Read kapsiki 1 Saməyɛl 21 Bible Online

1 Saməyɛl 21 - kapsiki bible

1 Saməyɛl 21

¹Pelɛhetɛme David, pa ŋkɛ kelete hweŋkwa ta ŋkɛ, pa Zhonatan zhɛneghe geva kalə kadzembe meleme.

²Cape David kalə sha nde dzeghe Shala Ahimɛlɛk nya mbe Nob. Cape Ahimɛlɛk kalə sha David le bare bare. Ma ke shɛ: «Yitea wa nza na kwetɛŋe ŋa kaɗema wəndə shɛ kabeghe ŋa wa?»

³Ma ke David sha nde dzeghe Shala Ahimɛlɛk: «Meghe nde ghwenakɛ ɗa, ma ke sha 'ya: ‹Kwete wəndə shɛ kaɗepe wəsə nya ghwene ŋa 'ya yite we.› Vatse gezete nda 'ya ke mbelia ɗa kezha keme le hɛ te kwete ŋkwa.

⁴Wa ya yitea dzeve va gha wa? Ntave ɗa ɗafa mcɛfe keɗema kwete wəsə nya kenza shɛ.»

⁵Ma ke nde dzeghe Shala sha David: «Ɗafa nya gəmə shɛ va 'ya we, ama ɗafa nya keveyi geva kaŋa Shala ya shɛ. Wərə 'ya kandeke ŋa kesema mbelia ŋa kanza le mi mbe hɛ nyi.»

⁶Ma ke David sha nde dzeghe Shala ɓiyitsa: «Tsagha shɛ ŋkɛ, nahe mbeli kefɛake n'yɛ kenza le mi kala nya kaghate kenza 'ya kadzehwa gamba yitea mpa, pɛtɛ nza wəshia mbeli wɛŋe wɛŋe. Dzeghwa nya ne, nya keveyi geva kasema laka Shala, ama ya gheŋkɛ nza tsagha ne, wɛŋe tenza nde ɓeshi kala wəshi kempa.»

⁷Pa nde dzeghe Shala ntave nda ɗafa nya keveyi geva kaŋa Shala, va nya ɗema kwete ɗafa shɛ tekeleke. Ɗafa nyi fə mbeli seyi te tabelea Shala kezha bete ɗafa kwateta te ŋkwa nci hɛ.

⁸Te vecia shɛnyɛ, kwete nde mene nda slene ke Sawəl ya tagha mbe kema ta Mahwətə. Dowɛg sləa ŋkɛ ba'a nde Ɛdom ŋkɛ, gheŋkɛ ya te ghəa ka ya wəshi keseɗa ta Sawəl.

⁹Ma ke David sha Ahimɛlɛk: «Kafayɛ keɗema megha yitea dzeve va gha tse yi? Kese 'ya kakele kafayɛa ɗa keɗema wəshi kempa ta ɗa we, va nya nza nde kahe kahe seke se ghena ta meghe.»

¹⁰Ma ke nde dzeghe Shala shɛ: «Kafayɛa Goliyat, nde Filisti nya peslekɛ na kwa zlərəa Hwemeke ya shɛ teke, tepeɗe ŋkɛ mbe zlave kwetere wəmbəa lekwesa nya kənəa rewebe. Ma keɗe na kakele ne, kele kaŋa ŋa, kwa nza nde kwete kafayɛ shɛ teke we.» Ma ke David: «Kwete shɛ kala gheŋkɛ we, ndeke ɗa ŋkɛ.»

¹¹Cape David kwa hweŋkwa ba'a pa ŋkɛ hwɛnyɛ cakeɗake yitea Sawəl te vecia shɛ. Pa ŋkɛ dzawa sha Akish, meghea ka Gat.

¹²Ma ke ka mene slene ta ŋkɛ sha meghe Akish: «Ashɛ David nya kameghe nya mbe Israyɛl nya wəka? Ashɛ te se mi kagha cimə le wetse: ‹Nahe Sawəl kempəyi ŋkwa slibə, ama slibə meŋe ŋa David›, ke hɛ wəka?»

¹³Benake David va ghena nyighɛ, pa ghazlənə zhɛte nda kwele kwele va Akish, meghea ka Gat.

¹⁴Pa ŋkɛ zhɛrete ghəa ŋkɛ kala gezhi kwa kema ta nci, ntake ŋkɛ kandeŋe hwa hɛ, karahe wəshi dzeyi te yɛ gelembe ba'a kayirəwə ndɛghwɛɗɛ dzawa hwa ghwɛmɛa ŋkɛ.

¹⁵Ma ke Akish sha ka mene slene ta ŋkɛ: «Kanewe newe yɛ tiɗiɗi kagezhi ŋkɛ. Kezha wa keleke ɗa ŋkɛ yɛ wa?

¹⁶Ka gezhia kɛfi ɗema va 'ya nda keleke ɗa nya yɛ kamene ɗa wəshi gezhi teke sha 'ya na? Katedzeki ghɛa ɗa nya wəndə we.»