Read kapsiki 1 Saməyɛl 15 Bible Online

1 Saməyɛl 15 - kapsiki bible

1 Saməyɛl 15

¹Ma ke Saməyɛl gezete nda ke Sawəl: «'Ya yaghwenakɛ Mahwətə kezha ve ŋa kameghe te ghəa mbelia ŋkɛ, ka Israyɛl: fa ghena nya kese va Mahwətə.

²Wa nya ghena nya geze Mahwətə nde berete nya: ‹Mba wəsə nya menete nda ka Amalɛk ke ka Israyɛl yitea ghəa ɗa, kwa fɛake nda hweŋkwa hɛ ke hɛ vəa ŋkwa nya shave hɛ mbe Ɛzhipte.

³Tsetsenya ne, kwiɗi ɗate ka Amalɛk, teremte wəshi nyi va hɛ, yagha na kasərəakɛ hɛ tɛape. Mpəmte pɛtɛa wəshi nyi nza mpi hwa hɛ: zhili ba'a mi, megelɛshi ba'a ŋwalea fəshi, yɛ sla ba'a timɛti, zlegweməa lɛmə ba'a kwara lɛmə.›»

⁴Pa Sawəl tsenete ka sewajɛ ba'a ɓelate hɛ mbe Tɛlɛm: 200.000 ka dzeghwa le seɗa, zhɛne ne, 10.000 ka Zhəwda.

⁵Kwetere wəmbəa ŋkɛ, pa Sawəl slə le hɛ hwa'a mbe meleme ta ka Amalɛk, pa ŋkɛ wəfərənyɛ kwelɛ zlərə kezha wəbəke hɛ le mpa.

⁶Ma ke Sawəl ghwenakɛ ŋkwa kageze nda ke ka Kɛn: «Mba yɛ kenza hwa ka Amalɛk. Slə ŋayɛ mə cakeɗake le hɛ yagha 'ya kazamte ŋayɛ zlaɓe le hɛ kwa nza nde megela se yɛ laka ka Israyɛl kwa shave hɛ mbe Ɛzhipte.» Pa ka Kɛn nehemte geva le ka Amalɛk.

⁷Pa Sawəl ɗate ka Amalɛk se mbe Havila hwa'a kwa ŋkwa kedzembe Shəwr, laka ŋkwa kesame ta veci yitea Ɛzhipte.

⁸Pa ŋkɛ keseve Agag, meghea ka Amalɛk le mpi ba'a mpəmte mbeli pɛtɛ le kafayɛ.

⁹Ama pa yɛ Sawəl le mbeli pɛtɛ yate mpia yɛ Agag le wəshi keseɗa nyi ganji ganji: yɛ sla, timɛti, wəshi keseɗa nyi jama jama ba'a zhɛgwəa lɛməa timɛti, geze ta ŋkɛ, wəshi keseɗa nyi nza ntsə te. Deke wəshi nyi ɗema zləvə te hɛ yateremte hɛ.

¹⁰Pa ghena ta Mahwətə gezete nda geva ke Saməyɛl, ma ke:

¹¹«Zəzə yazəzə 'ya kwa veyi Sawəl 'ya kameghe, kwa nza ŋkɛ nahe ŋkɛ kezhɛrave ɗa wəmbə ba'a keyipəyima ghena ta ɗa kwa.» Pa wənəa Saməyɛl hwepete geva, ntake ŋkɛ kageze nda ghena ke Mahwətə hwencɛke ncɛke.

¹²Pelɛhetɛme Saməyɛl sate te ŋkwa masheke masheke kezha lə kabegeme le Sawəl. Ma ke kweci mbeli sha Saməyɛl: «Nahe Sawəl kedzembe Karmɛl. Pelɛagha ne, nahe ŋkɛ keŋate ŋkwa nya biya kadzeyitea ghweme. Kwetere wəmbəa ŋkɛ, nahe ŋkɛ kehendeghe geva mbe kema, cape ŋkɛ kadzawa Gilgal.»

¹³Cape Saməyɛl kalə sha Sawəl, ma ke Sawəl shɛ: «Wəpikɛ ŋa Mahwətə! Nahe 'ya kemenete ghena nya gezete Mahwətə.»

¹⁴Ma ke Saməyɛl: «Tsema fa nehwene ta timɛti 'ya ba'a ŋa sla tsagha wa?»

¹⁵Ma ke Sawəl: «Ghenci fəhwe hɛ va ka Amalɛk va nya yate wəshi ganji ganji mbeli hwa wəshi kezha dzeghe nda melɛ le hɛ ke Shala Mahwətə ta ŋa, ma nyi ketene ne, pɛtɛ teremte hɛ ghen'yɛ.»

¹⁶Ma ke Saməyɛl shɛ: «Wərə ɗa! 'Ya kategeze ŋa ghena nya gezete ɗa Mahwətə heviɗi nya.» Ma ke Sawəl shɛ: «Geze!»

¹⁷Ma ke Saməyɛl shɛ: «Ma vəashi ne, kese na kave ghəa ŋa kawəndə nya nza zləvə te we, nahe na kenza tsetsenya kawəndə nya te ghəa hwelefefi nyi mbe Israyɛl, Mahwətə nde veyi ŋa tekeleke kameghe nya mbe Israyɛl.

