Read kapsiki 1 Saməyɛl 6 Bible Online

1 Saməyɛl 6 - kapsiki bible

1 Saməyɛl 6

¹Tere mberefaŋe menete səndəkwəa Mahwətə te hɛɗia ka Filisti.

²Pa hɛ hekakɛ ka dzeghe Shala ba'a ka kelɛŋə. Ma ke hɛ: «Wa yanza n'yɛ kamenete le səndəkwəa Mahwətə tse wa? Ncɛte n'yɛ mə tsema tsema nza n'yɛ kazhɛneghe ŋkɛ kadzete ŋkwa nya se ŋkɛ.»

³Ma ke hɛ sha hɛ: «Ma kenza yɛ kaɗe kazhɛnemte səndəkwəa Shala ta ka Israyɛl ne, zhɛnema ŋkɛ yɛ pala pala tɛape ma. Ama ɗave nda wəshi gəmə va fete ta ŋayɛ ke Shala ta ka Israyɛl. Ma tsagha, pələsə tenza yɛ ba'a kateɗepe yɛ tewəmbəreke wa sema ɗa ta dzeve ta ŋkɛ kaslə kənəa gheyɛ.»

⁴Ma ke ka Filisti: «Ama wa wəshi nyi teɗa nda n'yɛ wa?» Ma ke hɛ zhɛnete nda ke hɛ: «Kala nza ta mbeli nyi te ghəa ka Filisti, mcɛfe wəshi nyi vɛsəte mbeli kala pa ta zhi le mze kwa tere tere ba'a kwə mcɛfe nyi vɛsəte mbeli yitea mze kwa tere tere perə, kala nza ta mbeli nyi te ghəa ka Filisti, va nya nza nde nahe zhi nya kwetɛŋe kese te gheyɛ ba'a te mbeli nyi te ghəa ŋayɛ.

⁵Menete mə yɛ pa ta zhia ŋayɛ ba'a yɛ pa ta kwəa ŋayɛ nyi kebeze meleme, ɗepete mə zləvəa Shala ta Israyɛl. Ya kwete kateɗema ŋkɛ ncɛ berete ta ŋkɛ te gheyɛ, te yɛ shala ta ŋayɛ ba'a hɛɗia ŋayɛ.

⁶Yitea wa zhɛrete wənəa ŋayɛ yɛ ntɛaŋe ntɛaŋe kala nya menete ka Ɛzhipte le Farawon wa? Ma kwa ɗate hɛ Shala ne, ashɛ hɛ kesərəakɛ ka Israyɛl kaslə wəka?

⁷Ma tsetsenya ne, gezlate mə wəmata gədəwə mɛnɛfɛ, shɛ yɛ kelete sla bake, nyi kesa nda ŋ'wa ke leve ta nci ba'a nyi keghama kakele sheghwə te welɛ. Katehwepe sla shɛhɛ yɛ yitea wəmata shɛ, ama kateŋka leve ta nci nyi hwa sebe va hɛ yɛ kase kadzawa zlema.

⁸Katekele səndəkwəa Mahwətə yɛ ba'a kateve ŋkɛ yɛ kwa wəmata shɛ. Ma wəshi nyi vɛsəte nyighɛ yɛ le mze kwa tere tere kezha ve nda ke Mahwətə va beze ghena ta ŋayɛ, katebete hɛ yɛ kwa kwete səndəkwə nya ɓɛhwɛ, vare səndəkwə Shala nda tesərə ŋkɛ yɛ kaslə ŋkɛ.

⁹Katenewe yɛ megela: ma kekelete hweŋkwa kelə ŋkɛ sha hɛɗia ka Israyɛl, kadzeme laka Bɛt-Shɛmɛsh ne, Shala ta ka Israyɛl nde menete ɓəmə wəsə kwa ndiremi nya wəba nya. Keɗema ŋkɛ tsagha ne, kateɗepe gheɓəmə kaɗema gheŋkɛ nde ɗate ɓəmə we, ama kweci ndiremi ka dzetenji te gheɓəmə gəmə gəmə.»

¹⁰Pa ka Filisti nyighɛ menete tsagha. Pa hɛ ŋkave sla nyi nza leve yitea hɛ bake. Pa hɛ hwepeyite hɛ yitea wəmata ba'a ŋzleyi leve ta nci kwa zlema.

