Read kapsiki 1 Saməyɛl 10 Bible Online

1 Saməyɛl 10 - kapsiki bible

1 Saməyɛl 10

¹Pa Saməyɛl kelete tereme ta n'yi, shekeyi nda ŋkɛ kwa ghə ke Sawəl. Pa ŋkɛ həməwəve ŋkɛ, ma ke shɛ: «Nahe Mahwətə le ghəa ŋkɛ nde veyi ŋa tekeleke kezha nza te ghəa mbelia ŋkɛ.

²Sləma ta ŋa yitea 'ya ɓeshi ne, katebegeme na le kweci mbeli bake dekwede yitea kwele ta Rashɛl, kwelɛ ghala ta hɛɗia Bɛnjamɛn, mbe Sɛlsa. Ma ke hɛ sha tegeze ŋa: ‹Nahe mbeli kesepate kwara ŋemi nyi lə na kazele, ama tsetsenya, nahe yiteyɛ ŋa kezamte ghena ta kwara yitea ghə, gheyɛ yazəzə ŋkɛ ɓiyitsa ba'a wəsə nya nza ŋkɛ kamenete kezha ntsate wəzege ta ŋkɛ ya'yɛwe ŋkɛ.›

³Se tagha, katelə na kantsehe hwa'a yitea cɛana ta Tabor. Tagha tebegeme na le kweci mbeli mahekene nyi kedzeme sha Shala pelɛ Bɛtɛl, kwi mahekene ya va kwete wəndəa nci, ɗafa mahekene ya va kwete, tɛ ya kwa slibə hweta va kwete.

⁴Katenjiŋwe ŋa hɛ ba'a kateve ŋa ɗafa hɛ bake: katekele hɛ na va hɛ.

⁵Kwetere wəmbəa ŋkɛ, katedzeme ghweme ta Gibɛya-Ɛlohim na, nya nza mbeli nyi jama jama ta ka Filisti pelɛ. Slə tagha ne, katedzembe meleme na, katebegeme geva na le wəvəsəa ka mɛ ŋkwa ta Shala nyi kesawa pelɛ ghəa wəmbə, mbe kema ta nci ka tsa yɛ getsepele, yɛ dɛŋwə, yɛ shela ba'a ŋgwəleŋə, katezlape ghena kelɛŋəa Shala hɛ.

⁶Katedzeghəa gha Sefəa Mahwətə, katezlape ghena kelɛŋəa Shala na zlaɓe le hɛ ba'a katezhɛre na kakwete wəndə.

⁷Ma kenakɛ wəshi kencɛ wəshi nyighɛ na kemenete ŋa geva gɛ ne, menete nya nakɛ na kawəsə kemene, va nya nza ŋkɛ le gha Shala.

⁸Mpelɛa ma tedzawa Gilgal na ke 'ya. Ma 'ya le ŋa ɗa, katedzawa 'ya sha gha kezha dzeghe melɛ kwa tere tere ba'a melɛ kejikə ghə. Mbe hɛ mberefaŋe neghe ɗa na nda tedzawa 'ya kageze ŋa wəsə nya temene na.»

⁹Zhɛrete ma ta Sawəl ke wəmbə kwa nehe ŋkɛ le Saməyɛl ne, pa Shala zhɛrete wənəa ŋkɛ, pɛtɛ wəshi kencɛ wəshi nyighɛ menete geva te vecia shɛnyɛ.

¹⁰Ma kwa ntsehe hɛ kwa Gibɛya, newe ŋkɛ ne, wəvəsəa ka mɛ ŋkwa ta Shala nyagha kase shɛ. Pa sefəa Shala dzembenyɛ mbe, ntake ŋkɛ kazlape ghena ta Shala hwa hɛ.

¹¹Pɛtɛa mbeli nyi keɗepe ghalanza kenakɛ ŋkɛ kazlape ghena ta Shala hwa ka mɛ ŋkwa, Ma ke mbeli gezete kwelɛ ghəa nci: «Wa wəsə nya kemenete nda geva ke wəzege ta Kish wa? Sawəl kwete hwa ka mɛ ŋkwa ta Shala na?»

¹²Ma ke kwete nde Gibɛya zhɛnete: «Wa yiteyɛa nci wa?» Vatse nda gezete geva ghena nya kaghena ŋela nya, ma ke: «Nahe Sawəl kezhɛrenyɛ kande mɛ ŋkwa ta Shala na?»

