Read სბს–სტოკჰოლმი 2001 დაბადება 30 Bible Online

დაბადება 30 - სბს–სტოკჰოლმი 2001 bible

დაბადება 30

¹და დაინახა რახელმა, რომ ვერ უშვა იაკობს, და შეშურდა თავისი დისა და უთხრა იაკობს: “მომეცი შვილები. თუ არა და, მოვკვდები.”

²და განურისხდა იაკობი რახელს და თქვა: “ღვთის მაგიერი ხომ არა ვარ, რომელმაც აღკვეთა შენგან მუცლის ნაყოფი?”

³და უთხრა მან იაკობს: “აჰა, მხევალი ჩემი ბილჰა, შედი მასთან და შობს ჩემს მუხლებზე, და მეც გავშვილიანდები მისგან.”

⁴და მისცა ბილჰა, თავისი მხევალი, ცოლად, და შევიდა იაკობი მასთან.

⁵და დაორსულდა ბილჰა და უშვა იაკობს ძე.

⁶და თქვა რახელმა: “განმსაჯა მე ღმერთმა, შეისმინა ხმა ჩემი და მომცა მე ძე.” ამიტომ უწოდა მან სახელად დანი.

⁷და კვლავ დაორსულდა ბილჰა, რახელის მხევალი და უშვა მეორე ძე იაკობს.

⁸და თქვა რახელმა: “მაგარი ჭიდილით შევეჭიდე ჩემს დას, თითქოს ღმერთს ვეჭიდებოდი, და ვძლიე კიდეც.” და უწოდა მას სახელად ნაფთალი.

⁹და დაინახა ლეამ, რომ შეწყვიტა შობა, და აიყვანა ზილფა, თავისი მხევალი, და მისცა იგი იაკობს ცოლად.

¹⁰და უშვა ზილფამ, ლეას მხევალმა, ძე იაკობს.

¹¹და თქვა ლეამ: “ბედნიერად.” და უწოდა მას სახელად გადი.

¹²და უშვა ზილფამ, ლეას მხევალმა, მეორე ძე იაკობს.

¹³და თქვა ლეამ: “ნეტარად მიმიჩნევენ მე ასულნი.” და უწოდა მას სახელად აშერი.

¹⁴და წავიდა რეუბენი პურის მკის დღეებში და იპოვა მინდორში მანდრაგორები, და მიართვა ისინი თავის დედას. და უთხრა რახელმა ლეას: “მომეცი მე შენი ძის მანდრაგორების ნაწილი.”

¹⁵და უთხრა მან: “არ გეყო, რომ ქმარი წამართვი და ახლა ჩემი ძის მანდრაგორებსაც მართმევ?” და უთხრა მას რახელმა: “ამაღამ შენთან დაწვეს იაკობი, შენი ძის მანდრაგორების სანაცვლოდ.”

¹⁶და როცა დაბრუნდა იაკობი ველიდან საღამოჟამს, გავიდა ლეა მის შესახვედრად და უთხრა: “შემოდი ჩემთან, რადგან გიყიდე შენ ჩემი ძის მანდრაგორების სანაცვლოდ.” და დაწვა მასთან იგი იმ ღამეს.

¹⁷და უსმინა ღმერთმა ლეას და დაორსულდა, და უშვა მეხუთე ძე იაკობს.

¹⁸და თქვა ლეამ: “მომცა ღმერთმა საზღაური, რადგან მივეცი ჩემი მხევალი ჩემს ქმარს.” და უწოდა მას სახელად ისაქარი.

¹⁹და კვლავ დაორსულდა ლეა და უშვა იაკობს მეექვსე ძე.

²⁰და თქვა ლეამ: “კეთილი ხვედრი მარგუნა ღმერთმა. ახლა კი შემიტკბობს ჩემი ქმარი, რადგან ექვსი ძე ვუშვი მას.” და უწოდა მას სახელად ზებულუნი.

²¹და შემდეგ შვა ასული და უწოდა მას სახელად დინა.

²²და გაიხსენა ღმერთმა რახელი და ისმინა ღმერთმა მისი ვედრება და გახსნა მისი საშო.

²³და დაორსულდა და შვა ძე, და თქვა: “ამაშორა ღმერთმა შერცხვენას.”

²⁴და უწოდა მას სახელად იოსები, და თქვა: “სხვა ძესაც შემძენს უფალი!”

