online

1 Saməyɛl 1 - kapsiki bible

1 Saməyɛl 1

¹Kwete wəndə ya shɛ kese mbe Rama, meleme nya hwa ghweme ta Ɛfrayim, te hɛɗia Səwf, nya nza sləa ŋkɛ kaƐlkana. Wəzege ta Yerowam nya kawəzege ta Ɛlihəw, wəzege ta Tohəw ba'a wəzege ta Səwf, nde Ɛfrayim ŋkɛ.

²Bake wəmeve mi ŋkɛ: Ane sləa kwa ghate, Penina sləa kwa bake. Ŋwale ya va Penina, ama wəzege va Ane we.

³Keva keva slə Ɛlkana se mbe meleme ta ŋkɛ kadzeme Silo kahawe va Mahwətə, Shala nde berete ba'a kadzeghe nda melɛ. Nahe ŋwale tezhilia Hɛli nyi bake kenza kaka dzeghe nda melɛ ke Mahwətə: yɛ Hofni le Pinhas.

⁴Ma vəa ŋkwa nya dzeghe Shala Ɛlkana, kaŋa nda slia wəsə keseɗa nya dzeghe melɛa shɛ ŋkɛ le ŋkɛ ke Penina kala nya seneve ŋkɛ, tsagha ke pɛtɛa ŋwale tezhili ba'a pɛtɛa ŋwalea kwɛa nta.

⁵Ama pa ŋkɛ ndeke nda bela nya za ma ke Ane, kwa nza nde kwele kwele ɗehwe ŋkɛ ŋkɛ ya Mahwətə zhɛrete ŋkɛ kajɛŋa.

⁶Ma Penina perə ne, kefɛa nde kebeze nda wənə ke Ane laka ghena nyi geze nde we. Kwa nza ŋkɛ ne, nahe Mahwətə keveyi ŋkɛ kajɛŋa.

⁷Keva keva mene Ɛlkana kala nyagha. Kala və nya dzembe ghɛa Mahwətə Ane ne, tsagha shɛ beze nda wənə Penina. Ma te kwete va kwa nza Ane kanehwene ba'a kaɗema wəsə kezeme ne,

⁸ma ke za nta Ɛlkana shɛ: «Ane, yitea wa nehwene na wa? Va wa ɗema na kazeme wəsə wa? Yitea wa nza na le kema teheɗe wa? Kenza 'ya za ma kaŋa ŋa ke ŋwale tezhili meŋe wəka?»

⁹Ma kwa zehwe wəshi kezeme ba'a kwa sahwe wəshi mbeli pelɛ Silo ne, pa Ane sate nda te ŋkwa. Mentishɛ nde dzeghe Shala Hɛli te tsəkwələa ŋkɛ vare gelembe nya mɛa ghɛa Mahwətə.

¹⁰Ma kwa bezenyɛ wənəa Ane kwele kwele, ntake nde kasəkwə Mahwətə le nehwene sərəɓə sərəɓə.

¹¹Pa ŋkɛ menete nda meɗe mɛ, ma ke: «Mahwətə nde berete, kezlaɓa na ne, newakɛ yaka nya te 'ya, zəzəte ɗa, zaghə ɗa ma na ma. Ndeke ɗa wəzege teza, 'ya nya kakwatera ta ŋa, kateve ŋa ŋkɛ 'ya kaghala ghala kala nza ta hɛa ŋkɛ te hɛɗi. Katesla shintia ghəa ŋkɛ mbeli tɛape we.»

¹²Kala temə ta səkwə ghə ta Ane mbe kema ta Mahwətə, vereghe yavereghe mɛa nta Hɛli.

¹³Mbe ghəa nta geze ghena Ane, deke bəzhia mɛa nta nde gaŋkəɗə, ama kafate ghena ta nta mbeli we. Ma zəzə Hɛli kaghate ne, keghwəyi yaghwəyi nde.

¹⁴Ma ke shɛ: «Kavə tsema tenza na keghwəyi ghwəyi wa? Kwiɗi wetɛaŋemte ghwəyi ta ŋa!»