¹³Ma kwa nahemte zlape ghena ta Shala ŋkɛ, ntəŋə ŋkɛ kadzeme ghəa kələŋə.

¹⁴Ma ke kwesegwenyɛ sha yɛ Sawəl le nde mene slene ta ŋkɛ: «Tema dzeghwa ŋayɛ yɛ wa?» Ma ke Saməyɛl shɛ: «Ghen'yɛ se kazele kwara ŋemi, ama kenakɛ hɛ ghen'yɛ we, vatse lə n'yɛ ghen'yɛ sha Saməyɛl.»

¹⁵Ma ke kwesegwenyɛ sha Sawəl zhɛkwa: «Gezete ɗa ghena nyi gezete ŋayɛ Saməyɛl.»

¹⁶Ma ke Sawəl shɛ: «Nahe ŋkɛ kegezete n'yɛ tiɗiɗi nahe mbeli kesepate hɛ.» Ama kese ŋkɛ kageze nda ghena ta meghe nya gezete nda Saməyɛl we.

¹⁷Pa Saməyɛl tsenete mbeli pelɛ Mispa mbe kema ta Mahwətə,

¹⁸ma ke gezete nda ke ka Israyɛl: «Wa nya ghena ta Mahwətə, Shala ta ka Israyɛl nya: ‹Nahe 'ya kefəakave ka Israyɛl shave mbe Ɛzhipte, nahe 'ya kembelemte ŋayɛ shave mbe dzeve ta ka Ɛzhipte ba'a shave mbe dzeve ta kweci ka meghe nyi kese kasa ŋayɛ yaka.›

¹⁹Ama ɓeshi ne, nahe yɛ keneghamte Shala ta ŋayɛ nya kekelemte ŋayɛ shave mbe yaka ba'a ɗa nya te gheyɛ, ma pe yɛ gezete nda: ‹Ndeke n'yɛ meghe!› Ma tsetsenya gɛ, sleke mə geva mbe kema ta Mahwətə ke hwelefe ke hwelefe ba'a keyita keyita.»

²⁰Pa Saməyɛl tsenete pɛtɛa hwelefefi nyi mbe Israyɛl, pa kwasheghediɗi ntave hwelefe ta Bɛnjamɛn.

²¹Pa ŋkɛ tsenete hwelefe ta Bɛnjamɛn keyita keyita, pa yita ta Matri ntave geva. Ɓiyitsa, Sawəl, wəzege ta Kish nde ntave geva. Ntəŋə mbeli kazele ŋkɛ, ama shaŋe mbeli ve.

²²Ma ke mbeli 'yɛwete va Mahwətə zhɛkwa: «Kwete shɛ wəndə kese teke na?» Ma ke Mahwətə zhɛnete: «Wa nyagha mə ŋkɛ terasle vare slibə kedzehwa mte.»

²³Ntəŋə mbeli le hwɛ kalə kasepa ŋkɛ, pa ŋkɛ sate ba'a ncɛte ghəa ŋkɛ te tepe ta mbeli. Biya ma ŋkɛ ke pɛtɛa mbeli!

²⁴Ma ke Saməyɛl sha mbeli: «Nahe yɛ kenakɛ wəndə nya ntave Mahwətə gɛ! Wəndə nya kala gheŋkɛ hwa mbeli tɛape we.» Tagha gɛ, pɛtɛa mbeli katsa gaghwe, ma ke hɛ: «Ka! Ka! Same meghe!»

²⁵Pa Saməyɛl gezete nda wəshi mahalegəa nza ta meghe ke mbeli, pa ŋkɛ rafete hɛ te palepa ba'a veyi mbe kema ta Mahwətə. Kwetere wəmbəa ŋkɛ, pa ŋkɛ gezete nda ke mbeli kaslə, yayata wəndə sha ghɛa ŋkɛ.

²⁶Ntəŋə Sawəl perə kadzawa ghɛa ŋkɛ kwa Gibɛya. Pa ka katsala kɛfi nyi ndeke nda Shala beghakɛ ŋkɛ.

²⁷Ama ma ke kweci mbeli nyi wale wale sha se kageze: «Tsema nza wəndə nya kayate ɓəmə wa?» Pa hɛ ɗema ghena ta ŋkɛ, hɛreɗɛ hɛ ɗema ɗa nda wəsə. Ama ketsakɛ Sawəl ŋkɛ we.