Read kapsiki 1 Saməyɛl 3 Bible Online

1 Saməyɛl 3 - kapsiki bible

1 Saməyɛl 3

¹Mene yamene nda slene Saməyɛl nya kawəzege ke Mahwətə mbe kema ta Hɛli. Ma te və nyagha ne, kageze nda ghena Mahwətə ke mbeli taheta taheta we. Kave newe wəshi ŋkɛ laka kelɛŋə ke mbeli taheta taheta we.

²Ma te kwete viɗi, meɓelahe Hɛli kahɛ te ŋkwa ŋkɛ nya ghalanza. Nahe ntsə ta ŋkɛ kenza keghwələpə ghwələpə, mba ŋkɛ kanakɛ ŋkwa we.

³Kenaka ghwə kamte kwa paterela ta Shala we. Meɓelahe Saməyɛl kahɛ mbe ghɛa Shala terasle yitea səndəkwəa Mahwətə.

⁴Pa Mahwətə hekate Saməyɛl, ma ke zhɛnete: «Wa nya 'ya nya!»

⁵Ntəŋə ŋkɛ le hwɛ kalə sha Hɛli, ma ke shɛ: «Wa nya 'ya nya kwa hekakɛ ɗa na.» Ma ke Hɛli zhɛnete nda: «Kese 'ya kaheka ŋkwa we, zhɛneghe geva kalə kaɓelahe!» Ntəŋə Saməyɛl kalə kaɓelahe zhɛkwa.

⁶Pa Mahwətə zhɛne kaheka Saməyɛl. Pelɛhetɛme Saməyɛl, cape ŋkɛ kalə sha Hɛli, ma ke shɛ: «Wa nya 'ya nya kwa heka ɗa na.» Ma ke Hɛli shɛ: «Wəzege ta ɗa, kese 'ya kaheka ŋa we. Kwiɗi ɓelahe ŋa.» Cape ŋkɛ kalə kaɓelahe.

⁷Kenaka Saməyɛl kaɗepete Mahwətə we, kwa nza nde kenaka ghena ta Mahwətə kancɛte nda geva we.

⁸Pa Mahwətə hekate Saməyɛl kakwa maheke zhigə. Pelɛhetɛme ŋkɛ, cape ŋkɛ kalə sha Hɛli. Ma ke shɛ: «Wa nya 'ya nya kwa heka ɗa na.» Tagha ne, pa Hɛli fate Mahwətə nde heka wəzege.

⁹Ma ke Hɛli sha Saməyɛl: «Zhɛneghe geva kalə kaɓelahe. Ma keheka ŋa ŋkɛ, ma pa na sha geze nda: ‹Geze Mahwətə, kafa mava ta ŋa.›» Cape Saməyɛl kalə kaɓelahe te ŋkwa ŋkɛ nya ghalanza.

¹⁰Pa Mahwətə se kanzanyɛ tagha. Pa ŋkɛ hekate ŋkɛ kala nyi ghala mshena, ma ke: «Saməyɛl! Saməyɛl!» Ma ke Saməyɛl gezete: «Geze ghena, fa yafa mava ta ŋa.»

¹¹Ma ke Mahwətə sha Saməyɛl: «Wa nya 'ya nya kateve ndiremi mbe Israyɛl, kala berazlɛ ta va tenza ŋkɛ sha yayata wəndə nya ketefa.

¹²Ma te vecia shɛ ne, kateve ndiremi nyi gezete 'ya 'ya te Hɛli ba'a te ghɛa ŋkɛ, kaganda temene hɛ 'ya.

¹³Nahe 'ya kegezete nda ke Hɛli katemeha ghwə 'ya te ghɛa ŋkɛ kaghala ghala va beze ghena ta ŋkɛ. Nahe ŋkɛ keɗepe nahe ŋwalea ŋkɛ kese kaŋele Shala, ama le ntsə newakɛ hɛ ŋkɛ.

¹⁴Vatse nda zemete nda 'ya kafela ke ghɛa Hɛli, wəsə shɛ kasheshamte beze ghena ta ghɛa Hɛli, ya yɛ melɛ, ya wəshi nyi fə ŋkɛ kase we.»

¹⁵Pa Saməyɛl nzanyɛ meɓelahe pa va masheke ta ŋkwa, nda se ŋkɛ kapelemte gelembe nyi mɛa ghɛa Mahwətə. Pa ghazlənə zhɛte nda ke Saməyɛl kegeze nda wəsə nya nakɛ ŋkɛ ke Hɛli.

¹⁶Ama pa Hɛli hekakɛ Saməyɛl, ma ke shɛ: «Saməyɛl, wəzege ta ɗa!» Ma ke Saməyɛl zhɛnete nda: «Wa nya 'ya nya!»

¹⁷Ma ke Hɛli 'yɛwete ve: «Wa ghena nya gezete ŋa Mahwətə wa? Mba na kewəfərə wəsə va 'ya! Ma kewəfərəte ghena na ya kwetɛŋe va 'ya ne, pa Mahwətə ɗate ŋa kwele kwele!»

¹⁸Tagha gɛ, pa Saməyɛl ɓelate nda hɛ pɛtɛ, wəsə shɛ kewəfərəakɛ ŋkɛ ve we. Ma ke Hɛli: «Mahwətə ŋkɛ, menete wəsə nya ɗe ŋkɛ!»

¹⁹Kele yakele Saməyɛl, nahe Mahwətə kenza le gheŋkɛ shanda, kapele kwete ŋkɛ hwa ghena nyi gezeke ŋkɛ gəmə we.

²⁰Pɛtɛa ka Israyɛl, se mbe Dan hwa'a mbe Bɛrshɛba keɗepete nahe Saməyɛl keveyi geva kande mɛ ŋkwa ta Mahwətə nya kaganda.

²¹Mba Mahwətə kancɛ nda ghəa ŋkɛ ke mbeli mbe Silo. Kwa nza ŋkɛ ne, mbe Silo ncɛte nda ghəa ŋkɛ Mahwətə ke Saməyɛl ba'a gezete nda ghena ta ŋkɛ ŋkɛ.