Read kapsiki 1 Saməyɛl 26 Bible Online

1 Saməyɛl 26 - kapsiki bible

1 Saməyɛl 26

¹Pa mbeli nyi mbe Zif lə sha Sawəl mbe Gibɛya, ma ke hɛ shɛ: «Nahe na keɗepe nahe David kewəfərənyɛ pelɛ wəmbəa Hakila, mbe kema ta ɓerama nya dɛrɛŋe rɛŋe tse yi?»

²Cape Sawəl kwa hweŋkwa kadzawa ɓerama ta Zif le mbeli 3.000, ka sewajɛ ganji ta ka Israyɛl kezha sepa David kwagha te ɓerama ta Zif.

³Pa ŋkɛ hite ghedəkwəa ŋkɛ hwa ghweme ta Hakila, nya mbe kema ta ŋwela, dekwede vare hweŋkwa. Kwagha te ɓerama nzanyɛ David le ŋa ŋkɛ. Pa ŋkɛ fate nahe Sawəl kese kasepa ŋkɛ te ɓerama.

⁴Ma kwa ghweneghe ŋkwa David kezha fate tiɗiɗi, pa ŋkɛ ɗepete kaganda senyɛ Sawəl.

⁵Cape David kwa hweŋkwa, pa ŋkɛ kekave ŋkwa nya nza ghedəkwəa Sawəl te. Pa ŋkɛ nakɛ ŋkwa nya hɛ yɛ Sawəl le Abnɛr, wəzege ta Nɛr nya te ghəa ka sewajɛ te. Te tepe ta ghedəkwə hɛ Sawəl, dzasle ka sewajɛ yite.

⁶Pa David hekakɛ yɛ Ahimɛlɛk, nde Hɛt le Abishay, wəza meghekɛa Zhowab, Serəwya sləa meghekɛ, ma ke sha hɛ: «Wa nde ɗe kadzembe ghedəkwəa Sawəl le 'ya hwa gheyɛ wa?» Ma ke Abishay shɛ: «Kadzembe 'ya le gha.»

⁷Pa yɛ David le Abishay ntsehe mbe ghedəkwəa ka sewajɛ heviɗi: meɓelahe Sawəl yitea hɛ te tepe ta ghedəkwə, gepe megha ta ŋkɛ te ghəa ŋkɛ. Dzasle yɛ Abnɛr le ka sewajɛ yite kahɛ.

⁸Ma ke Abishay sha David: «Ɓəshi heviɗi nya, nahe Shala keveyi ŋa nde jaga ta ŋa mbe dzeve ta ŋa. Pelave ɗa hweŋkwa kezha lə 'ya kagepeyi ŋkɛ mbe hɛɗi kwetɛŋe seɗa le megha. Kwetɛŋe zhigə n'yi ŋkɛ 'ya, kan'yi ŋkɛ kwa bake zhigə 'ya we.»

⁹Ma ke shɛ: «Ewə, peslema ŋkɛ na ma! Wa nde nza kapeslekɛ Mɛsi nya ntave Mahwətə kaɗema yaka ba'a ɗa kadzete wa?»

¹⁰Ma ke David: «Laka Mahwətə nya teghweme ne, kageze ŋa 'ya, Mahwətə le ghəa ŋkɛ nde teza mpia ŋkɛ kese vəa ŋkɛ kamte keɗema hwa mpa kelə ŋkɛ yite.

¹¹Ama pa Mahwətə yate ɗa keza mpia meghe nya ntave ŋkɛ. Kelete ɓə megha nya te ghəa ŋkɛ ba'a jɛŋa ta yɛmə shɛ mə dzeghwa ɓə.»

¹²Pa David kelete megha ba'a jɛŋa ta yɛmə nya te ghəa ŋkɛ, pa hɛ dzeghwanji. Wəndə shɛ kenakɛ wəsə we, wəndə shɛ keɗepe we, wəndə shɛ kefeɗeghe we. Pɛtɛ hɛ yitea hɛ kwa menete Mahwətə kezha hɛ hɛ kwele kwele.

¹³Pa David jivenyɛ pelɛ kwete kema ta zlərə ba'a ghereŋenyɛ pelɛ kwete ghweme cakeɗake le ghedəkwəa Sawəl.