¹⁵Ma ke Ane shɛ: «Nde sleke ɗa, male kwa zlere zlere 'ya we, kesakɛ tɛ keɗema wəsə keghwəyi ŋkwa 'ya we. Ghena nya mbe wənəa ɗa yancɛ nda 'ya ke Mahwətə.

¹⁶Mba na kenewe ɗa kala male nya ɗema mehele mbe ghə ve. Va zəzə nya kwele kwele kwa wənəa ɗa ba'a yaka nya te 'ya nza 'ya mba kasəkwə ghə 'ya pa tsetsenya.»

¹⁷Ma ke Hɛli: «Kwiɗi le kwelɛŋe. Pa Shala ta ka Israyɛl ndeke ŋa wəsə nya 'yɛwe na ve!»

¹⁸Ma ke Ane shɛ: «Ma gha perə ne, nza le ganyɛa mehele ta ŋa laka kwaterashia ŋa!» Cape nde yitea dzeghwa ta nta. Pa nde zehwe wəsə kezeme, kezhɛne nde kanza le kema teheɗe kala nya se nde we.

¹⁹Masheke masheke te hendɛ ta ŋkwa ne, pa yɛ Ɛlkana sate te ŋkwa le mbelia ŋkɛ, gwəɗəŋə kaŋa ghə mbe kema ta Mahwətə kahawe ve, kwetere wəmbəa ŋkɛ, pa hɛ zhɛneghe geva sha ghɛa nci mbe Rama. Pa Ɛlkana ɓelahe le male ta ŋkɛ Ane, pa Mahwətə yipəyi nda səkwə ta nta kwa.

²⁰Ma kwa senyɛ və ne, njehe Ane dzawa hwə nda, pa nde yake tezhɛa nta. Tagha gɛ, ma ke: «Ma va nya səkwəve ŋkɛ 'ya va Mahwətə ne, 'ya kaheka nda slə kaSaməyɛl.»

²¹Kwetere wəmbəa ŋkɛ, pa Ɛlkana zhɛneghe geva kadzeme Silo le mbelia ŋkɛ pɛtɛ kezha dzeghe nda melɛ ke Mahwətə kala nya seneve hɛ kamene keva keva ba'a kezha yipəyi meɗe mɛa ŋkɛ kwa.

²²Ama kese Ane kadzeme kwetere wəmbəa za nta te nyagha və we, ma ke shɛ: «'Ya kaneghe kezha fɛa wəzege yitea ŋ'wa nda tekele ŋkɛ 'ya kadzeme kancɛ nda ŋkɛ ke Mahwətə, kezha nza ŋkɛ tagha fəyitekeghə.»

²³Ma ke za nta Ɛlkana shɛ: «Menete kala nya nakɛ na megela. Nza teke le gheŋkɛ hwa'a te və nya tefɛa ŋkɛ yitea ŋ'wa. Pa Mahwətə yipəyi ghena ta ŋkɛ nya meɗeyi ŋkɛ kwa.» Mba Ane tagha kasa nda ŋ'wa ke wəzege ta nta vaŋe te və nya fɛa ŋkɛ yitea ŋ'wa.

²⁴Ma kwa slamte Saməyɛl Ane yitea ŋ'wa, mba ŋkɛ ɓɛhwɛ ne, pa nde keleghe ŋkɛ kadzeme ghɛa Shala pelɛ Silo le mca nya keva mahekene, behwea hə ba'a ghwelepe ta tɛ.

²⁵Pa hɛ dzeghekɛ melɛ le mca shɛ ba'a keleghe nda wəzege ke Hɛli.

²⁶Ma ke Ane sha Hɛli: «Təhwə təhwə nde sleke ɗa, kwa nza nde teghweme na ne, 'ya ya kamale nya kese meghereŋe teke terasle vare gha kezha səkwə Mahwətə.

²⁷Kezha ŋ'wete wəzege nya se 'ya kasəkwə ghə. Nahe Mahwətə kendeke ɗa wəsə nya se 'ya ka'yɛwe ve.

²⁸Ma 'ya ɓiyitsa gɛ, kave nda ŋkɛ 'ya ke Mahwətə, kawəndə nya keveyi geva kaŋa Mahwətə tenza ŋkɛ kaghala ghala.» Pa Saməyɛl gwəɗəŋənyɛ tagha mbe kema ta Mahwətə.