Read kapsiki 1 Saməyɛl 12 Bible Online

1 Saməyɛl 12 - kapsiki bible

1 Saməyɛl 12

¹Ma ke Saməyɛl sha ka Israyɛl: «Nahe 'ya keyɛte ŋayɛ wəshi nyi se yɛ ka'yɛwe va 'ya, nahe 'ya kendeke ŋayɛ meghe kezha sleke ŋayɛ ŋkɛ.

²Ma tsetsenya ne, wa nya meghe nya ketedzeghwa mbe kema ta ŋayɛ nya. 'Ya ne, kehale hale 'ya tɛzlɛzlɛ, hwa gheyɛ nza ŋwalea ɗa le ŋa nci. Nahe 'ya kese kadzeghwa mbe kema ta ŋayɛ se te nza ta ɗa kadɛgwə pa va ɓeshi.

³Wa nya 'ya nya! Gezete mə mbe kema ta Mahwətə ba'a meghe nya ntave ŋkɛ kenza nde wəsə nya bezemte ŋayɛ 'ya ya shɛ. Wa wəndə nya gha 'ya kakelehwe sla ta ŋkɛ keɗema kwara ta ŋkɛ wa? Nahe 'ya kegha kasa nda yaka ke wəndə, kamenete nda wəsə kwa ndiremi na? Wa wəndə nya gha 'ya kaghweteve cɛdɛ ve kezha ɗema kapele ntsə yitea beze ghena ta ŋkɛ wa? Katezhɛne ŋayɛ ŋkɛ 'ya.»

⁴Ma ke hɛ shɛ: «Kegha na kasa n'yɛ yaka we. Kegha na kamenete n'yɛ wəsə kwa ndiremi we. Wəsə shɛ nya gha na kaghwetehwe yitea wəndə we.»

⁵Ma ke sha hɛ zhɛkwa: «Ka sla fete ta ɓəmə Mahwətə ba'a meghe nya ntave ŋkɛ ɓeshi, kaɗema yɛ kenakɛ wəsə kebeze beze te dzeve ta ɗa.» Ma ke hɛ zhɛnete: «E'e tsagha shɛ.»

⁶Ma ke Saməyɛl gezete nda ke mbeli: «Mahwətə nya keveyi Moyize ba'a Aron kezha fə ka shihɛ ŋayɛ shave mbe Ɛzhipte ya kande negha fete yite.

⁷Ma tsetsenya gɛ ne, slete mə tagha mbe kema ta Mahwətə yitea meha ghwə, 'ya kateɓela ŋayɛ wəshi ganji nyi menete ŋayɛ Mahwətə, ke gheyɛ ba'a ke ka shihɛ ŋayɛ.

⁸Ma kwa dzembe Ɛzhipte Zhakob, nahe ka shihɛ ŋayɛ kese kanehwene nda nehwene ke Mahwətə, nahe Mahwətə keghwenakɛ yɛ Moyize le Aron kezha fə ka shihɛ ŋayɛ shave mbe Ɛzhipte ba'a kezha ve hɛ te ŋkwa nya.

⁹Ama nahe hɛ kezaghəyite Shala Mahwətə ta nci, ma gheŋkɛ ɓiyitsa, nahe ŋkɛ kevame hɛ mbe dzeve ta Sisra nya kameghea ka sewajɛa ka Hasor, tsagha mbe ŋa ka Filisti ba'a mbe dzeve ta meghea ka Mowab, nyi kese kampa le hɛ.

¹⁰Pa hɛ nehweneyi nda nehwene zhɛkwa ke Mahwətə, ma ke hɛ: ‹Nahe ghen'yɛ kebezemte ghena kwa sərəakɛ ŋa n'yɛ Mahwətə yitea hawe ba'a mene nda slene ke yɛ shala Ba'al ba'a Astartɛ. Mbelemte n'yɛ tsetsenya shave mbe dzeve ta ka jaga ta n'yɛ, katemene ŋa slene ghen'yɛ!›

¹¹Ma gɛ, pa Mahwətə ghwenakɛ Zhɛdɛyon, Bɛdan, Zhɛftɛ ba'a 'ya Saməyɛl kezha mbele ŋayɛ shave mbe dzeve ta ka jaga ta ŋayɛ nyi kese kadzasle ŋayɛ nda se yɛ kanza gwezlayɛ.

