Read სბს–სტოკჰოლმი 2001 დაბადება 32 Bible Online

დაბადება 32 - სბს–სტოკჰოლმი 2001 bible

დაბადება 32

¹და წავიდა იაკობი თავისი გზით და შემოხვდნენ მას ღვთის ანგელოზები.

²და თქვა იაკობმა, როცა იხილა ისინი: “ღვთის ბანაკია ეს,” და უწოდა იმ ბანაკს სახელად მახანაიმი.

³და გაგზავნა იაკობმა თავის წინაშე მოციქულნი თავისი ძმის, ესავისაკენ, რომელიც ცხოვრობდა სეყირის ქვეყანაში, ედომის ველზე.

⁴და უბრძანა მათ და უთხრა: “ასე უთხარით ჩემს ბატონს, ესავს: “თქვა მსახურმა შენმა იაკობმა: ‘ლაბანთან ვცხოვრობდი მე და შემაგვიანდა აქამდე.

⁵და მყავს მე ხარები და სახედრები, ცხვარი და მსახურნი და მხევალნი, და ვაუწყებ ჩემს ბატონს, რომ მინდა ვპოვო მადლი შენს თვალში.’”

⁶და დაბრუნდნენ მოციქულნი იაკობთან და აუწყეს: “მივედით შენს ძმასთან, ესავთან და ისიც წამოვიდა შენს შესახვედრად, და ოთხასი კაცი ახლავს თან.”

⁷და დიდად შეეშინდა იაკობს, და შეშფოთდა, და გაყო ხალხი, რომელიც მას ახლდა, აგრეთვე ცხვარი და ძროხა და აქლემები ორ ბანაკად.

⁸და თქვა იაკობმა: “თუ დაეცემა ესავი ერთ ბანაკს, მაშინ მეორე გადარჩება.”

⁹და თქვა იაკობმა: “ჩემი მამის, აბრაამის ღმერთო, და ჩემი მამის, ისაკის ღმერთო, უფალო, რომელმაც მითხარი: ‘დაუბრუნდი შენს სანათესაოს და შენს ქვეყანას, და სიკეთეს გიყოფ,’

¹⁰ღირსი არა ვარ ყველა იმ სიკეთისა და წყალობისა, შენს მსახურს რომ უყავი, რადგან მხოლოდ ჩემი ჯოხით გადავლახე ეს იორდანე, ახლა კი ორი ბანაკი გავხდი.

¹¹მიხსენ მე ჩემი ძმის ხელიდან, ესავის ხელიდან, რადგან მეშინია მისი, ვაითუ მოვიდეს და მომკლას მე, და დედები შვილებთან ერთად.

¹²შენ კი ნათქვამი გაქვს: ‘სიკეთეს გიყოფ და გავხდი შენს თესლს ზღვის ქვიშასავით, რომელიც არ აღირიცხება სიმრავლის გამო.’”

¹³და გაათია იქ ღამე. და გამოარჩია თავისი ქონებიდან საჩუქარი ესავისათვის, თავისი ძმისათვის:

¹⁴ორასი დედალი თხა და ოცი ვაცი, ორასი ცხვარი და ოცი ვერძი,

¹⁵ოცდაათი მეწველი აქლემი თავისი კოზაკებით, ორმოცი ფური და ათი ხარი, ოცი დედალი ვირი და ათი ჩოჩორი.

¹⁶და მისცა თავის მსახურებს ცალკე ჯოგებად და უთხრა თავის მსახურებს: “იარეთ ჩემს წინ და დატოვეთ მანძილი ჯოგსა და ჯოგს შორის.”

¹⁷და უბრძანა პირველს და უთხრა: “როცა შეგხვდეს ესავი, ჩემი ძმა, და გკითხოს, ვისი ხარ და საით მიხვალ, და ვისია ეს სამწყსოო,

¹⁸უთხარი: ‘იაკობისაა, შენი მსახურისა, გამოგზავნილი ძღვნად ჩემი ბატონის, ესავისათვის, და ისიც ჩვენს უკანაა.’”

¹⁹და ასევე უბრძანა მეორესაც, მესამესაც და ყველას, ვინც მიდიოდა სამწყსოს უკან: “ასე უთხარით ესავს, როცა შეხვდებით მას:

²⁰‘აჰა, შენი მსახური იაკობიც ჩვენს უკანაა,’” რადგან ფიქრობდა: “ძღვენით, რომელიც ჩემს წინ მიდის, დავაცხრობ მის რისხვას, და მერე ვიხილავ მის სახეს, ეგების შემიწყნაროს.”

²¹და მიდიოდა მისი ძღვენი მის წინ; ის კი იმ ღამეს ბანაკში ათევდა.

²²და ადგა იმავე ღამეს და აიყვანა თავისი ორი ცოლი, თავისი ორი მხევალი და თავისი თერთმეტი ძე და გადავიდა იაბოკის ფონზე.

²³და წაიყვანა ისინი და გადაიყვანა ხევზე, და გადაიტანა, რაც კი ებადა.

²⁴და უკან მობრუნდა იაკობი მარტო. და შეებრძოლა მას კაცი განთიადამდე.

²⁵და როცა დაინახა, რომ ვერ სძლევდა მას, შეეხო იგი მისი ბარძაყის სახსარს, და ეღრძო თეძოს სახსარი იაკობს მასთან ბრძოლისას.

²⁶და იმ კაცმა უთხრა: “გამიშვი, რადგან გათენდა.” და უთხრა იაკობმა: “არ გაგიშვებ, ვიდრე არ მაკურთხებ.”

²⁷და უთხრა მან მას: “რა გქვია შენ?” მან უპასუხა: “იაკობი.”

²⁸და ჰკითხა მან: “ამიერიდან აღარ გერქვას შენ სახელად იაკობი, არამედ ისრაელი, რადგან ებრძოდი ღმერთს და კაცებს, და სძლიე მათ!”

²⁹შეევადრა და ჰკითხა მას იაკობმა: “მითხარი შენი სახელი.” და მიუგო მან: “რად კითხულობ ჩემს სახელს?” და იქვე აკურთხა იგი.

³⁰და უწოდა იაკობმა იმ ადგილს სახელად ფენიელი, რადგან თქვა: “ვიხილე ღმერთი პირისპირ, და გადარჩა ჩემი სული.”

³¹და ამოუბრწყინდა მას მზე, როგორც კი განვლო მან ფენუელი. და კოჭლობდა იგი თეძოთი.

³²ამიტომ არ ჭამენ ისრაელიანები დღემდე მენჯის ძარღვს, რომელიც თეძოს სახსარზეა, რადგან შეეხო ანგელოზი იაკობის სახსარს თეძოს ძარღვზე.