Read kapsiki 1 Saməyɛl 11 Bible Online

1 Saməyɛl 11 - kapsiki bible

1 Saməyɛl 11

¹Cape Nahash, meghea ka Amon kadzeme le mpa sha Yabɛsh pelɛ Gala'ad. Ma ke mbeli nyi mbe Yabɛsh sha Nahash: «Slekete hweŋkwa ta jikə geva le ghen'yɛ nda mene ŋa slene n'yɛ.»

²Ama ma ke Nahash, nde Amon zhɛnete nda ke hɛ: «Kateyɛ ŋayɛ 'ya, ama wa nya wəsə nya temene ŋayɛ 'ya nya nda nza 'ya kayɛte: nda 'ya kantsamte ntsə kwa zeme te yayata wəndə hwa gheyɛ. Ma tsagha, pa 'ya vate hawe te pɛtɛa ka Israyɛl.»

³Ma ke mbelia jama ta ka Yabɛsh shɛ: «Ndeke n'yɛ və kahɛ mberefaŋe kezha ghwenakɛ mbeli ka ghwene ta n'yɛ ghen'yɛ kadzembe hɛɗia Israyɛl pɛtɛ. Ma keɗema wəndə shɛ kase kaya n'yɛ ne, katelə ghen'yɛ kanza mbe dzeve ta ŋa tsagha.»

⁴Pa ka ghwene shɛhɛ dzembe Gibɛya, meleme ta Sawəl ba'a ɓelate nda ghena shɛhɛ kwa sleme ta mbeli pɛtɛ. Ntake mbeli pɛtɛ katsa lewela ba'a kanehwene.

⁵Ma yipə yipə le vəa shɛ, pɛkwe Sawəl se kwamte kwetere wəmbəa sla ta ŋkɛ, ma ke: «Wa nde menete nda geva ke mbeli nda nehwene hɛ wa?» Pa mbeli gezete nda ghena nyi gezeke ka Yabɛsh.

⁶Ma kwa fate ghena shɛhɛ Sawəl ne, pa Sefəa Shala dzembe wənəa ŋkɛ, pa hwepete wənə kwele kwele.

⁷Pa ŋkɛ ŋkave sla bake ba'a sleslekwemte hɛ mbe, pa ghweneghe nda hɛ laka ka ghwene ke mbeli nyi te pɛtɛa hɛɗia ka Israyɛl, ma ke: «Ma wəndə nya keɗema kedzemte mpa kwetere wəmbəa yɛ Sawəl le Saməyɛl ne, kala nya temene mbeli le yɛ sla ta ŋkɛ.» Benake pɛtɛa ka Israyɛl va ghazlənə, cape hɛ kalə kala wəndə nde kwetɛŋenyɛ.

⁸Pa Sawəl neweve nza ta nci kwa Bɛzɛk, mbeli 300.000 ka Israyɛl, 30.000 mbeli nyi mbe Zhəwda.

⁹Ma ke hɛ sha mbeli nyi ghweneke nyi mbeli se mbe Yabɛsh: «Pa yɛ gezete nda ke ka Yabɛsh ta Gala'ad kala nya: ‹Hendɛ hwa ghwə ta veci, kateŋ'we mbele yɛ, pe yɛ sha hɛ.›» Pa ka ghwene nyighɛ keleghe nda ghena shɛ ke ka Yabɛsh nyighɛ, viɗi hɛ va zlama kwele kwele.

¹⁰Ma ke hɛ sha ka Amon: «Hendɛ ne, katelə ghen'yɛ sha gheyɛ nda temene yɛ le ghen'yɛ kala nya ɗe yɛ.»

¹¹Ma te hendɛ ta ŋkwa, pa Sawəl nehemte mbeli mbe kewəvəsə kewəvəsə mahekene. Pɛkwe hɛ mbe ghedəkwəa ka Amon te pesle ta ŋkwa, kampəmte hɛ pa kwa ghə veci. Ma mbeli nyi kembelenji, kwesayɛ hɛ tahe, ketene hɛ bake bake jikə we.

¹²Ma ke hɛ sha Saməyɛl: «Yɛ wa mbeli nyi kese kageze: ‹Tsema nza wəndə nya kayate ɓə wa›, ke hɛ gɛ wa? Ndeke n'yɛ mə mbelia shɛhɛ, shɛ ghen'yɛ mpəmte hɛ.»

¹³Ama, ma ke Sawəl sha hɛ: «Wəndə shɛ kapesle mbeli ciŋə ciŋə te veci nya we, va nya nza nde ma ɓeshi ne, na Mahwətə kendeke nda hərəte ŋkwa ke ka Israyɛl.»

¹⁴Ma ke Saməyɛl gezete nda ke mbeli: «Nde mə, mbara ɓəmə kadzawa Gilgal kezha zhɛnete meghe ke Sawəl zhɛkwa.»

¹⁵Pɛtɛ mbeli lə kadzawa Gilgal kaveyi Sawəl kameghe kwa kema ta Mahwətə. Tagha ne, pa hɛ dzeghekɛ nda melɛa jikə geva ke Mahwətə, ntake yɛ Sawəl le pɛtɛa ka Israyɛl kamene gəsəkəa zlama nya wəba.