²⁵და მას შემდეგ, რაც შვა რახელმა იოსები, უთხრა იაკობმა ლაბანს: “გამიშვი, რომ ჩემს მხარეში წავიდე.

²⁶მომეცი ჩემი ცოლები და ჩემი შვილები, რომელთათვისაც გემსახურე, რომ წავიდე, რადგან შენ იცი ჩემი სამსახური, როგორც გემსახურე.”

²⁷და უთხრა მას ლაბანმა: “ნეტავ ვპოვო მადლი შენს თვალში. მივხვდი მე, რომ მაკურთხა უფალმა შენს გამო.”

²⁸და თქვა: “დაინიშნე შენთვის საზღაური ჩემგან, და მოგცემ.”

²⁹და უთხრა მას იაკობმა: “შენ იცი, როგორ გემსახურე და როგორ გამრავლდა შენი საქონელი ჩემი ზრუნვით.

³⁰რადგან ჩემამდე ცოტა გყავდა და გაგიმრავლდა. და გაკურთხა შენ უფალმა ჩემს ფეხზე. და როდისღა ვიზრუნო ჩემი სახლისათვის?”

³¹თქვა: “რა მოგცე?” და თქვა იაკობმა: “ნუ მომცემ ნურაფერს, თუ გამიკეთებ იმ საქმეს, რასაც გეტყვი, კვლავ დავმწყევსავ შენს ფარებს და დავიცავ მას.

³²მე დღეს გავივლი მთელ შენს ფარაში. და განაშორე იქიდან ყოველი დაწინწკლული და ჭრელი ცხვარი, და ყოველი წაბლისფერი ცხვარი, და ჭრელი და დაწინწკლული თხა. და ეს იქნება ჩემი საზღაური.

³³და მიპასუხოს მე ჩემმა სიმართლემ ხვალინდელ დღეს, როცა მოხვალ, რათა იხილო ჩემი საზღაური შენს წინაშე: ყოველი, რომელიც არ იყოს დაწინწკლული და ჭრელი თხათა შორის და წაბლისფერი ცხვართა შორის, ნაქურდალად ჩაითვალოს ჩემგან.”

³⁴და თქვა ლაბანმა: “კეთილი, შენი სიტყვისამებრ იყოს.”

³⁵და განაშორა იმ დღეს ზოლიანი და ჭრელი ვაცები, და ყველა დაწინწკლული და ჭრელი დედალი თხა, და ყველა, რომელზეც იყო ცოტაოდენი თეთრი, და ყოველი წაბლისფერი ცხვართა შორის, და მისცა თავის ვაჟებს.

³⁶და დაცილდა ლაბანი სამი დღის სავალზე იაკობს, რომელიც მწყესავდა ლაბანის დანარჩენ ფარას.

³⁷და აიღო იაკობმა თავისთვის ალვისხის, ნუშისა და წაბლის ხეთა ნედლი წნელები, და შემოჭრა მათზე თეთრი ზოლები, შემოაცალა რა მათ ქერქი.

³⁸და დაჭრელებული წნელები ჩააწყო წყლის გეჯებში, სადაც მიდიოდა ცხვარი წყლის დასალევად, და ისინი ხურდებოდნენ, როდესაც მიდიოდნენ წყლის სასმელად.

³⁹და ხურდებოდა ცხვარი წნელების წინ და შობდნენ ცხვრები ზოლებიან ბატკნებს, დაწინწკლულებსა და ჭრელებს.

⁴⁰და გამოყო კრავები იაკობმა, და დააყენა ლაბანის ფარა ზოლიანი და წაბლისფერი ფარის პირდაპირ. და განალაგა თავისი სამწყსო ცალკე და არ დატოვა იგი ლაბანის ფარასთან.

⁴¹და ჯანსაღი ფარის ახურებისას ცხვრის თვალწინ ჩაყრიდა ხოლმე იაკობი წნელებს გეჯებში, რომ წნელებთან აეხურებინა ისინი.

⁴²და როცა სუსტი იყო ფარა, არ ყრიდა. და ლაბანს რჩებოდა სუსტი, იაკობს კი ჯანსაღი.

⁴³და დიდად გამდიდრდა ეს კაცი, და გაუჩნდა მრავალი ცხვარი, მხევლები და მსახურები, ჯორი და აქლემი.