Read სბს–სტოკჰოლმი 2001 დაბადება 38 Bible Online

დაბადება 38 - სბს–სტოკჰოლმი 2001 bible

დაბადება 38

¹მაშინ იყო, რომ ჩამოსცილდა იუდა თავის ძმებს და დასახლდა ყადულამელი კაცის მეზობლად, რომლის სახელი იყო ხირა.

²და ნახა იქ იუდამ ქანაანელი კაცის, სახელად შუაყის, ასული, და მოიყვანა ის და შევიდა მასთან.

³და დაორსულდა, და ეყოლა მას ძე. და უწოდეს მას სახელად ყერი.

⁴და კვლავ დაორსულდა, და ეყოლა ძე, რომელსაც უწოდეს ონანი.

⁵და კვლავ ეყოლა ძე, და უწოდეს მას სახელად შელა. ის კი ქეზიბში იყო მისი შობის დროს.

⁶და მოუყვანა იუდამ ყერს, თავის პირმშოს, ცოლი, რომელსაც ერქვა თამარი.

⁷მაგრამ ყერი, იუდას პირმშო, ბოროტი იყო უფლის თვალში, და მოაკვდინა იგი უფალმა.

⁸და უთხრა იუდამ ონანს: “შედი შენი ძმის ცოლთან, გაუხდი ქმრად და აღუდგინე შენს ძმას თესლი.”

⁹მაგრამ იცოდა ონანმა, რომ მისი არ იქნებოდა თესლი, და ამიტომ, როცა შედიოდა თავის ძმის ცოლთან, მიწაზე ღვრიდა, რათა არ მიეცა თესლი თავისი ძმისათვის.

¹⁰და ჩაითვალა ბოროტებად უფლის წინაშე მისი საქციელი, და ისიც მოაკვდინა ღმერთმა.

¹¹და უთხრა იუდამ თამარს, თავის რძალს: “ქვრივად დაჯექ მამაშენის სახლში, ვიდრე გაიზრდებოდეს შელა, ჩემი ძე.” რადგან ეშინოდა, ისიც არ მომკვდარიყო მისი ძმებივით. და წავიდა თამარი და დარჩა თავისი მამის სახლში.

¹²და განვლო მრავალმა დღემ და მოკვდა იუდას ცოლი, შუაყის ასული. და როვა გამოიგლოვა იუდამ, ავიდა თიმნათში, თავისი ცხვრის მპარსველებთან, ყადულამელ მოყვასთან, ხირასთან ერთად.

¹³და ეუწყა თამარს: “შენი მამამთილი ამოდის თიმნათში ცხვრის გასაპარსავად.”

¹⁴და გაიძრო მან თავისი ქვრივობის სამოსელი, და ჩამოიფარა რიდე, და დაიბურა. და დაჯდა ყენაიმის კარიბჭესთან, რომელიც თიმნათის გზაზეა, რადგან დაინახა, რომ გაიზარდა შელა და არ მიეცა მას ცოლად.

¹⁵და დაინახა ის იუდამ, და მიიჩნია მეძავად, რადგან რიდეთი ჰქონდა სახე დაფარული.

¹⁶და მიუბრუნდა მას და უთხრა: “შემოვიდე შენთან?” რადგან არ იცოდა, რომ თავისი რძალი იყო. და მან ჰკითხა: “რას მომცემ, რომ შემოხვიდე ჩემთან?”

¹⁷და თქვა: “თიკანს გამოგიგზავნი ფარიდან.” და თქვა: “მომცემ წინდს, ვიდრე გამომიგზავნიდე თიკანს?”

¹⁸და თქვა: “რა გირაო გინდა, რომ მოგცე?” და თქვა: “შენი ბეჭედი და შენი თასმა და არგანი, რომელიც ხელთა გაქვს.” და მისცა მას ესენი იუდამ, და შევიდა მასთან; და დაორსულდა ის მისგან.

¹⁹და წავიდა და მოიძრო თავისი პირსაბურველი, და კვლავ შეიმოსა ქვრივობის სამოსელით.

²⁰და გაუგზავნა იუდამ თიკანი თავისი ყადულამელი მოყვასის ხელით, რათა ქალისაგან დაებრუნებინა წინდი. მაგრამ ვერ იპოვა იგი.

²¹და ჰკითხა იქაურ კაცებს: “სად არის მეძავი, ყენაიმის გზაზე რომ იჯდა?”

²²და დაბრუნდა იუდასთან, და უთხრა: “ვერ ვიპოვე იგი. და იქაურმა კაცებმაც მითხრეს, რომ არ ყოფილა იქ მეძავი.”

²³და თქვა იუდამ: “ნეტავ აეღო მას, რომ დასაცინი არ გავმხდარიყავით. აჰა, მე გაგატანე ეს თიკანი, შენ კი ვერ იპოვე იგი!”

²⁴და სამი თვის შემდეგ ეუწყა იუდას: “იბოზა შენმა რძალმა თამარმა და ორსულად არის იგი.” და თქვა იუდამ: “გამოიყვანეთ, რათა დაიწვას.”

²⁵და როცა მოჰყავდათ იგი, გაუგზავნა მან თავის მამამთილს და შეუთვალა: “იმ კაცისაგან, ვარ ორსულად, ვისაც ესენი ეკუთვნის.” და ისიც დასძინა: “ამოიცანი, ვისია ეს ბეჭედი, თასმა და არგანი.”

²⁶და იცნო იუდამ, და თქვა: “მართალია ჩემთან თამარი, რადგან მე არ მივეცი იგი შელას, ჩემს ძეს.” და აღარ შეუცვნია იგი.

²⁷და მშობიარობის ჟამს აღმოჩნდა, რომ ტყუპები იყვნენ მის მუცელში.

²⁸და მშობიარობისას გამოყო ერთმა ხელი, და ბებიაქალმა მეწამული ძაფი შეაბა მას ამ სიტყვებით: “ეს გამოვიდა პირველი.”

²⁹მან უკან წაიღო თავისი ხელი, გამოვიდა მისი ძმა. და თქვა ბებიაქალმა: “როგორ გამოარღვიე შენთვის ზღუდე?” და უწოდეს მას სახელად ფერეცი.

³⁰და შემდეგ გამოვიდა მისი ძმა, რომელსაც ხელზე ება მეწამული ძაფი, და უწოდეს მას სახელად ზერახი.