Read kapsiki 1 Saməyɛl 31 Bible Online

1 Saməyɛl 31 - kapsiki bible

1 Saməyɛl 31

¹Pelɛ ghweme ta Gilbowa ne, pa ka Filisti have nda mpa ke ka Israyɛl. Kweracɛ ka Israyɛl hwɛnji, kwele kwele mbeli nyi kempə.

²Ŋkelikə ka Filisti kənəa yɛ Sawəl le ŋwalea ŋkɛ. Pa hɛ mpəmte yɛ Zhonatan, Abinadab le Malkishəwa, ŋwale tezhilia meghe.

³Se te vəa shɛ ne, dzawe zhɛrenyɛ mpa kaŋa Sawəl. Pa kweci ka mpa have ntsate ŋkɛ, ntake Sawəl kabare bare va ghazlənə te kema ta nci.

⁴Ma ke sha nde kele nda wəshi kempa ta ŋkɛ: «Kelete kafayɛa ŋa shɛ na n'yimte ɗa, va nya nza nde kaɗe 'ya kapesle ɗa ka Filisti nyi kaka ɗepema Shala nyi le ghəa nci ba'a kaŋ'wəshi ɗa hɛ we.» Ama hɛreɗɛ nde kele wəshi kempa ta ŋkɛ ɗema kwa zhɛ nda ghazlənə zlahe. Tagha gɛ, pa Sawəl kelete kafayɛa ŋkɛ ba'a neghate geva te.

⁵Ma kwa nakɛ nde kele nda wəshi kempa ta ŋkɛ nahe Sawəl kemte, pa ŋkɛ neghate geva te ŋa ŋkɛ kafayɛ ba'a mtenyɛ perə.

⁶Tsagha menete geva ŋkɛ nda mpənji yɛ Sawəl le ŋwale tezhilia ŋkɛ nyi mahekene, tsagha nde kele wəshi kempa ta ŋkɛ ba'a ka sewajɛa ŋkɛ pɛtɛ te veci nya kwetɛŋe.

⁷Nahe ka Israyɛl nyi laka kwete bela ta zlərə ba'a nyi vare kema ta hələa Zhəwrdɛŋe kefate nahe ka sewajɛa ka Israyɛl kehwɛnji ba'a nahe yɛ Sawəl le ŋwalea ŋkɛ kempə. Tagha gɛ, pa hɛ wəfəyite yɛ meleme ta nci ba'a hwɛnji, pa ka Filisti se kanzanji mbe melemea shɛhɛ.

⁸Te hendɛ ta ŋkwa ne, pa ka Filisti nyi kelə kezha fə wəshia mbeli nyi kempə mpə nakɛ geva ta yɛ Sawəl le ŋwalea ŋkɛ pelɛ ghweme ta Gilbowa.

⁹Pa hɛ slahwe ghəa Sawəl, fəhwe wəshi kempa ta ŋkɛ ba'a ncɛte hɛ dzeyi te hɛɗia ka Filisti, yitea zlape geva ghena mɛnɛfɛ dzeyi mbe yɛ ghɛa shala ta nci ba'a hwa mbeli.

¹⁰Kwa sebe ta ŋkɛ, pa hɛ beteyi wəshi kempa ta Sawəl mbe ghɛa Astartɛ ba'a baŋeyi wəndə kemte mtea ŋkɛ vare zlia Bɛt-Shɛyan.

¹¹Pa mbeli nyi mbe Yabɛsh nya te hɛɗia Gala'ad fate wəshi nyi menete ka Filisti le Sawəl.

¹²Cape ka katsala kɛfia ka sewajɛ, hwencɛke ncɛke hɛ kadzeghwa hwa'a pelɛ Bɛt-Shɛyan, pa hɛ pelakawa geva ta yɛ Sawəl le ŋwalea ŋkɛ vare zli nya yitea melemea shɛ, pa hɛ zhɛneghe geva kadzembe Yabɛsh. Pa hɛ teremte hɛ le ghwə tagha.

¹³Pa hɛ tsenete 'yɛ'yɛa nci ba'a lamte hɛ yitea kwete wəfe kala keyitə mbe Yabɛsh, pa hɛ menete səwəmayɛ kahɛ mberefaŋe.