¹⁸Nahe Mahwətə kencɛte ŋa hweŋkwa, ma ke sha gha: ‹Kwiɗi zamte sebe te ka Amalɛk nyi kaka jaɗafa: ndeke nda mpa ke hɛ vaŋe te za ta sebe ta nci.›

¹⁹Va wa ɗema na kefate nda ghena ta Mahwətə wa? Yitea wa fəte mcɛləa nci na ba'a menete wəsə kwa ndiremi na kwa ntsə ta Mahwətə wa?»

²⁰Ma ke Sawəl zhɛnete: «Nahe 'ya kefate nda ghena ke Mahwətə tiɗiɗi ba'a hweŋkwa nya ncɛte ɗa ŋkɛ yase 'ya kadzeghwa kwa. Nahe 'ya kezamte sebe te ka Amalɛk pɛtɛ, deke Agag nya kameghea nci yakeleke 'ya.

²¹Ama nahe mbeli kefəte hwa mcɛləa nci, wəshi keseɗa nyi ɓɛhwɛ ɓɛhwɛ ba'a nyi jama jama shave hwa wəshi nyi tetere mbeli, yitea dzeghe nda melɛ ke Shala Mahwətə ta ŋa le hɛ mbe Gilgal.»

²²Ma ke Saməyɛl shɛ: «Yipə yipə ɗehwe wəshi nyi tere mbeli tere tere ba'a kweci nyi ve nda mbeli ke Mahwətə le yɛte ghena ta ŋkɛ na? Ewə, za ma yɛhwe ghena ta ŋkɛ ke melɛ nyi dzeghe mbeli, za ma fa ghena ta ŋkɛ ke merege ta wəshi keseɗa nyi hɛnɛhɛa hɛnɛhɛa.

²³Kwa nza nde ne, kala jaɗafa ta dzeghwa sha ka ŋa zlera ghə nza ɗema yɛ ghena, kala hawe va kweci shala nza zhɛne ghə ɓiyitsa perə. Kala nya neghamte ghena ta Mahwətə na ne, nahe ŋkɛ keneghamte ŋa perə, mba na kameghe zhɛkwa we.»

²⁴Tagha gɛ, ma ke Sawəl sha Saməyɛl: «Nahe 'ya kebezemte ghena kwa nza nde nahe 'ya keɗema yɛ wəshi mahalegəa Mahwətə ba'a ghena ta ŋa, ghazlənə nde zhɛte ɗa va ka sewajɛ, vatse yɛte nda ghena ta nci 'ya ke hɛ.

²⁵Tsetsenya ɓiyitsa ne, təhwə təhwə kelemte beze ghena ta ɗa te wənə shɛ na zhɛreke geva kanza le 'ya kezha gwəɗəŋə 'ya kahawe va Mahwətə.»

²⁶Ma ke Saməyɛl sha Sawəl: «Katezhɛre geva 'ya yitea nza le gha we, kwa nza ŋkɛ nahe na keɗema wəshi mahalegəa Mahwətə, nahe ŋkɛ keɗema ŋa. Katezhɛne na kanza kameghe mbe Israyɛl we.»

²⁷Pa Saməyɛl zhɛrete geva kezha dzeghwanyɛ, pa Sawəl keseve mɛa lekwesa ta ŋkɛ nya keŋkwahenyɛ.

²⁸Ma ke Saməyɛl shɛ: «Nahe Mahwətə kekelehwe nza kameghea ka Israyɛl va gha ɓeshi ba'a kendeke nda ke kwete wəndə nya za ma ke gha.

²⁹Ma Mahwətə nya nza zləvə te mbe Israyɛl ne, kasla tseŋwə ŋkɛ ba'a kazhɛre zəzə ŋkɛ kala wəndə ŋelɛ we.»

³⁰Ma ke Sawəl zhɛkwa: «Nahe 'ya kebezemte ghena! Tsetsenya ne, təhwə təhwə vate zləvə te 'ya kwa kema ta mbelia jama nyi hwa mbelia ɗa ba'a pɛtɛa ka Israyɛl, zhɛreke geva kanza le 'ya kezha gwəɗəŋə 'ya kahawe va Mahwətə, Shala ta ŋa.»

³¹Pa Saməyɛl zhɛreke geva kezha təkwə təkwəte Sawəl, pa Sawəl gwəɗəŋə kahawe va Mahwətə.

³²Tagha gɛ, ma ke Saməyɛl: «Keleke ɗa mə Agag, meghea ka Amalɛk.» Pa Agag dzeyi shɛ le zlama mbe wənə. Ma zəzə ŋkɛ ne, nahe zəzə ta mte keslə te.

³³Ama, ma ke Saməyɛl: «Ma kala nya nehemte mi kafayɛa ŋa le ŋwalea nci ne, tsagha tekelemte geva wəzege teza va meyɛ ŋa perə.» Pa Saməyɛl ncɛhwemte ŋkɛ mbe kema ta Mahwətə mbe Gilgal.

³⁴Ntəŋə Saməyɛl kadzeme Rama, cape Sawəl kadzeme ghɛa ŋkɛ pelɛ Gibɛya.

³⁵Kezhɛne Saməyɛl kabegeme le Sawəl pa te və nya mte ŋkɛ we. Kwa nza nde kanehwene ŋkɛ va Sawəl, va nya nza ŋkɛ nahe Mahwətə kese kazəzə va nya veyi Sawəl ŋkɛ kameghea ka Israyɛl.