Read სბს–სტოკჰოლმი 2001 დაბადება 40 Bible Online

დაბადება 40 - სბს–სტოკჰოლმი 2001 bible

დაბადება 40

¹ამ ამბების შემდეგ იყო, რომ ეგვიპტის ფარაონის მწდეთუხუცესმა და მეპურეთუხუცესმა შესცოდეს თავიანთ ბატონს.

²და განურისხდა ფარაონი თავის ორ კარისკაცს: მწდეთუხუცესსა და მეპურეთუხუცესს.

³და გადასცა ისინი საპყრობილეში, მცველთაუფროსის სახლში, სადაც იოსები იყო დაპატიმრებული.

⁴და მცველთაუფროსმა მიუჩინა მათ იოსები, და ის ემსახურებოდა მათ. და ასე იყვნენ ერთხანს საპყრობილეში.

⁵და ერთ ღამეს ესიზმრა ორთავეს სიზმარი, თითოეულს თავისი, საკუთრივ ასახსნელი სიზმარი: მწდეთაუხუცესს და მეპურეთუხუცესსაც.

⁶და მივიდა დილით მათთან იოსები და დაინახა ისინი, და აჰა, დაღვრემილნი არიან.

⁷და ჰკითხა მან ფარაონის კარისკაცებს, რომლებიც მასთან ერთად იყვნენ პატიმრად მისი ბატონის საპყრობილეში: “რატომ გაქვთ დღეს თქვენ სახე მწუხარე?”

⁸და უთხრეს მას: “სიზმარი გვესიზმრა და არავინაა ამხსნელი.” “განა უფლისგან არ არის მათი ახსნა?” - უთხრა მათ იოსებმა: “მიამბეთ მე.”

⁹და უამბო მწდეთუხუცესმა თავისი სიზმარი იოსებს, და უთხრა: “ჩემს სიზმარში აჰა, ვაზია ჩემ წინაშე.

¹⁰და სამი რტო აქვს ვაზს. და როგორც კი გაიფურჩქნა, გამოიღო კვირტები და დამწიფდა მტევნები.

¹¹და ფარაონის თასია ჩემს ხელთ. და ავიღე ყურძენი, ჩავწურე თასში და ხელის გულზე დავუდგი ფარაონს.”

¹²და უთხრა მას იოსებმა: “აჰა, მისი ახსნა: სამი რტო სამი დღეა.

¹³სამი დღის შემდეგ ფარაონი აგამაღლებს და დაგაბრუნებს შენს თანამდებობაზე. და მიაწვდი ფარაონს თასს ხელში, უწინდელი წესისამებრ, როცა მისი მწდე იყავი.

¹⁴ოღონდ გამიხსენე, როცა კარგად იქნები, და მიყავი წყალობა: გაახსენე ჩემი თავი ფარაონს და გამომიყვანე ამ სახლიდან,

¹⁵რადგან მოპარული ვარ მე ებრაელთა ქვეყნიდან. და აქაც არაფერი ჩამიდენია, რომ ჩამაგდეს დილეგში.

¹⁶როცა დაინახა მეპურეთუხუცესმა, რომ კარგად ახსნა, უთხრა იოსებს: “მეც ვიხილე სიზმარი: აჰა, სამი მოწნული კალათა მადგას თავზე,

¹⁷და ზემო კალათაში ფარაონის ყოველგვარი სანოვაგეა, ხაბაზის ნახელავი, და ფრინველი ჰკენკავს მას ჩემს თავს ზემოთ იმ კალათიდან.”

¹⁸და მიუგო იოსებმა და უთხრა: “ესაა მისი ახსნა: სამი კალათა სამი დღეა.

¹⁹სამი დღის შემდეგ ფარაონი მოგკვეთს თავს და ჩამოგკიდებს ხეზე. და ფრინველი შეჭამს შენს ხორცს.”

²⁰მესამე დღეს ფარაონის დაბადების დღე იყო, და გაუმართა ფარაონმა ნადიმი თავის ყველა მსახურს და გაიხსენა თავისი მწდეთუხუცესი და მეპურეთუხუცესი.

²¹და დააბრუნა მწდეთუხუცესი თავისავე თანამდებობაზე, და იგი კვლავ მიართმევდა ფიალას ფარაონს;

²²ხოლო მეპურეთუხუცესი ჩამოჰკიდა, როგორც აუხსნა მას იოსებმა.

²³და არ გახსენებია მწდეთუხუცესს იოსები, არამედ დაავიწყდა იგი.