¹⁴Ma ke zlapete ghena kajive sha ka sewajɛ ba'a Abnɛr: «Abnɛr, kashɛ na zhɛne ɗa tse na?» Ma ke Abnɛr zhɛnete: «Wa ŋkɛ na gha nya kezlape ghena kadzawa sleme va meghe wa?»

¹⁵Ma ke David shɛ: «Ashɛ za na wəka? Kwete shɛ nde mpa kala gha mbe Israyɛl we! Ama va wa shaŋe na kaya meghe nya kesleke ŋa wa? Nahe kwete wəndə kese kezha pesle meghe nya kesleke ŋa.

¹⁶Megela wəsə nya menete nya na we. Te sləa Mahwətə nya teghweme ne, wərə mpə yɛ pɛtɛ va nya yakɛma nde sleke ŋayɛ yɛ, meghe nya ntave Mahwətə! Newakɛ, tema yɛ megha le jɛŋa ta yɛmə nyi kese te ghəa meghe wa?»

¹⁷Pa Sawəl ɗepete ŋwələa David, ma ke: «Wəzege ta ɗa David, gha nde geze ɗa ghena kaganda na?» Ma ke David shɛ: «'Ya ŋkɛ meghe.»

¹⁸Ma ke zhɛkwa: «Yitea wa sepa ɗa meghe 'ya nya kande mene nda slene wa? Wa yamenete nda 'ya wa? Wa wəsə kwa ndiremi nya menete 'ya wa?

¹⁹Tsetsenya ne, fate ghena ta ɗa meghe nya sleke ɗa, 'ya nya kande mene nda slene! Ma kenza nde Mahwətə nde ghwene ŋa kamene ɗa wəsə nya kala nya ne, gweɗakwete geva ŋkɛ laka melɛ. Ama kenza nde mbeli ka ghwene ŋa ne, pa Mahwətə bezlamte hɛ. Kwa nza nde ŋka yaŋka ɗa mbeli ɓeshi, kafɛa ɗa mbeli kedzembe hɛɗi nya ndeke nda Mahwətə ke mbelia ŋkɛ, kala wəsə nya nza mbeli kageze ɗa kalə kamene nda slene ke kweci shala.

²⁰Ama tsetsenya ne, kaɗe 'ya kamte cakeɗake le Mahwətə we, kwa nza nde nahe meghea ka Israyɛl kezlapete dzemte mpa yitea 'ya nya kala mevale, kala nya keka tahwəli mbeli hwa ghweme.»

²¹Ma ke Sawəl: «Nahe 'ya kebezemte ghena! Zhɛreke geva kase wəzege ta ɗa David! Katezhɛne 'ya kamene ŋa wəsə kwa ndiremi we, kwa nza nde nahe na kehawete hawe va mpia ɗa. Kaganda ne, kala gezhi se 'ya kamene wəshi, nahe 'ya keghwetete ghəa ɗa kwele kwele.»

²²Ma ke David: «Wa nya megha ta meghe nya. Shave kwete wəndəa ka sewajɛa ŋkɛ kakele.

²³Pa Mahwətə ɗave nda zhɛme ta ŋkɛ ke yayata wəndəa ɓəmə te wəsə ganyɛ nya menete ŋkɛ tiɗiɗi ba'a kehi hi. Nahe Mahwətə keveyi ŋa mbe dzeve ta ɗa ɓeshi, ama nahe 'ya keɗema pesle meghe nya veyi Mahwətə.

²⁴Kala nya nza mpia ŋa kawəsə nya kwele va 'ya ɓeshi, tsagha tenza mpia ɗa kawəsə nya kwele va Mahwətə, katembele ɗa ŋkɛ va yaka.»

²⁵Ma ke Sawəl sha David ɓiyitsa: «Wəpikɛ ŋa Mahwətə wəzege ta ɗa David. Katemene wəshi nyi jama jama na, katejive na mbe kema ya tsemanyɛ ŋkɛ.» Cape David kelete hweŋkwa, pa Sawəl zhɛreghe geva sha ghɛa ŋkɛ.