Read kapsiki 1 Saməyɛl 7 Bible Online

1 Saməyɛl 7 - kapsiki bible

1 Saməyɛl 7

¹Pa ka Kiriyat-Yɛyarim sawa kakele səndəkwəa Mahwətə kadzeme, pa hɛ keleghe ŋkɛ kadzeki ghɛa Abinadab nya kwa ghəa wəmbə, pa hɛ veyi wəzege ta ŋkɛ Ɛlazar kezha ya səndəkwəa Mahwətə.

²Kwele kwele menete geva va ghala nya nza səndəkwəa Mahwətə mbe Kiriyat-Yɛyarim, gare va bakemsə menete ŋkɛ mbe. Tagha gɛ, pɛtɛa ka Israyɛl kaɗe kahende nda geva ke Mahwətə.

³Ma ke Saməyɛl sha ghɛa Israyɛl: «Ma kenza nde le wənə kwetɛŋe se ŋayɛ yɛ sha Mahwətə, sərəakɛ mə yɛ shala ta ka se se ba'a yɛ Astartɛ. Ndeke nda mə wənəa ŋayɛ ke Mahwətə ba'a hawe mə ve, deke gheŋkɛ kwetɛŋe, nda nza ŋkɛ kakelemte ŋayɛ shave mbe dzeve ta ka Filisti.»

⁴Pa ka Israyɛl zlekɛ kweci shala: yɛ Ba'al ba'a yɛ Astartɛ, ntəŋə hɛ yitea mene nda slene ke Mahwətə, yitea hawe ve deke gheŋkɛ kwetɛŋenyɛ.

⁵Ma ke Saməyɛl: «Tsenete mə pɛtɛa ka Israyɛl pelɛ Mispa, katesəkwə Mahwətə 'ya kaŋa ŋayɛ.»

⁶Pa ka Israyɛl tsenete geva pelɛ Mispa. Kagə yɛmə hɛ ba'a kasheke ŋkɛ hɛ te hɛɗi mbe kema ta Mahwətə. Pa hɛ menete səwəmayɛ te vəa shɛ. Tagha gɛ, ma ke hɛ gezete: «Nahe n'yɛ kemenete jaɗafa laka Mahwətə!» Ma pelɛ Mispa ne, pa Saməyɛl zhɛrenyɛ kawəndə nya te ghəa ka Israyɛl.

⁷Pa ka Filisti fate nahe ka Israyɛl ketsenete geva pelɛ Mispa, cape mbeli nyi te ghəa nci kadzeme sha ka Israyɛl le mpa. Nahe ka Israyɛl kefate, ntake ghazlənə kazhɛ nda ke hɛ va ka Filisti.

⁸Ma ke ka Israyɛl sha Saməyɛl: «Nzama na bivə ma! Wəfəma n'yɛ na ma! Tsa nda lewela ke Shala Mahwətə ta ɓəmə, yitea mbele ɓəmə ŋkɛ shave mbe dzeve ta ka Filisti!»

⁹Pa Saməyɛl kelete zhɛgwəa təmə nya yitea ŋ'wa, pa ŋkɛ dzeghekɛ nda melɛ kwa tere tere le ke Mahwətə. Pa ŋkɛ səkwəte Mahwətə kezha ka Israyɛl, pa Mahwətə yipəyi nda kwa.

¹⁰Ma mba Saməyɛl kadzeghe melɛ ne, pɛkwe ka Filisti kezha mpa le ka Israyɛl, ama te vecia shɛ ne, nahe Mahwətə keghwenakɛ hwa ta va katsa ka Filisti. Pa ŋkɛ ndeke nda ghazlənə ke hɛ, pa ka Israyɛl ɗate hɛ.

¹¹Pa ka Israyɛl shavenji mbe Mispa, pa hɛ kekate ka Filisti hwa'a kwa zeweve ta Bɛt-Kar ba'a ɗate hɛ kwele kwele.

¹²Pa Saməyɛl kelete gɛaŋa, mɓeyi ŋkɛ kwelɛ yɛ Mispa le Ladaŋ, pa ŋkɛ ndeke nda slə kaƐbɛn-Ɛzɛr, geze ta ŋkɛ, «Pelɛ nya kekemane ŋkwa.»

¹³Ma tsagha gɛ, sheŋwe sheŋwe ka Filisti, gatse hɛ fɛanji kedzete hɛɗia Israyɛl. Ka Filisti yaɗa Mahwətə kala nza ta vəa Saməyɛl teghweme.

¹⁴Ma meleme nyi fəhwe ka Filisti va ka Israyɛl se mbe Ɛkron hwa'a kwa Gat ne, pa ka Israyɛl zhɛneke wəshia nci va hɛ. Pa nza kwelɛŋe menete geva kwelɛ ka Israyɛl le ka Amor.

¹⁵Pa Saməyɛl nzanyɛ kawəndə nya te ghə mbe Israyɛl kala nza nya nzahwe ŋkɛ teghweme.

¹⁶Keva keva lə ŋkɛ yitea dzeghwa mbe Bɛtɛl, Gilgal ba'a Mispa, kameha ghwə ta ka Israyɛl ŋkɛ te ŋkwa shɛhɛ.

¹⁷Kwetere wəmbəa ŋkɛ, kazhɛre geva ŋkɛ kadzeme Rama nya se ghɛa ŋkɛ, tagha se ŋkɛ kameha nda ghwə ke ka Israyɛl ba'a kapa nda reghwetɛ ke Mahwətə.