Read kapsiki 1 Saməyɛl 13 Bible Online

1 Saməyɛl 13 - kapsiki bible

1 Saməyɛl 13

¹Va ta Sawəl mahekenemsə nda dzete meghe ŋkɛ, nahe ŋkɛ kese kasleke ŋkwa kava bake mbe Israyɛl.

²Pa Sawəl tsehave zhili slibə mahekene. Slibə bake ɓela ta nyi mba yite pelɛ Mikmas kwa ghəa ghweme ta Bɛtɛl, zhili slibə nyi yitea Zhonatan pelɛ Gibɛya ta Bɛnjamɛn. Pa ŋkɛ zhɛneghe kweci mbeli nyi ketene, yayata wəndə kalə sha cɛ lekwesa ta ŋkɛ.

³Te kwete hɛ ne, pa Zhonatan peslekɛ wəndə nya wəba ta ka Filisti nya kese pelɛ Gɛba, pa ka Filisti fate. Ma ɓiyitsa, pa Sawəl vɛte kwelɛghə te pɛtɛa hɛɗi. Kwa nza ŋkɛ ne, ma ke mbe ghəa ŋkɛ: «Fate wəsəa shɛ ka Ɛbrə!»

⁴Pɛtɛ ka Israyɛl kefate ghena nya geze mbeli: na Sawəl kepeslekɛ ŋgwamna ta ka Filisti, pa ka Israyɛl zhɛrenji kawəsə nya ɗema mbeli kasəwəhwe sha ka Filisti. Pa mbeli tsenete geva kwetere wəmbəa Sawəl pelɛ Gilgal.

⁵Pa ka Filisti tsenete geva yitea mpa le ka Israyɛl. 30.000 nza ɓela ta wəmata gədəwə, 6.000 ɓela ta ka zleɗe gədəwəa lɛmə, le wəvəsə kwele kwele kala ndaleghe mɛ ndərə. Pa hɛ dzeme kaŋesləyi ghweɓe pelɛ Mikmas, laka ŋkwa kesame ta veci yitea Bɛt-Avɛn.

⁶Ma kwa nakɛ ghəa nci ka Israyɛl kambeli nyi keza za kwa nza mbeli terasle yitea hɛ, ntake hɛ kawəfərə mbe yɛ gezlɛŋə, kwa ki, hwa kələŋə, mbe hɛɗi ba'a kwa yɛ ghwa.

⁷Pa kweci ka Ɛbrə jivenji te hələa Zhəwrdɛŋe kezha kekave hɛɗia ka Gad ba'a ŋa ka Gala'ad. Mbanyɛ Sawəl kwa Gilgal vəa ŋkwa shɛ, kabare bare mbeli nyi kwetere wəmbəa ŋkɛ.

⁸Pa ŋkɛ neghete hɛ mberefaŋe kala və nya gezete nda Saməyɛl. Ama kedzawa Gilgal Saməyɛl we, sərə yasərə Sawəl mbeli ba'a taze yataze geva hɛ.

⁹Tagha gɛ, ma ke Sawəl: «Keleke ɗa mə melɛ kwa tere tere ba'a melɛ kejikə ghə.» Pa ŋkɛ dzeghekɛ melɛ kwa tere tere.

¹⁰Yipə yipə le və nya keɗaŋe dzeghe ta melɛa shɛ, pɛkwe Saməyɛl. Ntəŋə Sawəl kajive shɛ kezha njiŋwe ŋkɛ.

¹¹Ma ke Saməyɛl: «Wa wəsə nya menete nya na wa?» Ma ke Sawəl: «Ma kwa nakɛ mbeli 'ya kasərəakɛ ɗa, kwa ɗema na kese kala nya gezehwe mə ba'a kwa tsenete geva ka Filisti pelɛ Mikmas ne,

¹²ma 'ya zəzəte: Tsetsenya ne, katesawa ka Filisti sha 'ya kwa Gilgal kaɗema 'ya kenaka kasəkwəte Mahwətə. Vatse nda kelete zəzə 'ya ba'a dzeghekɛ melɛ kwa tere tere 'ya le ghəa ɗa.»

¹³Ma ke Saməyɛl sha Sawəl: «Kala gezhi menete na! Keyate wəsə mahalegəa nya gezete ŋa Shala Mahwətə ta ŋa na we. Nza nahe Mahwətə keveyi meghea ŋa kənəa Israyɛl kaghala ghala.

¹⁴Ama tsetsenya ne, katetemə meghea ŋa we. Nahe Mahwətə keŋ'wete wəndə nya ɗe wənəa ŋkɛ, nahe ŋkɛ keveyi ŋkɛ kameghea mbelia ŋkɛ, va nya ɗema na keyate wəsə mahalegə nya gezete ŋa Mahwətə.»

¹⁵Cape Saməyɛl kwa hweŋkwa kadzeme Gilgal ba'a Gɛba ta ka Bɛnjamɛn. Pa Sawəl ɓelate mbeli nyi ketene: zhili gwəmsə ŋkwaŋe nza ta nci.

¹⁶Pa yɛ Sawəl le wəzege ta ŋkɛ Zhonatan nzanji zlaɓe le mbeli nyi le hɛ kwa Gɛba ta ka Bɛnjamɛn, ama kwa Mikmas ka Filisti le wəvəsəa nci.

¹⁷Ma te kwete hɛ ne, pɛkwe kwete wəvəsəa mbeli nyi kempə ŋkwa shave hwa ka Filisti, pa hɛ nehemte geva mahekene mbe, laka Ofra lə kwa ghate, laka meleme ta Shəwal,

¹⁸Laka Bɛt-Horon kwa bake, ma kwa maheke ne, pa ŋkɛ kelete hweŋkwa kedzawa te ghala nya kedzeva zlərəa Tseboyim, laka bela ta ɓerama.

¹⁹Mbe və nyagha ne, nde gezla wəshi shɛ mbe hɛɗia pɛtɛa ka Israyɛl we, kwa nza nde ma ke ka Filisti: «Fɛake ɓəmə ka Ɛbrə kegezla nda kafayɛ keɗema megha ke ghəa nci.»

²⁰Nahe pɛtɛa ka Israyɛl kese kadzawa sha nde gezla wəshi ta ka Filisti kezha tseɗe mɛ te sakwə, wəɗə, tseyɛ keɗema metsasle ta nci.

²¹Nahe tseɗe mɛ te sakwə, dzaŋərə, tseyɛ ba'a wəɗə kenza jake jake, gare dəɓərəa mze kwa tɛawetɛa kwetɛŋe.

²²Ma te vecia mpa gɛ, pala pala mbelia yɛ Sawəl le Zhonatan kaɗema kafayɛ ba'a yɛ megha va hɛ. Deke va yɛ Sawəl le wəzege ta ŋkɛ Zhonatan nza hɛ.

²³Pa kwete wəvəsəa ka sewajɛa ka Filisti shave kanzanji kwa hweŋkwa kadzawa Mikmas.