¹¹Pa hɛ veyi səndəkwəa Mahwətə pelɛ wəmata gədəwə zlaɓe le kwete səndəkwə nya ɓɛhwɛ nya nza yɛ pa ta zhi ba'a kwə nyi vɛsəte mbeli le mze kwa tere tere kwa.

¹²Laŋe sla shɛhɛ sha hweŋkwa kedzeme Bɛt-Shɛmɛsh. Tereŋe hɛ kelete hweŋkwa nya kwetɛŋe tiɗiɗi, kaɗema kedzeyi te kwa gwela keɗema te kwa zeme, kanehwene hɛ. Kadzeghwa mbeli nyi te ghə kwa sebe ta nci hwa'a kwa ghala ta Bɛt-Shɛmɛsh.

¹³Sla yasla marəwrə mbeli nyi mbe Bɛt-Shɛmɛsh se te wəve kwa zlərə, ma kwa kafete kema hɛ, pa hɛ nakɛ səndəkwə, ntake hɛ kazlama kwa nakɛ ŋkɛ hɛ.

¹⁴Pa wəmata nyagha ntsehe mbe wəvea Zhozəwɛ, nde Bɛt-Shɛmɛsh, pa ŋkɛ ghereŋenyɛ dekwede yitea kwete gela nya wəba tagha. Pa mbeli perawemte sheghwəa wəmata nyagha mbe, dzeghekɛ nda melɛ kwa tere tere le sla shɛhɛ ke Mahwətə.

¹⁵Pa ka Lɛvi kelakawa səndəkwəa Mahwətə ba'a kwete nya ɓɛhwɛ nya terasle vare, nya nza wəshi nyi vɛsəte nyighɛ mbeli le mze kwa tere tere kwa, pa hɛ fəyi hɛ kwa ghəa gela nya wəba nyagha. Pa ka Bɛt-Shɛmɛsh dzeghekɛ nda melɛ kwa tere tere ba'a melɛ kejikə ghə ke Mahwətə te vəa shɛ.

¹⁶Ma kwa nakɛ mbeli nyi te ghəa ka Filisti nyi mcɛfe nyighɛ, pa hɛ zhɛneghe geva kadzawa Ɛkron te vecia shɛnyɛ.

¹⁷Wa nyi wəshi mze kwa tere tere nyi keyipə pa le zhi, nyi fəave nda ka Filisti ke Mahwətə kezha dimə ghə nyi: zake kaŋa meleme ta ka Asdod, zake kaŋa Gaza, zake kaŋa Askalon, zake kaŋa Gat, zake kaŋa Ɛkron.

¹⁸Ma kwə nyi vɛsəte nyighɛ mbeli le mze kwa tere tere ne, kala nza ta meleme nyi mbe hɛɗia Filisti nyi sleke mbeli nyi te ghə nyi mcɛfe, se te meleme nyi jama jama vaŋe te nyi ɓɛhwɛ ɓɛhwɛ nyi ɗema zli yitea hɛ. Hwa'a sha gela nya wəba nya mbe wəvea Zhozəwɛ nde Bɛt-Shɛmɛsh, nya veyi səndəkwəa Mahwətə mbeli te bezlea hɛɗia nci. Pa ɓeshi ne, mba gela shɛ te ŋkwa shɛ.

¹⁹Pa Mahwətə ɗate ka Bɛt-Shɛmɛsh va nya nakɛ ŋkwa nya kwa səndəkwəa nya keveyi geva kaŋa Shala hɛ, pa ŋkɛ mpəyi mbeli mberefaŋemsə mbe mbeli 50.000. Vatse nza mbeli mbe nehwene kwele kwele kwa ɗate hɛ ŋkɛ kwele kwele.

²⁰Ma ke ka Bɛt-Shɛmɛsh gezete: «Wa nde nza kazereghehwe nza kwa kema ta Mahwətə, Shala nya keveyi geva tekeleke wa? Kadzema tekele səndəkwəa ŋkɛ gheɓəmə yitea hendemte ŋkɛ cakeɗake le gheɓəmə wa?»

²¹Pa hɛ ghweneghe mbeli sha ka Kiriyat-Yɛyarim, ma ke hɛ sha hɛ: «Nahe ka Filisti kezhɛneke səndəkwəa Mahwətə. Sawa mə shɛ yɛ keleghe ŋkɛ kadzeme sha gheyɛ.»