¹²Ama kwa nakɛ Nahash, meghea ka Amon yɛ kehave ŋayɛ mpa ne, ma pe yɛ gezete ɗa: ‹Kaɗe meghe ghen'yɛ.› Ndagwara Shala Mahwətə ta ŋayɛ ya kameghea ŋayɛ.

¹³Ma tsetsenya ne, wa nya mə meghe nya ntave yɛ nya, nya 'yɛweke yɛ, wa nya Mahwətə nya kendeke ŋayɛ meghe.

¹⁴Ma kenza nde kahawe yɛ ba'a kamene nda slene yɛ ke Shala Mahwətə ta ŋayɛ, kayɛ ghena ta ŋkɛ yɛ kaɗema kazhɛne nda ghə ke wəshi mahalegəa ŋkɛ, ma gheyɛ le meghe nya kesleke ŋayɛ tsagha gɛ ne, tiɗiɗi tenza yayata wəsə kaŋa ŋayɛ kenza yɛ kazele ŋkɛ.

¹⁵Ama keɗema yɛ kafa nda ghena ke Mahwətə ba'a kenza yɛ kaɗema wəshi mahalegəa ŋkɛ, kateɗa ŋayɛ ŋkɛ kwele kwele kala nya se ŋkɛ kaɗa ka shihɛ ŋayɛ.

¹⁶Tsetsenya zhɛkwa ne, nza mə teke kaba nda tenewe kwete mama ta wəsə meŋele nya wəba yɛ, nya temene Mahwətə kwa ntsə ta ŋayɛ.

¹⁷Ashɛ və ketsa ha te wəve ya ɓeshi wəka? 'Ya kateheka Mahwətə yitea berazlɛte va ba'a yitea meke va ŋkɛ. Fate mə shɛ yɛ neweve kwelea beze ghena nya menete yɛ mbe kema ta Mahwətə kwa 'yɛwe meghe yɛ kaŋa ŋayɛ.»

¹⁸Pa Saməyɛl 'yɛwakɛ Mahwətə, pa Mahwətə ghweneke berazlɛ ta va ba'a meke va te vəa shɛ. Tagha gɛ, pɛtɛ mbeli kaghazlənə va Mahwətə ba'a va Saməyɛl.

¹⁹Ma ke mbeli gezete nda ke Saməyɛl: «Səkwə Mahwətə, Shala ta ŋa kezha ghen'yɛ, yitea ɗema ghen'yɛ kampə, kwa nza nde nahe ghen'yɛ kembakete beze ghena ta n'yɛ le fete nya menete ghen'yɛ kwa 'yɛwe meghe ghen'yɛ kaŋa n'yɛ.»

²⁰Ma ke Saməyɛl sha mbeli: «Mba yɛ keghazlənə. Gheyɛ ka menete wəsə kwa ndiremi nya dzawe nya. Ama mba yɛ kezhɛne kazhɛre nda wəmbə ke Mahwətə, mene nda mə slene ta ŋkɛ le wənəa ŋayɛ pɛtɛ.

²¹Mba yɛ kenza cakeɗake le, va nya nza nde lə yalə yɛ yitea ghena kweci shala nyi keɗema kamenete nda wəsə ke wəndə, nyi keɗema kambelete ŋkwa, va nya nza hɛ kashala tseŋwə.

²²Kwa nza nde ne, katewəfə mbelia ŋkɛ Mahwətə we, kwa nza nde ne, wəbake Sləa ŋkɛ we, nahe ŋkɛ keɗe kave ŋayɛ kambelia ŋkɛ.

²³Ma 'ya le ŋa ɗa perə ne, kendireminyɛ ŋkɛ kezha beze nda ghena 'ya ke Mahwətə laka sərə səkwə ghə kaŋa ŋayɛ. Kateteke ŋayɛ hweŋkwa nya megela ba'a nya tiɗiɗi 'ya.

²⁴Hawe mə va Mahwətə laka mene nda slene le hweŋkwa, le wənə ŋayɛ pɛtɛ. Newakɛ mə tsema tsema se ŋkɛ kamene wəshi nyi jama jama kezha gheyɛ!

²⁵Ama kenza nde wəsə kwa ndiremi yamene yɛ ne, kateza yɛ, gheyɛ ba'a meghea ŋayɛ.»